సినిమాలు చేయాలని ఎప్పటినుంచో కలలు కంటూ కొన్నేండ్లకు వాటిని సాకారం చేసుకునేవాళ్లుంటారు. కానీ, కొందరు మాత్రం వాళ్లు అసలు ఊహించని విధంగా తన కెరీర్ను మలుచుకుంటారు. పేరెంట్స్ కోసం తమ డ్రీమ్ వదిలేసి వాళ్ల కోరిక తీర్చేందుకు సిద్ధమవుతారు. ఎవరైనా సరే.. కష్టపడితే సక్సెస్ వస్తుంది. ఎవరి కల అయినా నెరవేరుతుంది. కొన్నిసార్లు అనుకోని నిర్ణయాలు కూడా అందలాన్ని ఎక్కిస్తాయి అనడానికి ఈ నటుడి ప్రయాణమే నిదర్శనం. అతనెవరో కాదు.. బాలీవుడ్లో ఇప్పుడిప్పుడే స్టార్గా ఎదుగుతోన్న లక్ష్య.
ఢిల్లీకి చెందిన లక్ష్య లల్వాని.. 2023లో బాలీవుడ్లో ‘కిల్’ అనే సినిమాతో ఇండస్ట్రీలోకి అడుగుపెట్టాడు. ఆ సినిమాలో అమ్రిత్ రాథోడ్ పాత్రలో నటించి మెప్పించిన లక్ష్య.. బెస్ట్ మేల్ డెబ్యూ స్టార్గా ఐఫా అవార్డు అందుకున్నాడు. అయితే అంతకంటే ముందే 2015లో లక్ష్య ‘వారియర్ హై’ అనే సీరియల్లో నటించాడు. ఆ తర్వాత కూడా వరుసగా ‘అధురి కహానీ హమారీ’, ‘ప్యార్ తునే క్యా కియా’, ‘పార్దెస్ మే హై మేరా దిల్’, ‘పోరుస్’ వంటి సిరీస్లలో నటించాడు. షారుఖ్ ఖాన్ కొడుకు ఆర్యన్ డైరెక్షన్లో రీసెంట్గా వచ్చిన ‘ది బ్యాడ్స్ ఆఫ్ బాలీవుడ్’ అనే సిరీస్లో కనిపించాడు. లక్ష్య కరణ్ జోహార్ ధర్మ ప్రొడక్షన్స్లో మూడు సినిమాలకు సైన్ చేశాడు. దాంతో అప్పటికే హిందీ సినిమాలో తనకు గ్రాండ్ వెల్కమ్ దక్కింది.
ఆర్మీలో చేరాలనుకున్నా..
నేను ఇండియన్ ఆర్మీలో చేరాలనుకున్నా. సినిమాల్లో నటించాలనేది నా డ్రీమ్ కాదు. సరదాగా తిరిగామా.. సినిమాలకెళ్లామా.. అన్నట్టు ఉండేది నా లైఫ్. ఒక ఆడిషన్ తర్వాత ‘వారియర్ హై’ అనే సీరియల్ నా కెరీర్ను మలుపుతిప్పింది. చదువుకునే రోజుల్లో ఎప్పుడూ యాక్టర్ కావాలనుకోలేదు. ఎన్డీఎ(నేషనల్ డిఫెన్స్ అకాడమీ)లో చేరేందుకు ప్రిపేర్ అవుతున్నా. ప్రిలిమినరీ ఎగ్జామ్ పూర్తి చేశా. కానీ, అమ్మ నన్ను యాక్టింగ్ కెరీర్లోకి వెళ్లేలా ప్రోత్సహించింది. తన కోసం ఏదైనా చేస్తానని అప్పుడే మాటిచ్చా. నా లైఫ్లో తనే నాకు పెద్ద మోటివేషన్. మా నాన్న కూడా నాకు చాలా సపోర్ట్ చేస్తారు. యాక్టింగ్లోకి అవకాశం ఎలా వచ్చిందంటే.. ఢిల్లీలో ఉన్నప్పుడు ఆడిషన్కు వెళ్లా. అప్పటికే నేను జిమ్ ట్రైనర్గా జాబ్ చేసేవాడిని. ఆడిషన్లో సెలక్ట్ కావడంతో ముంబై వెళ్లే చాన్స్ వచ్చింది, డబ్బులు కూడా ఇస్తారని వెంటనే జాబ్ మానేసి వెళ్లిపోయా. అప్పట్లో నాకు అసలు యాక్టింగ్ రాదు. దాంతో హేళన చేసేవాళ్లు.
టీవీలో నటించేటప్పుడు..
ఒక సీరియల్లో అవకాశం రావడంతో వెంటనే మా నాన్నకు ఫోన్ చేసి రోజుకు కొంత అమౌంట్ ఇస్తారని చెప్పాను. నాన్న అందుకు ఏం అడ్డు చెప్పలేదు. సరే మంచిదే కదా చెయ్యమన్నారు. ‘పోరస్’ అనే సిరీస్ చేస్తున్నప్పుడు చాలా ఇబ్బంది పడ్డా. అందులో నా క్యారెక్టర్ కింగ్లా ఉంటుంది. అందులో అన్ని రకరకాల ఎమోషనల్ సీన్స్ ఉన్నాయి. యాక్షన్ సీన్స్ ఉన్నాయి. లొకేషన్ కూడా వేరే చోట కావడంతో నా హెల్త్ కొంచెం పాడైంది. అప్పుడు నన్ను కాస్ట్ చేసిన కాస్టింగ్ డైరెక్టర్కి ఫోన్ చేసి చెప్తే ఆమె ఒక డాక్టర్ నెంబర్ ఇచ్చింది. వెళ్లి చెక్ చేయించుకుంటే కంటికి సంబంధించిన అరుదైన వ్యాధి అని చెప్పారు. అయితే, అది ఎందుకు వచ్చింది అని కనుక్కుంటే నాకు హెల్త్ పాడైనా, యాంటీబయాటిక్స్ వేసుకుంటూ రోజుకు 12 గంటలు షూటింగ్, 2 గంటలు జిమ్ చేస్తూ ఉండడం వల్ల బాడీలో రియాక్షన్ వచ్చింది. దాంతో హాస్పిటల్లో చేరాల్సి వచ్చింది.
‘కిల్’ తర్వాత..
‘కిల్’ సినిమా షూటింగ్లో ప్రతి రోజూ దెబ్బలు తగిలేవి. నిజంగా రక్తం కారుతుందా? నకిలీదా? అనేది కూడా అర్థమయ్యేది కాదు. రోజూ ఒళ్లు అలసిపోయేలా కష్టపడేవాళ్లం. ఒకరోజు సెలవు దొరికితే బాగుండు.. ఇంటికెళ్లాలి.. రెస్ట్ తీసుకోవాలి అనిపించేది. షూటింగ్ జరిగినన్ని రోజులూ నా ఫ్రెండ్స్ని కూడా కలవలేదు. ఒక్కసారి సినిమా రిలీజ్ అయ్యి ప్రేక్షకుల ముందుకు వచ్చాక, నా యాక్టింగ్‌‌‌‌‌‌‌‌‌‌‌‌‌‌‌‌కు వచ్చిన రెస్పాన్స్ మర్చిపోలేను. ఈ సినిమా కోసం బాడీ ట్రాన్స్ఫర్మేషన్ చేశా. ఇందులో షర్ట్ తీసేసి చేయాల్సిన షాట్ కోసం బాడీ బిల్డ్ చేసుకోవాలి అనుకున్నా. నేను జిమ్లో పనిచేసినా ఇలా ఉండాలి అని పర్టిక్యులర్గా ఏం అనుకోలేదు. సినిమాల్లో అలా ఉండదు. ఏదైనా పర్ఫెక్ట్గా చేయాల్సి ఉంటుంది. ఒక క్యారెక్టర్ ఎలా డిజైన్ చేస్తే అలానే కనిపించాలి. ఆ విషయం అర్థం చేసుకుని బాడీని ఒక షేప్లో ఉంచే ప్రయత్నం చేశా.
ఏది వచ్చినా..
సినిమా ద్వారా నాకు గుర్తింపు, డబ్బు, సక్సెస్ లేదా ఫెయిల్యూర్ ఏది వచ్చినా దాన్ని రిసీవ్ చేసుకోవాలి. అన్నింటికీ రెడీగా ఉండాలి. హడావిడి లేకుండా కూర్చుని ఆలోచించి నిర్ణయాలు తీసుకోవాలి. ఎంత కష్టపడితే అంత సక్సెస్ వస్తుంది. కాబట్టి కష్టపడడానికి ఎప్పుడూ సిద్ధంగా ఉండాలి. సక్సెస్ వచ్చేవరకు సహనంతో ఉండాలి.
ఇంటి పేరు తీసేశా..
ఇంటిపేరు తీసేయమని నాకెవరూ చెప్పలేదు. నన్ను ఎవరూ ఒత్తిడి చేయలేదు. న్యూమరాలజీ కోసం కూడా కాదు. నేను అలాంటివి నమ్మను కూడా. డెస్టినీ, హార్డ్ వర్క్ను నమ్ముతా. ఇంటిపేరు వల్ల సొసైటీలో డిఫరెన్సెస్ వస్తుంటాయి. అదే ఇంటిపేరు తీసేస్తే ఒకే ప్లాట్ఫామ్ మీద ఎవరిని వాళ్లు వెతుక్కుంటారు. ఇది ఐకమత్యంగా ఉండడానికి బలం చేకూరుస్తుందని నమ్మా. అందుకే నా అంతట నేనే ఇంటిపేరు తొలగించాలనుకున్నా.
