హైదరాబాద్,వెలుగు: ప్రపంచంలోనే అత్యంత సమయపాలన (పంక్చువల్) కలిగిన విమానాశ్రయంగా జీఎంఆర్ హైదరాబాద్ అంతర్జాతీయ విమానాశ్రయం గుర్తింపు పొందింది. ఏవియేషన్ ఎనలిటికల్ సంస్థ సిరియమ్ ఇటీవల విడుదల చేసిన రిపోర్టు.. హైదరాబాద్ విమానాశ్రయం ఈ ఏడాది మార్చిలో 90.43శాతం ఆన్–టైమ్ పెర్ఫామెన్స్(ఓటీపీ)ను సాధించిందని వెల్లడించింది. ఈ నివేదికలో ప్రపంచంలోనే 90 శాతం మార్కును దాటిన ఏకైక విమానాశ్రయం హైదరాబాద్ ఎయిర్పోర్టు కావడం విశేషం. సిరియమ్ మార్చి నెలలో ప్రపంచవ్యాప్తంగా 50 లక్షలకుపైగా విమానాలను సమీక్షించింది.
హైదరాబాద్ విమానాశ్రయం 'గ్లోబల్ ఎయిర్పోర్ట్స్', 'లార్జ్ ఎయిర్పోర్ట్స్' విభాగాల్లో మొదటిస్థానంలో నిలిచింది. ఇది గత నవంబర్లో 88.44శాతం ఓటీపీతో 'లార్జ్ ఎయిర్పోర్ట్స్' విభాగంలో 4వ స్థానంలో నిలిచిందని విమానాశ్రయం సీఈఓ ప్రదీప్ పణికర్ చెప్పారు. ఈ ఘనతను సాధించడానికి కొత్త టెక్నాలజీలను, కొత్త విధానాలను అమలు చేశామని చెప్పారు. విమానాశ్రయ పనితీరును మరింత పెంచడం కోసం ప్రపంచ స్థాయి మౌలిక సదుపాయాలను నిర్మించామని అన్నారు. ఇంటిగ్రేటెడ్ సెంట్రలైజ్డ్ ఎయిర్పోర్ట్ ఆపరేషన్స్ కంట్రోల్ సెంటర్ (ఏఓసీసీ), ఎక్స్ప్రెస్ సెక్యూరిటీ చెక్-ఇన్, సెల్ఫ్ చెకిన్ కియోస్క్లు, ఈ–బోర్డింగ్, వీడియో అనలిటిక్స్ మొదలైనవి ఆన్ టైమ్ పెర్ఫామెన్స్ను (ఓటీపీ) పెంచాయని వివరించారు.
