మెట్రో స్టేషన్లలో స్మార్ట్ లాకర్లు..బ్యాగులు, హెల్మెట్లు దాచుకోవచ్చు

• లాంఛనంగా సేవలు షురూ
• స్టేషన్లలోనే బ్యాగులు, హెల్మెట్లు దాచుకునే సదుపాయం
• ‘టక్కీట్’ సంస్థతో ఎల్అండ్​టీ మెట్రో జత
• ప్రస్తుతం 7 ప్రధాన స్టేషన్లలో సేవలు

హైదరాబాద్, వెలుగు: మెట్రోలో ప్రయాణించేటప్పుడు చేతిలో హెల్మెట్, భుజాన బ్యాగులు, ఇతర షాపింగ్ సంచులు మోయడం ప్రయాణికులకు పెద్ద తలనొప్పిగా ఉంటుంది. ఈ సమస్యకు చెక్ పెడుతూ హైదరాబాద్ మెట్రో రైల్ (ఎల్అండ్​టీ ఎంఆర్​హెచ్ఎల్), ‘టక్కీట్’ (టీయూసీకేఐటీ) సంస్థతో కలిసి సొల్యూషన్ తీసుకొచ్చింది. 

ఇకపై ప్రయాణికులు తమ సామానులను మెట్రో స్టేషన్లలోనే సురక్షితంగా దాచుకుని, హ్యాండ్స్ ఫ్రీగా సిటీలో చక్కర్లు కొట్టొచ్చు. ఉప్పల్ మెట్రో స్టేషన్‌‌‌‌‌‌‌‌ లో ఈ కొత్త సేవలను గురువారం ఘనంగా ప్రారంభించారు. ఈ సందర్భంగా టక్కీట్ వ్యవస్థాపకుడు రాజేష్ అమర్​లాల్ మాట్లాడుతూ.. అర్భన్ ట్రాన్స్ పోర్టులో ఇదో కీలక ముందడుగన్నారు. ప్రయాణికులకు ఎక్కడైతే స్టోరేజ్ అవసరమో, అక్కడే ఈ సదుపాయాన్ని కల్పిస్తున్నామని చెప్పారు. 

మరిన్ని వివరాలకు http://www.tuckit.in/ వెబ్‌‌‌‌‌‌‌‌సైట్‌‌‌‌‌‌‌‌ను సందర్శించవచ్చని ఆయన సూచించారు. ఈ సందర్భంగా ఎల్ అండ్ టీ మెట్రో ఎండీ, సీఈఓ కె.వి.బి. రెడ్డి మాట్లాడుతూ.. ప్రయాణికులకు రోజువారీ ప్రయాణాన్ని మరింత సులభతరం చేయడమే తమ లక్ష్యమన్నారు. 

ఏయే స్టేషన్లలో ఉందంటే?

ప్రస్తుతానికి రద్దీ ఎక్కువగా ఉండే 7 ప్రధాన మెట్రో స్టేషన్లలో ఈ స్మార్ట్ లాకర్లను అందుబాటులోకి తెచ్చారు. మియాపూర్, అమీర్​పేట, పంజాగుట్ట, ఎల్బీనగర్, ఉప్పల్, పరేడ్ గ్రౌండ్స్, హైటెక్ సిటీ మెట్రో స్టేషన్లలో ప్రస్తుతం ఈ సేవలు 
అందుబాటులో ఉన్నాయి.

చిటికెలో పని.. స్కాన్ అండ్ స్టోర్..

• ఈ స్మార్ట్ లాకర్ల వాడకం చాలా సులభమని నిర్వాహకులు చెబుతున్నారు. కేవలం 30 సెకన్లలోనే ప్రాసెస్ పూర్తవుతుంది.
• లాకర్ ప్యానెల్ మీద ఉన్న  క్యూఆర్ కోడ్​ను స్కాన్ చేయాలి.
• సామాను సైజును బట్టి లాకర్ పరిమాణాన్ని ఎంచుకోవాలి.
• ఎంతసేపు దాచుకుంటున్నారో టైం సెలెక్ట్ చేసుకుని డిజిటల్ పేమెంట్ చేయాలి.