ఉత్తరాఖండ్‌ నుంచి హిమాచల్ ప్రదేశ్ వరకు పర్వతాల్లో వర్షం బీభత్సం సృష్టిస్తోంది. నదులు, కాలువలు పొంగిపొర్లుతున్నాయి. భారీ వర్షాల కారణంగా కొండచరియలు విరిగిపడిన ఘటనలు తెరపైకి వస్తున్నాయి. రెండు రాష్ట్రాల్లో ఇప్పటి వరకు ( వార్త రాసే సమయం) 81 మంది చనిపోయారు. కాగా, చాలా చోట్ల ఇళ్లు కూలిపోవడంతో క్షతగాత్రులను రక్షించేందుకు, శిథిలాల నుంచి మృతదేహాలను వెలికితీసేందుకు సహాయక చర్యలు కొనసాగుతున్నాయి. వాతావరణ శాఖ అంచనాల ప్రకారం మరో రెండు రోజులు ( ఆగస్టు 17,18) కొండ ప్రాంతాలలో భారీ వర్షాలు కురిసే అవకాశం ఉంది. ఈ నేపథ్యంలో రెడ్ అలర్ట్ ప్రకటించారు. –
హిమాచల్ ప్రదేశ్‌లో వర్షాల కారణంగా 71 మంది ప్రాణాలు కోల్పోగా, 13 మంది కనిపించకుండా పోయారు. ముఖ్యమంత్రి సుఖ్వీందర్ సింగ్ సుఖు మౌలిక సదుపాయాలను కల్పించాలని ఆదేశాలు జారీ చేశారు. హిమాచల్ ప్రదేశ్‌లోని సిమ్లాలోని సమ్మర్ హిల్ సమీపంలోని శివాలయం శిధిలాల నుండి మరో మహిళ మృతదేహాన్ని వెలికితీయడంతో ఇప్పటి వరకు వర్షాల కారణంగా ప్రాణాలు కోల్పోయిన 57 మంది మృతదేహాలను ఇప్పటివరకు వెలికితీశారు. బుధవారం ( ఆగస్టు 16) కొండచరియలు విరిగిపడటం, వరదల కారణంగా కూలిపోయిన భవనాల శిథిలాల నుంచి మరిన్ని మృతదేహాలను వెలికితీయడంతో మృతుల సంఖ్య పెరిగిందని అధికారులు తెలిపారు.
