కొన్నిసార్లు పనిలో పడిపోయి ముఖ్యమైన విషయాలను కూడా మర్చిపోతుంటాం. బర్త్డే, యానివర్సరీ డేట్లు, కొత్తగా ఏదైనా చేయాలనుకునే టాస్క్లు వంటివి ఎంత గుర్తుపెట్టుకోవాలనుకున్నా అప్పుడప్పుడు మిస్ అవుతుంటాం. ఈ సమస్యకు సొల్యూషన్ కావాలంటే వాట్సాప్లోని ఈ ఫీచర్ వాడాలి. అదే వాట్సాప్ షెడ్యూలింగ్. వర్క్కి సంబంధించిన మెసేజ్లు ఒక టైంకి పంపాలంటే అనుకున్న సమయానికి అలారం పెట్టుకోవాల్సిన పనిలేదు.
దానికి బదులు టైం షెడ్యూల్ ఆప్షన్ ద్వారా మెసేజ్ పంపొచ్చు. అయితే వాట్సాప్ మెసేజ్లు షెడ్యూల్ చేయడానికి మరో యాప్ అవసరం అవుతుంది. అదే SKEDit. ఈ యాప్ ఉపయోగించి వాట్సాప్లోనేకాదు, ఇన్స్టాగ్రామ్, టెలిగ్రామ్లలో కూడా మెసేజ్లను షెడ్యూల్ చేయొచ్చు. అదెలాగంటే.. యాప్ని డౌన్లోడ్ చేసి, లాగిన్ అవ్వాలి. మెయిన్ స్క్రీన్పై కనిపించే వాట్సాప్ ఐకాన్ మీద క్లిక్ చేయాలి. కుడివైపు ఉన్న ప్లస్ సింబల్ని ట్యాప్ చేశాక వాట్సాప్ను సెలక్ట్ చేయాలి.
ఆపై ప్రాసెస్ పూర్తి చేసి, మళ్లీ ప్లస్ సింబల్ ట్యాప్ చేస్తే కాంటాక్ట్ నెంబర్ ఎంచుకోవచ్చు. ఆ తర్వాత మెసేజ్ బాక్స్లో మెసేజ్ టైప్ చేసి డేట్, టైం సెలక్ట్ చేయాలి. చివరిగా షెడ్యూల్ ఆప్షన్ క్లిక్ చేస్తే సరి.
ఐదు హ్యాష్ ట్యాగ్లు మాత్రమే!
ఇన్స్టాగ్రామ్లో పోస్ట్ చేసే రీల్ లేదా ఫొటోలకు దాదాపు 30 వరకు హ్యాష్ట్యాగ్లు పెట్టుకునే వీలు ఉండేది. కానీ, ఇక నుంచి మ్యాగ్జిమమ్ ఐదు హ్యాష్ ట్యాగ్లను మాత్రమే ఉపయోగించాలి అని ప్రకటించింది కంపెనీ. హ్యాష్ట్యాగ్ల సంఖ్య తగ్గినప్పటికీ కచ్చితమైన, రిలేటబుల్ హ్యాష్ట్యాగ్లను వాడడం వల్ల పోస్ట్ పని తీరుతోపాటు యూజర్లకు మెరుగైన ఎక్స్పీరియెన్స్ ఇస్తుందని గుర్తించినట్టు ఇన్స్టాగ్రామ్ పేర్కొంది. కాబట్టి క్రియేటర్లు ఒక పోస్ట్ చేసేటప్పుడు హ్యాష్ ట్యాగ్ను తెలివిగా ఎంచుకోవాలని ఎంకరేజ్ చేస్తోంది. రీల్స్, ఎక్స్ప్లోర్ వంటి హ్యాష్ ట్యాగ్లు నిజానికి ఎక్స్ప్లోర్ ఫీడ్ను అందుకోలేవు. పైగా అవసరమైన వాళ్లతోపాటు కంటెంట్ అందరికీ చేరుతుంది.
ఏఐ బేస్డ్ వాయిస్ మెయిల్
ట్రూకాలర్ మనదేశంలోని ఆండ్రాయిడ్ యూజర్ల కోసం ఫ్రీ ఏఐ బేస్డ్ వాయిస్ మెయిల్ ఫీచర్ను లాంచ్ చేసింది. స్పామ్ కాల్స్ నుంచి రక్షించడమే దీని లక్ష్యం. ఈ ఫీచర్ ప్రైవసీ, యూజర్ ఫ్రెండ్లీ ఎక్స్పీరియెన్స్ను అందిస్తుంది. ఈ వాయిస్ మెయిల్ మెసేజ్లు నేరుగా యూజర్ల ఫోన్లలో సేవ్ అవుతాయి. తద్వారా నెంబర్కు కాల్ చేయడం లేదా పిన్ను గుర్తుంచుకోవాల్సిన అవసరం లేదు. ఈ కొత్త వాయిస్ మెయిల్ ఫీచర్ను యూజర్లు స్పామ్ లేదా అన్నోన్ కాల్స్ను ఎదుర్కోవడంలో సాయపడేందుకు డిజైన్ చేశారు.
యూజర్లు ఇప్పుడు తెలియని కాల్స్కు ఆన్సర్ ఇవ్వడానికి బదులు వాయిస్ మెయిల్కు ఫార్వర్డ్ చేయొచ్చు. ఈ వాయిస్ మెయిల్ను సెటప్ చేయడానికి కేవలం కొన్ని సెకన్లు మాత్రమే పడుతుంది. ఈ ఫీచర్ ఫ్రీగా అన్లిమిటెడ్ వాయిస్ మెయిల్ స్టోరేజీని అందిస్తుంది. దీంతోపాటు వాయిస్ మెయిల్ మెసేజ్లు నేరుగా డివైజ్లో రికార్డ్ కావడంతోపాటు స్టోర్ అవుతాయి. అలాగే ఆటోమెటిక్ స్పామ్ ప్రొటెక్షన్, స్మార్ట్ కాల్ కేటగిరైజేషన్, మెసేజ్లను వేగంగా లేదా నెమ్మదిగా ప్లే చేయడానికి వాడే ప్లేబ్యాక్ స్పీడ్ కంట్రోల్, వాయిస్ మెయిల్ మెసేజ్లను సెకన్లలో టెక్స్ట్గా మార్చే ఏఐ బేస్డ్ ట్రాన్స్స్క్రిప్షన్ వంటివి ఉన్నాయి.
మరో ముఖ్యమైన స్పెషాలిటీ ఏంటంటే.. తెలుగు, హిందీ, బెంగాలీ, మరాఠీ, తమిళం, కన్నడ, మలయాళం, గుజరాతీ, నేపాలీ, పంజాబీ, సంస్కృతం, ఉర్దూతో సహా 12 భారతీయ భాషల్లో వాయిస్ మెయిల్ ట్రాన్స్స్క్రిప్షన్కు మద్దతు ఇస్తుంది. ఈ ఫీచర్ వినడానికి ఇష్టపడనప్పుడు యూజర్లు మెసేజ్లను సైలెంట్గా చదవడానికి ఉపయోగపడుతుంది.
