హీరో విష్ణు విశాల్ హీరోగా చెల్లా అయ్యావు దర్శకత్వంలో తెరకెక్కుతున్న ఫ్యామిలీ, స్పోర్ట్స్ డ్రామా ‘మట్టి కుస్తీ’. ఇందులో ఐశ్వర్య లక్ష్మి కథానాయికగా నటిస్తోంది. 'ఆర్ టీ టీమ్ వర్క్స్, విష్ణు విశాల్ స్టూడియోస్ బ్యానర్ లపై మాస్ మహారాజా రవితేజతో కలిసి విష్ణు విశాల్ నిర్మించాడు. ఈ చిత్రం డిసెంబర్ 2న ప్రపంచవ్యాప్తంగా విడుదలౌతోంది. ఈ నేపథ్యంలో చిత్ర విశేషాలను హీరో విష్ణు విశాల్ మీడియా సమావేశంలో పంచుకున్నారు.
'మట్టి కుస్తీ' గురించి చెప్పండి ?
'మట్టి కుస్తీ' భార్యాభర్తల ప్రేమ కథ. భార్యభర్తల మధ్య చెలరేగే ఈగో ఒక రకమైన కుస్తీ. ఈ కథలో కుస్తీ స్పోర్ట్ కూడా భాగంగా ఉంటుంది. కేరళలో మట్టికుస్తీ అనే స్పోర్ట్ ఉంది. ఇందులో హీరోయిన్ కేరళ అమ్మాయి. అలా ఈ చిత్రానికి మట్టికుస్తీ అనే పేరు పెట్టాం. పెళ్లి తర్వాత భార్యభర్తలకు కొన్ని అంచనాలు ఉంటాయి. ఆ అంచనాలని అందుకోలేనప్పుడు ఈగోలు మొదలౌతాయి. మట్టికుస్తీ అవుట్ అండ్ అవుట్ ఫ్యామిలీ ఎంటర్ టైనర్. స్పోర్ట్స్ కూడా లైట్ హార్టెడ్ గా ఉంటుంది. సినిమా చాలా వినోదాత్మకంగా ఉంటుంది. 'మట్టి కుస్తీ' నా కెరీర్ లో మొదటి అవుట్ అండ్ అవుట్ మాస్ కమర్షియల్ మసాలా ఫిల్మ్.
స్పోర్ట్ 20 నిమిషాలే ఉంటుందా ?
ఇందులో చాలా సర్ ప్రైజ్ ఎలిమెంట్స్ ఉంటాయి. స్పోర్ట్ ఇరవై నిమిషాల కంటే ఎక్కువే ఉంటుంది. ఇందులో నేను కబడ్డీ ప్లేయర్ ని. కానీ కుస్తీ ఆటకి వెళ్తాను. అలా ఎందుకు వెళ్ళాల్సి వచ్చిందో.. సినిమా చూసినప్పుడు ఇది చాలా సర్ ప్రైజింగ్ గా ఉంటుంది. మంచి ఫ్యామిలీ ఎమోషన్స్ బలంగా ఉంటాయి. ట్రైలర్ లో '' వెయ్యి అబద్దాలాడైన ఒక పెళ్లి చేయమని చెప్పారు. కానీ రెండు అబద్దాలు ఆడి ఈ పెళ్లి చేశాం' అని డైలాగ్ ఉంటుంది. ఆ రెండు అబద్దాలు ఏమిటనేది మీకు సినిమా చూసినప్పుడే తెలుస్తుంది. ఈ సినిమా ట్రైలర్ కట్ చేయడం నా కెరీర్ లో పెద్ద సవాల్ గా అనిపించింది. సర్ ప్రైజ్ రివీల్ చేయకుండా కంటెంట్ ని చెప్పడం ఒక ఛాలెంజ్. ఫస్ట్ లుక్ నుంచి ట్రైలర్ విడుదల చేయడం వరకూ చాలా జాగ్రత్తలు తీసుకున్నాం. ఫస్ట్ లుక్ చూస్తే ఇది స్పోర్ట్ మూవీ అనిపించింది. తర్వాత ఒక్కొక్కటిగా రివీల్ చేస్తూ ప్రేక్షకుల్లో క్యూరియాసిటీని పెంచి థియేటర్లో చూడాలనే ఆసక్తిని కలిగించే ప్రయత్నం చేశాం.
భార్యాభర్తల నేపథ్యం అంటే హాస్యానికి కూడా అవకాశం ఉంటుంది కదా ?
మట్టికుస్తీలో కూడా చాలా కామెడీ ఉంది. ఒక రిలేషన్ షిప్ లో ఉన్నపుడు ఖచ్చితంగా ఈగో ఉంటుంది. అయితే ఇందులో ఆడ మగ సమానమని చెప్పే సందేశం కూడా ఉంది. అయితే దీన్ని ఒక సందేశంలా కాకుండా వినోదాత్మకంగా చెప్పాం. మహిళా ప్రేక్షకులు కూడా మట్టికుస్తీని చాలా ఇష్టపడతారు.
మట్టికుస్తీ నటీనటుల గురించి.. ?
మునిష్ కాంత్, కరుణ, కింగ్స్ పాత్రలు వినోదాత్మకంగా ఉంటాయి. తెలుగు నటులు అజయ్ విలన్ గా చేశారు. శత్రు మరో నెగెటివ్ పాత్రలో కనిపిస్తారు.
రవితేజ ఈ ప్రాజెక్ట్ లోకి ఎలా వచ్చారు ?
'ఎఫ్ఐఆర్' సినిమాని తెలుగులో విడుదల చేసే సమయంలో ఒక ఫ్యామిలీ ఫ్రెండ్ ద్వారా రవితేజని కలిశాను. నేను చేసే సినిమాలు రవితేజకి చాలా నచ్చాయి. ఎఫ్ఐఆర్ ట్రైలర్ ఆయనకి చాలా నచ్చింది. ఆ సమయంలోనే.. తర్వాత ఏం చేస్తున్నావని అడిగారు. అప్పుడు ఈ లైన్ చెప్పాను. అది వినగానే ఖచ్చితంగా విజయం సాధిస్తుందని ప్రొడ్యూస్ చేస్తానని చెప్పారు. అలా జర్నీ మొదలైంది. రవితేజ నన్నుఎంతో నమ్మారు. 13 ఏళ్లుగా తమిళ ఇండస్ట్రీలో ఉన్నాను. ఏదైనా ఒక ప్రాజెక్ట్ గురించి ఎవరినైనా కలిస్తే నా బిజినెస్, మార్కెట్ గురించి మాట్లాడేవారు. కానీ రవితేజ ఒక్క మీటింగ్ లో నన్ను సంపూర్ణంగా నమ్మారు. ఆయన నమ్మకం నాకు ఎంతో కాన్ఫిడెన్స్ ఇచ్చింది. ఆయనకి నా మనసులో ఎప్పుడూ ప్రత్యేక స్థానం ఉంటుంది.
మీరు మొదట క్రికెటర్. తర్వాత యాక్టర్ అయ్యారు. ఈ రెండిట్లో ఏది ఇష్టం ?
ప్రేమించిన అమ్మాయి ఇష్టమా ? పెళ్లి చూసుకున్న అమ్మాయి ఇష్టమా ? అంటే ఏం చెప్తాం(నవ్వుతూ). క్రికెట్ ని ప్రేమించాను. సినిమాని పెళ్లి చేసుకున్నాను. రెండూ ఇష్టమే.
డ్రీమ్ రోల్స్ ఏమైనా ఉన్నాయా ?
క్రికెటర్ గా చేయాలని ఉంది. అలాగే సూపర్ హీరో పాత్రని కూడా చేయాలని ఉంది.
ప్రస్తుతం తెలుగు ఇండస్ట్రీపై తమిళ ఇండస్ట్రీ దృష్టికోణం ఎలా ఉంది ?
ప్రతి ఇండస్ట్రీకి ఒక యూనిక్ నెస్ ఉంటుంది. బాహుబలితో తెలుగు సినిమా ప్రపంచ దృష్టిని ఆకర్షించింది. ఆర్ఆర్ఆర్, పుష్ప, కేజీఎఫ్, కాంతారా, విక్రమ్, పీఎస్ 1 ఇలా అన్ని పరిశ్రమ నుండి మంచి చిత్రాలు వస్తున్నాయి. ఇప్పుడు సౌత్ లో గొప్ప వాతావరణం ఉంది. ఇండియన్ సినిమాలో సౌత్ గురించి ఇప్పుడు గొప్పగా మాట్లాడుకోవడం మనం చూస్తున్నాం.
రాత్ససన్ కి ముందు తర్వాత మీ కెరీర్ ఎలా ఉంది ?
రాత్ససన్ నుంచి చాలా పాఠాలు నేర్చుకున్నాను. ప్రేక్షకులు కమర్షియల్ నుంచి కంటెంట్ కి మారుతున్నారని రుజువు చేసిన చిత్రమది. కమర్షియల్ ఎలిమెంట్స్ తో కంటెంట్ ఉన్న చిత్రాలు చేయాలనే నిర్ణయం ఆ సినిమా నుండే తీసుకున్నాను. ఎఫ్ఐఆర్ అలా వచ్చిందే. 'మట్టికుస్తీ' కూడా కమర్షియల్ ఎలిమెంట్స్ తో పాటు బలమైన కంటెంట్ ఉన్న చిత్రం.
జ్వాలా, మీరు కలిసి నటించే అవకాశం ఉందా ?
జ్వాలా సినిమాలు ఎక్కువ చూస్తుంది. అయితే తనకి నటన పట్ల ఆసక్తి లేదు. ఇది వరకు ఎప్పుడో ఒక పాటలో కనిపించింది. ఆ విషయంలో ఇప్పటికీ రిగ్రెట్ ఫీలవుతుంటుంది. ఇంకెప్పుడూ తనని నటించమని అడగొద్దని చెప్పింది( నవ్వుతూ)...
కొత్త సినిమాల గురించి ?
నా నిర్మాణంలో ఇంకా మూడు సినిమాలు ఉన్నాయి. మోహన్ దాస్ చిత్రం చిత్రీకరణలో ఉంది. సత్యజ్యోతి దర్శకత్వంలో ఓ సినిమా ఉంటుంది. జనవరిలో మరో సినిమా ప్రకటన వస్తుంది. రజనీకాంత్ గారి లాల్ సలాం చిత్రంలో నటిస్తున్నాను.
