ఆస్తిపన్ను కింద 1,189.30 కోట్లు వసూలు
గతేడాదికంటే తక్కువ
ఎర్లీబర్డ్, వన్టైం స్కీమ్ల ద్వారానే వసూలు
హైదరాబాద్,వెలుగు: ఈ ఏడాది బల్దియాకు ఇన్కం తగ్గిపోయింది. ప్రాపర్టీ ట్యాక్స్కింద మొత్తం 1189.30కోట్లు వచ్చింది. కరోనా కారణంగా బల్దియా ఆదాయం తగ్గడంతో ప్రభుత్వం ఆస్తిపన్ను రాబట్టేందుకు ఎర్లిబర్డ్, వన్ టైమ్ స్కీమ్లను ప్రవేశపెట్టింది. అయితే వీటి ద్వారా గతేడాది వచ్చిన రూ.1,472కోట్ల కంటే ఎక్కువ వసూలును టార్గెట్గాపెట్టుకుంది. కాగా వరదలు, ధరణి,ఎన్నికల కారణంగా అనుకున్నంత వసూలు కాలేదు. గత నెల 15వరకు ఉన్న వన్టైమ్ స్కీమ్కూడా నిలిచిపోయింది. ఇక కొత్త స్కీమ్ఏదైనా తెస్తేనే ఆదాయం పెరిగే అవకాశాలు కనిపిస్తున్నాయి. ఆరేళ్లుగా గ్రేటర్ జనాలకు స్కీమ్లు బాగా అలవాటు కావడంతో సాధారణ సమయంలో ఆస్తిపన్నులు చెల్లించేందుకు ఎవరూ ముందుకు రావడంలేదు. చెల్లించని వారు కూడా ఆఫర్ ఇచ్చినప్పుడు చూద్దాంలే అనుకుంటున్నారు. స్కీమ్స్ ఉన్పప్పుడు ప్రతి నెలా వంద కోట్లకు పైగా ఇన్కమ్ బల్దియాకు వస్తుంది. ఒక్కోనెలలో అత్యధికంగా రూ.200కోట్ల వరకు ఉంటుంది. ఏప్రిల్,మే ల్లో ప్రవేశపెట్టిన ఎర్లీబడ్ స్కీమ్ కింద580 కోట్లు వసూలైంది. ఆ తర్వాత ఆగస్టు నుంచి నవంబర్ 15వరకు వన్ టైమ్ స్కీమ్ అమలు చేయడంతో మరో 280 కోట్లు వచ్చాయి.
బిల్కలెక్టర్లకు వేరే డ్యూటీలతో..
ఆస్తి పన్ను వసూలులో బిల్ కలెక్టర్లదే కీలక పాత్ర. జీహెచ్ఎంసీలో ప్రస్తుతం 380 మంది ఉన్నారు. ఈ ఏడాది వచ్చిన 1,189.30కోట్లలో రూ.509కోట్లను వీరే వసూలు చేశారు. అయితే వీరు కరోనా డ్యూటీలు, ధరణి సర్వే, వరదలతో పాటు మొన్న జరిగిన గ్రేటర్ ఎన్నికల్లోనూ పూర్తిస్థాయిలో పనిచేశారు. దీంతో వారు పన్నుల వసూలుకు ఫీల్డ్లోకి వెళ్లలేకపోవడంతోనూ ఇన్కం పెరగలేదు. ఇక నవంబర్15వరకు వన్టైమ్ స్కీమ్ఉన్నా రూ.42కోట్లు వసూలవగా , ఈ నెల 17వరకు కేవలం 9 కోట్లు మాత్రమే వచ్చాయి.
