మక్తల్/నర్వ, వెలుగు: రైతులు వరి వేస్తే ఉరేనన్న మహానుభావుడు సీఎం కేసీఆర్ అని వైఎస్సార్ టీపీ చీఫ్ షర్మిల విమర్శించారు. రైతులను రాజులను చేస్తానన్న ఆయన.. ఇంకెప్పుడు చేస్తారు? అని ప్రశ్నించారు. శనివారం నారాయణపేట జిల్లాలోని మక్తల్, నర్వ మండలాల్లో ఆమె పాదయాత్ర చేశారు. ఈ సందర్భంగా మక్తల్ లోని గువ్వలపల్లి, మంథన్గోడ్, నర్వలోని పాతర్చేడులో షర్మిల మాట్లాడారు. ‘‘రైతులకు రూ.5 వేల రైతుబంధు ఇచ్చి రూ.30 వేల సబ్సిడీ పథకాలు బంద్ పెట్టారు. కేవలం రూ.5 వేలకే రైతులు కోటీశ్వరులు అయిపోతారా? రుణమాఫీ చేయకపోవడంతో బ్యాంకుల్లో వడ్డీలు కట్టలేక రైతులు ఆత్మహత్యలు చేసుకుంటున్నారు. కేసీఆర్ 8 ఏండ్ల పాలనలో 8 వేల మంది రైతులు ఆత్మహత్య చేసుకున్నారు” అని అన్నారు. కేసీఆర్ కు పాలన చేతకాదని, ఎప్పుడూ ఫాంహౌస్లోనే ఉంటారని విమర్శించారు. ఎన్నికల్లో ఇచ్చిన హామీల్లో ఒక్కటన్నా కేసీఆర్ నెరవేర్చలేదని ఫైర్ అయ్యారు. ఆయన మాట మీద నిలబడే వ్యక్తి కాదని విమర్శించారు.
1,700 కి.మీ. పూర్తయిన పాదయాత్ర
షర్మిల పాదయాత్ర 1700 కిలోమీటర్లు పూర్తయింది. ఈ సందర్భంగా పాతర్చేడులో వైఎస్సార్ విగ్రహాన్ని ఆమె ఆవిష్కరించారు. 1,700 కిలోమీటర్లు నడిచింది తానే అయినా, నడిపించింది ప్రజల అభిమానమేనని అన్నారు.
