భద్రాచలం, వెలుగు: భద్రాచలం జీసీసీ డివిజన్లోని అశ్వారావుపేట మండలం నారాయణపురం, పాల్వంచ, దుమ్ముగూడెం మండలం నల్లబెల్లిల్లోని గోదాముల్లో ముష్టి గింజల గోల్మాల్ కేసులో ఇంటి దొంగలపై వేటు పడింది. రూ.కోటి విలువ చేసే ముష్టి గింజలను గోదాముల నుంచి మాయం చేసి అమ్మేసుకున్నారు. ఈ ఘటనలో పర్యవేక్షణ లోపం ఉందనే కారణంతో జీసీసీ డీఎం కుంజా వాణిని హైదరాబాద్ హెడ్ ఆఫీసుకు బదిలీ చేశారు. ఆమె స్థానంలో మార్కెటింగ్ విభాగంలో పని చేసే విజయ్కుమార్ను పోస్టింగ్ ఇచ్చారు. భద్రాచలం బ్రాంచ్ మేనేజర్ శంకర్పై సస్పెన్షన్ వేటు వేసి, ఆయన స్థానంలో మణుగూరు బీఎం దావీద్కు ఇన్చార్జిగా బాధ్యతలు అప్పగించారు. దమ్మపేట సేల్స్ మెన్ సేతూరామ్ను వరంగల్ జిల్లా నర్సంపేటకు బదిలీ చేశారు. దుమ్ముగూడెం మండలం నల్లబెల్లి సేల్స్ మెన్ వీరస్వామిని సస్పెండ్ చేశారు.
నారాయణపురం గోదామ్ ఇన్చార్జికృష్ణయ్యను గతంలోనే పోలీసులు అరెస్ట్ చేసి విచారణ చేయగా, ఆ సమయంలోనే సస్పెండ్ చేశారు. జీసీసీ ఆధ్వర్యంలో ఆదివాసీల నుంచి ఔషధాల తయారీలో ఉపయోగించే ముష్టి గింజలను కిలో రూ.45 చొప్పున కొనుగోలు చేసి గోదాముల్లో నిల్వ చేశారు. వీటిని క్వింటా రూ.6600 చొప్పున 3 వేల క్వింటాళ్లు జీసీసీ నుంచి కొనుగోలు చేసేందుకు ఓ వ్యాపారి టెండర్ ద్వారా అనుమతి పొందారు. అశ్వారావుపేట మండలం నారాయణపురం గోదాములో 897 క్వింటాళ్లు తక్కువగా ఉన్న విషయాన్ని గుర్తించి పోలీస్స్టేషన్తో పాటు జీసీసీ డీఎం కుంజా వాణి ఫిర్యాదు చేశారు. పాల్వంచ జీసీసీ గోదాములో 200 క్వింటాళ్లు మాయమయ్యాయి. దుమ్ముగూడెం మండలం నల్లబెల్లి గోదాములోనూ తేడా వచ్చింది. ఈ ఘటనపై విచారణ చేపట్టిన ఉన్నతాధికారులు బాధ్యులపై చర్యలు తీసుకున్నారు.
