- పోలీసులకు ఐసీడీఎస్ సూపర్వైజర్ ఫిర్యాదు
- బాల్యవివాహం ఆపడానికి వెళితే ఫోన్ లోవార్నింగ్ ఇచ్చారు
- ఆధారాలు ఉన్నాయా అని పోలీసులు అడిగారని ఆరోపణ
యాదాద్రి, వెలుగు: బాల్య వివాహం ఆపేందుకు ప్రయత్నించిన తనపై ఆలేరు ఎమ్మెల్యే గొంగిడి సునీత భర్త మహేందర్రెడ్డి బెదిరింపులకు దిగారని ఐసీడీఎస్ సూపర్వైజర్ సూర్యకళ యాదాద్రి పోలీసులకు ఫిర్యాదు చేశారు. ఆదివారం ఆలేరు పట్టణంలో బాల్య వివాహం జరుగుతోందని ఆలేరు ఐసీడీఎస్ సీడీపీవో చంద్రకళకు ఫిర్యాదు అందింది. ఆ వివాహం ఆపాలని సీడీపీవో ఆదేశించడంతో సూపర్వైజర్ సూర్యకళ పెళ్లి జరుగుతున్న చోటుకు వెళ్లారు. పెళ్లిని అడ్డుకుని ఇరు పక్షాలకు కౌన్సెలింగ్ ఇచ్చారు. ఆ టైమ్లో ముస్తఫా అనే వ్యక్తి నీ అంతు చూస్తానని సూర్యకళను బెదిరించాడు. ఆ తర్వాత కొద్దిసేపటికే తనకు ఫోన్వచ్చింది. తాను ఎమ్మెల్యే భర్త మహేందర్రెడ్డి అని పరిచయం చేసుకున్న ఆ వ్యక్తి.. పెళ్లిపై పోలీసు ఉన్నతాధికారులతో మాట్లాడానని, ఈ విషయంలో జోక్యం చేసుకోవద్దని చెప్పారని సూర్యకళ చెప్పారు.
తన డ్యూటీ తాను చేస్తున్నానంటూ చెప్పినా.. అవతలి నుంచి హెచ్చరికలు ఆగలేదన్నారు. దీంతో తన విధులను ఎమ్మెల్యే భర్త మహేందర్రెడ్డి అడ్డుకుంటున్నారని ఆమె పోలీసులకు ఫిర్యాదు చేశారు. ఈ సమయంలో ఎమ్మెల్యే భర్త ఫోన్ చేసినట్టు ఆధారాలున్నాయా? లేకుంటే ఎలా ఫిర్యాదు చేస్తారంటూ పోలీసులు తనను ప్రశ్నించారని సూర్యకళ చెప్పారు. ఉన్నతాధికారుల నుంచి అనుమతి వస్తేనే కేసు నమోదు చేస్తామని చెప్పారని, మధ్యాహ్నం ఫిర్యాదు చేసినా.. సాయంత్రం వరకూ ఎఫ్ఐఆర్నమోదు చేయలేదని ఆరోపించారు. మహిళా, శిశు సంక్షేమ శాఖలో పని చేస్తున్న తమకే బెదిరింపులు వస్తుంటే మామూలు మహిళల పరిస్థితి ఏంటని సూర్యకళ ప్రశ్నించారు. ఎమ్మెల్యే భర్తపై ఫిర్యాదు చేయడంతో పెద్దవాళ్లతో ఎందుకు పెట్టుకున్నావని తమ డిపార్ట్మెంట్కు చెందిన కొందరు భయపెడుతున్నారని చెప్పారు.
