ఇవేవీ మంచు ఖండంలో కట్టిన ఇగ్లూలు కాదు. సిటీలో జనం కట్టుకున్న ఇళ్లే. గాలులు మోసుకొచ్చిన మంచుతో గడ్డకట్టిపోయినయ్. అమెరికాలోని న్యూయార్క్, హాంబర్గ్ సిటీల్లోని జనానికి ఈ మంచు ఎఫెక్ట్ ఎదురైంది. ఇళ్లను మంచు కప్పేసింది. తలుపులు, కిటికీలను మూసేసి ఇళ్లల్లో చీకట్లను కమ్మేసింది. అడ్డొచ్చిన కరెంట్ లైన్లు, చెట్లనూ కూల్చేశాయి. మ్యాటరేంటంటే..ఈ ఇళ్లన్నీ లేక్ ఈరీకి సమీపంలోని హూవర్ బీచ్ తీరంలో ఉన్నాయి. ప్రస్తుతం అక్కడ ఫాల్ (ఆకురాలే కాలం) నడుస్తోంది. ఈ టైంలో పై నుంచి తేమతో కూడిన గాలులు వెచ్చటి సరస్సు మీదుగా వస్తున్నాయి. దీంతో టెంపరేచర్లు పడిపోతున్నాయి. ఆ తేమ గాలుల దెబ్బకు సరస్సులో పది అడుగుల ఎత్తున అలలు ఎగిరి దునుకుతున్నాయి. నీళ్లు గడ్డకడుతున్నాయి. మంచు మొత్తం బీచ్లలోని ఇళ్లపై పేరుకుపోయి, మొత్తం దారులను మూసేస్తోంది. దీన్నే లేక్ స్నో ఎఫెక్ట్ అని అక్కడి అధికారులు చెబుతున్నారు. ప్రస్తుతం అక్కడ కరెంట్, నీళ్లకు ఇబ్బందులు ఏర్పడుతున్నాయని అంటున్నారు. టెంపరేచర్లు మైనస్ 6 డిగ్రీలకు పడిపోయాయి. గంటకు 75 కిలోమీటర్ల వేగంతో చలి గాలులు వీస్తున్నాయి. మరికొన్ని రోజులూ ఇదే పరిస్థితి ఉంటుందని అధికారులు హెచ్చరిస్తున్నారు.
