హైదరాబాద్ సిటీ, వెలుగు: కాంగ్రెస్నేతలు నిరుద్యోగులను మోసం చేశారని మాజీ మంత్రి, బీఆర్ఎస్ ఎమ్మెల్యే హరీశ్ రావు ఆరోపించారు. ఎన్నికల ముందు వేడుకొని.. వాడుకొని, అధికారంలోకి వచ్చాక వదిలేశారని విమర్శించారు. రాహుల్ గాంధీ, ప్రియాంక గాంధీతో అశోక్ నగర్, సరూర్ నగర్ స్టేడియంలో మీటింగులు పెట్టించి.. ఉద్యోగాలు, నిరుద్యోగ భృతి అని మాయ మాటలు చెప్పారని ఫైర్అయ్యారు. తెలంగాణ నిరుద్యోగ జేఏసీ అధ్వర్యంలో హైదరాబాద్ నెక్లెస్ రోడ్డు లోని జలవిహార్ లో నిర్వహించిన ‘కాంగ్రెస్ నిరుద్యోగ బాకీ కార్డు ఆవిష్కరణ ’ కార్యక్రమానికి హరీష్ రావు హాజరయ్యారు.
ఈ సందర్భంగా ఆయన మాట్లాడుతూ ఇచ్చిన మాట నిలుపుకో అని బాకీ కార్డులు రేవంత్ రెడ్డిని ప్రశ్నిస్తున్నాయన్నారు. దమ్ముంటే రేవంత్ రెడ్డి.. పోలీసులు లేకుండా ఒక్కసారి అశోక్ నగర్, చిక్కడపల్లి లైబ్రరీకి రావాలని సవాల్విసిరారు. సీఎం.. ఉద్యోగ నోటిఫికేషన్లు ఇవ్వడం లేదు గానీ.. రెండు నెలల ముందే మద్యం నోటిఫికేషన్లు ఇచ్చారని, జాబ్ క్యాలెండర్ అని జాబ్ లెస్ క్యాలెండర్ విడుదల చేశారని విమర్శలు గుప్పించారు. జాబ్ క్యాలెండర్ లో చెప్పినట్లు ఒక్క నోటిఫికేషన్ అయినా ఇచ్చారా ? 2లక్షల ఉద్యోగాలు, జాబ్ క్యాలెండర్, మెగా డీఎస్సీ బోగస్, రాజీవ్ యువ వికాసం వికసించకముందే వాడిపోయిందన్నారు.
నిరుద్యోగుల పోరాటానికి అండగా ఉంటా: ఆర్ కృష్ణయ్య
జెన్కో, జీపీవో, పోలీసు, డిప్యూటీ సర్వేయర్, ఇతర గ్రూప్స్ నోటిఫికేషన్ల విషయంలో రాష్ట్ర ప్రభుత్వం మొద్దునిద్ర వైఖరి అవలంబిస్తోందని ఎంపీ ఆర్ కృష్ణయ్య ఆరోపించారు. అన్ని జిల్లా కేంద్రాల్లో బాకీ కార్డులు పెట్టి యువతను ఏకం చేయాలని, ఈ నిరుద్యోగ జేఏసీ ఇక్కడితో ఆగిపోవద్దని ఆయన సూచించారు. నిరుద్యోగుల ప్రత్యక్ష పోరాటానికి తాను అండగా ఉంటానని హామీ ఇచ్చారు. సీపీఐ రాష్ట్ర కార్యదర్శి జాన్ వెస్లీ మాట్లాడుతూ.. ఎక్కడ పోరాటాలు జరిగినా ఎర్రజెండా అండగా ఉంటుందని, ఈ నిరుద్యోగ జేఏసీ అధ్వర్యంలో విడుదలైన తెలంగాణ నిరుద్యోగ బాకీ కార్డ్ ఆవిష్కరణ కేవలం ఆరంభం మాత్రమేనని, రాష్ట్ర ప్రభుత్వ మెడలు వంచి యువత తమ హక్కులు సాధించుకోవాలన్నారు. బీఆర్ఎస్ లీడర్లు ఏనుగుల రాకేశ్ రెడ్డి, గెల్లు శ్రీనివాస్ యాదవ్, తదితరులు పాల్గొన్నారు.
