ఆలిండియా గ్రాండ్ నర్సరీ మేళా షురూ: ఆగ్రోస్ ఎండీ రాములు

హైదరాబాద్‌‌, వెలుగు: భవిష్యత్ తరాలకు  ఆహ్లాదకరమైన వాతావరణం అందాలంటే గ్రీనరీకి ప్రాధాన్యత ఇవ్వాలని అగ్రికల్చర్‌‌ స్పెషల్‌‌ కమిషనర్‌‌ హనుమంతు జెండాగి అన్నారు. గురువారం నెక్లెస్​రోడ్‌‌ పీపుల్స్ ప్లాజాలో ఏర్పాటు చేసిన 14వ ఆలిండియా హార్టి, అగ్రి కల్చర్‌‌ షో, గ్రాండ్ నర్సరీ మేళాను ఆగ్రోస్‌‌ ఎండీ, అగ్రికల్చర్‌‌ జాయింట్‌‌ డైరెక్టర్‌‌ కె. రాములుతో కలిసి ఆయన ప్రారంభించారు. ఈ సందర్భంగా స్పెషల్‌‌ కమిషనర్‌‌ మాట్లాడుతూ.. పర్యావరణాన్ని పరిరక్షించాల్సిన బాధ్యత  ప్రతి ఒక్కరిపై ఉందన్నారు. ప్రభుత్వం హరితహారం చేపట్టడంతో రాష్ట్రంలో గ్రీన్‌‌ కవర్‌‌ గణనీయంగా పెరిగిందన్నారు. 

అడవుల పునరుజ్జీవం జరిగిందన్నారు. దేశంలోని వివిధ ప్రాంతాలకు చెందిన అనేక రకాల మొక్కలు ఒకే చోట లభించే విధంగా  గ్రాండ్ నర్సరీ మేళాను ఏర్పాటు చేయడాన్ని ఆయన  అభినందించారు. ఆగ్రోస్‌‌ ఎండీ రాములు మాట్లాడుతూ.. కిచెన్‌‌ గార్డెన్‌‌, వర్టికల్‌‌ గార్డెన్‌‌, టెర్రస్‌‌ గార్డెన్‌‌ను హాబీగా చేసుకుంటే ఆక్సిజన్‌‌తో పాటు వర్క్‌‌ ప్రెజర్‌‌ తగ్గి మానసిక ఉత్సాహాన్ని పొందుతామన్నారు. నగరాలు కాంక్రీట్ జంగిల్​లా విస్తరిస్తున్న నేపథ్యంలో చిన్నపాటి గార్డెన్‌‌ ఏర్పాటు చేసుకుంటే రిలీఫ్‌‌ ఉంటుందన్నారు. మొక్కల పెంపకాన్ని  ఉద్యమంగా చేపట్టాలని ఆయన సూచించారు. 

ఈ నెల 5 వరకు కొనసాగనున్న నర్సరీ మేళా

నర్సరీ మేళా ఇన్​చార్జి ఖలీద్ అహ్మద్ మాట్లాడుతూ.. ఈ నెల 5 వరకు ఉదయం 9 నుంచి రాత్రి 9 గంటల వరకు గ్రాండ్ నర్సరీ మేళా కొనసాగుతుందన్నారు.  వివిధ రాష్ట్రాల నుంచి 150కి పైగా స్టాల్స్ ఏర్పాటు చేసినట్లు చెప్పారు. స్టాల్స్​లో అరుదైన మొక్కలు, విత్తనాలు, ఎరువులు, పరికరాలు ప్రదర్శన, అమ్మకాలు జరుగుతాయన్నారు. పూలు, పండ్లు, గార్డెనింగ్ లాంటి మొక్కలు అందుబాటులో ఉన్నాయని, అన్ని ఒకే చోట దొరుకుతాయన్నారు. నగర వాసులకు ఇదో మంచి అవకాశమన్నారు. హోం గార్డెన్‌‌, టెర్రస్‌‌ గార్డెన్‌‌, వర్టికల్‌‌ గార్డెన్‌‌, కిచెన్ గార్డెన్ ఏర్పాటు చేసుకోవాలనుకునే వారికి ఇదో మంచి వేదిక అని ఆయన చెప్పారు. మెడిసినల్‌‌ ప్లాంట్స్‌‌, మేలు జాతి మొక్కలు, బోన్సాయ్‌‌, అంటుకట్టిన మొక్కలు ఈ మేళాలో అందుబాటులో ఉన్నాయని ఖలీద్ వివరించారు.