సిద్దిపేట, వెలుగు: టీఆర్ఎస్లో ఎలక్షన్స్ స్పెషలిస్ట్.. ట్రబుల్ షూటర్.. మంత్రి హరీశ్రావుకు దుబ్బాక రిజల్ట్ షాకిచ్చింది. ఎలక్షన్లయినా, బై ఎలక్షన్లయినా, పార్టీకి సంబంధించి ఏ క్రైసిస్ అయినా ఆయన ఇన్వాల్వ్ అయితే సక్సెస్ పక్కా అని అందరూ నమ్మేవాళ్లు. ఇప్పటిదాక అప్పగించిన ఏ టాస్క్లోనూ ఫేయిల్ కాని హరీశ్రావుకు తన సొంత జిల్లాలోని పక్క నియోజకవర్గంలోనే ఎదురుదెబ్బ తగిలింది. రామలింగారెడ్డి చనిపోయినప్పటి నుంచి దుబ్బాక బైఎలక్షన్లలో హరీశ్ అన్నీ తానై వ్యవహరించినా.. టీఆర్ఎస్ను గెలిపించలేకపోయారు. పరకాల, నారాయణఖేడ్ బైఎలక్షన్లతో పాటు.. 2018 ఎన్నికల్లో కొడంగల్, గద్వాల అసెంబ్లీ సెగ్మెంట్ల ఇన్ చార్జిగా ఎదుటి పార్టీలను చిత్తు చేసి టీఆర్ఎస్ క్యాండిడేట్లను గెలిపించుకున్న హరీశ్రావు స్ట్రాటజీలు దుబ్బాకలో పనిచేయలేదు. ఎన్నికల నోటిఫికేషన్ రాకముందే నియోజకవర్గమంతా తిరుగుతూ అభివృద్ది కార్యక్రమాలను ప్రారంభించినా.. ప్రచార బాధ్యతలను తన భుజమ్మీద వేసుకుని ఊరూరూ తిరిగారు. ఇతర పార్టీలకు చెందిన నేతలను, కార్యకర్తలను ఆకర్షించి టీఆర్ఎస్లో చేర్చుకోవడం.. ఇంటింటికీ వెళ్లి ఆప్యాయంగా పలకరించడం.. దుబ్బాకను ఆనుకుని ఉన్న సిద్దిపేట, గజ్వేల్, సిరిసిల్ల సెగ్మెంట్ల లెక్క అభివృద్ది చేస్తానని నమ్మబలకడం.. రాత్రి అంతా ఎలక్షన్ మేనేజిమెంట్ చేయడం.. ఇలా డే అండ్ నైట్ కష్టపడ్డారు. బీజేపీ అభ్యర్థి రఘునందన్ రావునే లక్ష్యంగా చేసుకుని ప్రచారం చేశారు. కేంద్రం వ్యవసాయ మోటర్లకు మీటర్లు పెడుతుందని ఎంతగానో ప్రచారం చేసినా ఓటర్లు పట్టించుకోలేదు. తన కష్టం, ఎత్తుగడలు పనిచేయకపోవడం హరీశ్ ను షాక్కు గురిచేశాయి. ఈ ఓటమి హరీశ్ ఇమేజ్ మీద ప్రభావం చూపుతుందన్న ప్రచారం కూడా జరుగుతోంది.
