ఎస్సారెస్పీపై ఆశలు..గోదావరి బేసిన్లో ఎగువన భారీ వర్షాలు

• నిండిన మహారాష్ట్రలోని విష్ణుపురి ప్రాజెక్ట్
• నేడో రేపో గేట్లు ఓపెన్.. శ్రీరాంసాగర్​కు నీళ్లొచ్చే చాన్స్
• ప్రాజెక్టుకు క్రమంగాపెరుగుతున్న వరద
• ఆయకట్టుకుఢోకా లేదంటున్న అధికారులు

హైదరాబాద్, వెలుగు: గోదావరి ప్రాజెక్టుల్లో కీలకమైన శ్రీరాంసాగర్ ప్రాజెక్టుపై ఆశలు చిగురిస్తున్నాయి. ఇప్పుడిప్పుడే గోదావరి బేసిన్​లోని మహారాష్ట్ర నాసిక్​లో భారీ వర్షాలు కురుస్తుండడంతో.. నదికి వరదలు మొదలవుతున్నాయి. ఈ క్రమంలోనే మహారాష్ట్రలోని విష్ణుపురి ప్రాజెక్టు దాదాపు నిండిందని అధికారులు చెబుతున్నారు. దీంతో ఒకట్రెండు రోజుల్లో ఆ ప్రాజెక్టు గేట్లు ఎత్తితే శ్రీరాంసాగర్ ప్రాజెక్టుకు వరదలు మొదలవుతాయని అంటున్నారు.

 ఆగస్టులో ప్రాజెక్టు నిండే అవకాశాలున్నట్టు చెప్తున్నారు. నిన్నటిదాకా ప్రాజెక్టుకు కేవలం 1,500 క్యూసెక్కుల ఇన్​ఫ్లోస్ ఉండగా.. శుక్రవారం స్వల్పంగా పెరిగి 5,208 క్యూసెక్కులకు చేరింది. ఆగస్టు, సెప్టెంబర్ మొత్తం గోదావరి బేసిన్​ప్రాంతాల్లో వర్షపాతం అంచనాలు మెరుగ్గా ఉన్నాయని, దీంతో ఆయకట్టుకు ఇబ్బందేమీ ఉండబోదని భరోసా ఇస్తున్నారు. ఇప్పటికే సింగూరు ప్రాజెక్టు దాదాపు నిండడంతో.. అక్కడి నుంచి కూడా శ్రీరాంసాగర్​కు నీళ్లు వచ్చే అవకాశాలు పెరిగాయని చెప్తున్నారు.

కృష్ణాకు కొనసాగుతున్న వరద

కృష్ణా ప్రాజెక్టులకు వరద ప్రవాహం స్థిరంగా కొనసాగుతున్నది. జూరాల, శ్రీశైలం, నాగార్జునసాగర్ ప్రాజెక్టులకు వరద వస్తున్నది. ప్రస్తుతం జూరాల ప్రాజెక్టుకు 80 వేల క్యూసెక్కులు వస్తుండగా.. 85 వేల క్యూసెక్కులను దిగువకు విడుదల చేస్తున్నారు. శ్రీశైలం ప్రాజెక్టుకు 99 వేల క్యూసెక్కుల ఇన్​ఫ్లో నమోదవుతుండగా.. 1.54 లక్షల క్యూసెక్కులను అవుట్ ఫ్లో ఉంది. ఇటు సాగర్​కు 1.2 లక్షల క్యూసెక్కుల వరద ప్రవాహం వస్తున్నది. కాగా, ఏపీ శ్రీశైలం నుంచి పోతిరెడ్డి పాడు ద్వారా నీటి విడుదలను 30 వేల క్యూసెక్కులకు పెంచింది. 

మోస్తరు వర్షాలు..  

శుక్రవారం రాష్ట్రవ్యాప్తంగా ముసురు ప్టటింది. అన్ని జిల్లాల్లోనూ మోస్తరు వర్షాలు కురిశాయి. అత్యధికంగా వరంగల్ జిల్లా నెక్కొండలో 5.6 సెంటీమీటర్ల వర్షపాతం నమోదైంది. చెన్నారావుపేటలో 5.1, మంచిర్యాల జిల్లా వెల్గనూరులో 5, భద్రాద్రి కొత్తగూడెం జిల్లా ఇల్లందు 4.9, టేకులపల్లిలో 4.8, వరంగల్​ జిల్లా గొర్రెకుంటలో 4.8, వనపర్తి జిల్లా కన్నయ్యపల్లిలో 4.5, హనుమకొండలో 4.5, ఖాజీపేటలో 4.5 సెంటీమీటర్ల చొప్పున వర్షపాతం నమోదైంది. హైదరాబాద్ లోనూ ముసురు పట్టింది.

 సాయంత్రం పలుచోట్ల తేలికపాటి వర్షం కురిసింది. మెట్టుగూడ, యూసుఫ్​గూడ, నాచారం లో 1.5 సెంటీమీటర్ల చొప్పున వర్షపాతం నమోదైంది. మిగతా ప్రాంతాల్లో తేలికపాటి వర్షం కురిసింది. కాగా, గత మూడు నాలుగు రోజులుగా కురుస్తున్న వర్షాలతో రాష్ట్రంలోని లోటు వర్షపాతం మొత్తం పూడింది. మొన్నటివరకు 30 శాతం వరకు లోటు ఉండగా.. అదంతా పూడింది. మరో నాలుగైదు రోజులు కూడా రాష్ట్రంలో మోస్తరు వర్షాలు కురిసే అవకాశం ఉందని ఐఎండీ వెల్లడించింది. 

ప్రాజెక్టుల్లో వరద.. కెపాసిటీ వివరాలు..

ప్రాజెక్ట్          సామర్థ్యం (టీఎంసీల్లో)    ప్రస్తుత నిల్వ (టీఎంసీల్లో)    ఇన్ ఫ్లో (క్యూసెక్కుల్లో)    అవుట్ ఫ్లో (క్యూసెక్కుల్లో)

ఆల్మట్టి                        129.72                                    102.65                                   34,000                                 42,500
నారాయణపూర్            37.64                                      35.12                                   42,500                                 43,488
జూరాల                           9.66                                        8.41                                   80,000                                 85,391 
తుంగభద్ర                  105.79                                      78.04                                   39,439                                 48,248
శ్రీశైలం                        215.81                                    202.04                                   99,122                              1,54,187
సాగర్                          312.05                                     280.12                                1,20,635                                   6,598
నిజాంసాగర్                   17.8                                         4.14                                        000                                       000
సింగూరు                       29.91                                      19.48                                     1,373                                       243
శ్రీరాం సాగర్                   80.5                                      21.71                                     5,208                                       622
ఎల్లంపల్లి                      20.18                                        9.48                                     5,285                                       452
మిడ్ మానేరు                 27.5                                         6.95                                        955                                       110
కడెం                                 4.7                                         3.63                                     4,004                                       866