- భారీ లీకేజీలతో నీటి సరఫరాకు బ్రేక్
- 45 ఎంజీడీల్లో 3 ఎంజీడీలు అవుట్
- బడ్జెట్లో నిధులివ్వని రాష్ట్ర సర్కార్
- కేంద్రం, రాష్ట్ర సహకారం, లోన్లతో పూర్తి చేసే ప్లాన్
హైదరాబాద్సిటీ, వెలుగు : నగరానికి తాగునీటిని అందిస్తున్న ప్రధాన జలాశయాల్లో ఒకటైన మంజీరాకు కొత్త పైప్లైన్ నిర్మాణంపై వాటర్బోర్డు అధికారులు సన్నాహాలు చేస్తున్నారు. ప్రస్తుతమున్న పైపు లైన్కు సమాంతరంగా కొత్త పైప్ లైన్ ను సాధ్యమైనంత తొందరగా వేయాలని అధికారులు నిర్ణయించారు. మొదట్లో ఈ ప్రాజెక్టు కు అవసరమైన రూ. 722 కోట్ల నిధులను రాష్ట్ర ప్రభుత్వమే ఇస్తుందని వాటర్బోర్డు ఆశతో ఉంది. అయితే, బడ్జెట్ లో కేటాయింపులు లేకపోవడంతో ఎలాగైనా ముందుకు తీసుకుపోవాలని భావిస్తున్నారు.
పగులుడు.. లీకేజీలు..
మంజీరా నుంచి రెండు దశల్లో నగరానికి నీటిని తరలిస్తుండగా, తరచూ పైప్లైన్పగిలిపోతుండడం, భారీ లీకేజీల వల్ల తరచూ నీటి సరఫరాలో అంతరాయం కలుగుతోంది. రిపేర్ల వల్ల ఒక్కోసారి 24గంటలు, మరోసారి 48 గంటల పాటు నీటి సరఫరాను నిలిపివేయాల్సి వస్తున్నది. అంతే కాకుండా నీటి వృథా కూడా ఎక్కువే అవుతున్నది. ఈ రిజర్వాయర్నుంచి రోజుకు 45 ఎంజీడీలు తరలిస్తుంటే లీకేజీలు, పైప్లైన్పగలడం వల్ల సిటీకి చేరేసరికి దాదాపు 3 ఎంజీడీలు వృథా అవుతోంది.
మంజీరా మొదటి దశను 60 ఏండ్ల క్రితం, రెండో దశ 35 ఏండ్ల క్రితం నిర్మించారు. ఇది సిమెంట్ పైప్ లైన్ కావడం వల్ల పాడైపోయి తరచూ పగిలిపోవడంమో, లీకేజీలు ఏర్పడడమో జరుగుతున్నది. దీంతో రిపేర్లకు రూ. లక్షలు వెచ్చించాల్సి వస్తున్నది. తాజాగా వాటర్బోర్డు పరిధి పెరిగి ఓఆర్ఆర్అవతలి వరకూ నీటి సరఫరా చేయాల్సిన బాధ్యత వచ్చి పడింది. రోజు రోజుకూ నీటి డిమాండ్పెరుగుతుండడంతో బోర్డుపై భారం పడుతోంది. ఈ క్రమంలో ఈ ప్రాజెక్టును చేపట్టడం ద్వారా నీటి వృథా తగ్గుతుందని భావిస్తున్నారు.
రూ.722 కోట్లతో ప్రాజెక్టు
మంజీరా పాత పైప్లైన్స్థానంలో దానికి సమాంతరంగా కొత్త పైప్లైన్ నిర్మాణం చేపట్టాలని వాటర్బోర్డు ప్రభుత్వానికి నివేదిక పంపింది. ప్రాజెక్టుకు ప్రభుత్వం కూడా గ్రీన్సిగ్నల్ఇచ్చింది. అయితే, నిధుల కోసం చాలాకాలంగా ఎదురుచూస్తుండగా బడ్జెట్లో కేటాయింపులు జరపలేదు. దీంతో ఎలాగైనా ఈ ప్రాజెక్టును ముందుకు తీసుకుపోవాలని అధికారులు ప్రయత్నాలు చేస్తున్నారు. ప్రస్తుతమున్న సిమెంట్పైపుల స్థానంలో కొత్తగా మైల్డ్ స్టీల్ (ఎంఎస్) పైప్ లైన్ నిర్మించాలని ప్రతిపాదనలు సిద్ధం చేశారు.
దీని కోసం అవసరమైన రూ.722 కోట్లను వివిధ మార్గాల ద్వారా సేకరించాలని చూస్తున్నారు. కేంద్ర ప్రభుత్వ అర్బన్ ఛాలెంజ్ ఫండ్ కింద రూ.180 కోట్లను, రాష్ట్ర ప్రభుత్వం నుంచి మరో రూ.180 కోట్లను తీసుకువచ్చేందుకు ప్రయత్నిస్తున్నాను. మిగిలిన రూ.362 కోట్లను లోన్తీసుకోవాలని అనుకుంటున్నారు. దీని కోసం త్వరలో ప్రాజెక్ట్ వివరాలను కేంద్ర పట్టణాభివృద్ధి శాఖకు పంపనున్నట్టు అధికారులు తెలిపారు. అక్కడి నుంచి గ్రీన్ సిగ్నల్వస్తే వెంటనే మంజీరా పైప్లైన్ ప్రాజెక్టును పట్టాలెక్కించే అవకాశం ఉంది.
