- కట్టడి కోసం స్పెషల్ డ్రైవ్..
హైదరాబాద్ సిటీ, వెలుగు: తెల్ల రంగు కారు ఉంది కదా అని తెల్ల చొక్కా వేసుకొని సైరెన్ వేస్కొని రోడ్ల మీదికి వస్తే ఇక కుదరదు. మల్టీ టోన్లు, భయంగొల్పే సౌండ్లతో హారన్ మోగిస్తూ రోడ్లపై హంగామా చేస్తామంటే నడవదు. రోడ్లపైకి వచ్చామా? సైలెంట్గా వెళ్లామా? అన్నట్టే ఉండాలి. కాదూ కూడదు అంటే సిటీ ట్రాఫిక్ పోలీసులు చర్యలకు సిద్ధం అయ్యారు. పౌరులకు రోడ్డు భద్రత, ట్రాఫిక్ రూల్స్పై అవగాహనలో భాగంగా సైరన్లు, మల్టీ-టోన్డ్/మ్యూజికల్ హారన్ల వినియోగంపై పోలీసులు స్పెషల్ డ్రైవ్ కొనసాగిస్తున్నారు.
వీటిపై నిషేధం ఉన్నప్పటికీ, చాలా మంది వాహనదారులు వినియోగిస్తూనే ఉన్నారు. దీంతో ప్రజలు అసౌకర్యానికి గురవుతున్నారు. అందుకే ఈ హారన్ల కట్టడికి ట్రాఫిక్ పోలీసులు పది రోజుల పాటు స్పెషల్ డ్రైవ్ నిర్వహించారు. సైరన్లు వాడినందుకు 590 కేసులు, మల్టీ -టోన్డ్/మ్యూజికల్ హారన్లు వాడినందుకు 397 కేసులు బుక్ చేశారు. ఈ ప్రత్యేక డ్రైవ్ ఇకముందు కూడా కొనసాగనుందని ట్రాఫిక్ జాయింట్ సీపీ జోయల్ డేవిస్ తెలిపారు. మల్టీ-టోన్డ్ మ్యూజికల్ హారన్లను స్వచ్ఛందంగా తొలగించి, ట్రాఫిక్ నిబంధనలను పాటించాలని వాహనదారులకు సూచించారు.
