హైదరాబాద్, వెలుగు: రాష్ట్రంలో రెండేండ్ల నుంచి ఫీజు రీయింబర్స్ మెంట్, స్కాలర్ షిప్లు ఇవ్వడం లేదని, కాలేజీలు ఎలా నడపాలని కేజీ టూ పీజీ ప్రైవేటు విద్యాసంస్థల మేనేజ్మెంట్ల సంఘం రాష్ట్ర కన్వీనర్ గౌరీసతీశ్ ప్రభుత్వాన్ని ప్రశ్నించారు. స్టూడెంట్ల నుంచి ఫీజులు వసూలు చేయకుండా, సర్కారు రీయింబర్స్ మెంట్ ఇవ్వకుండా నెలనెలా లెక్చరర్లకు, సిబ్బందికి జీతాలు చెల్లించడం కష్టంగా ఉందనీ చెప్పారు. ఈ నెలాఖరులోగా ప్రభుత్వం రీయింబర్స్ మెంట్ బకాయిలు రిలీజ్ చేయకపోతే, తమ కార్యచరణ ప్రకటిస్తామని స్పష్టం చేశారు. గురువారం టీపీజేఎంఏ ఆఫీసులో ఆయన ప్రైవేటు విద్యాసంస్థల సంఘం ప్రతినిధులు ఇంద్రసేనారెడ్డి, ఎస్ఎన్రెడ్డి తదితరులతో కలిసి మీడియాతో మాట్లాడారు. రాష్ట్రంలోని ఇంటర్, డిగ్రీ, పీజీ స్టూడెంట్లు 9 లక్షలకు పైగా ఉన్నారనీ, వారికి ఏటా రూ.226 కోట్లు అవసరమని చెప్పారు. 2021–22 కు సంబంధించి గతేడాది అక్టోబర్లోనే బీఆర్వోలు, టోకెన్లు వచ్చిన రూ.86.55 కోట్లు పెండింగ్లో ఉన్నాయనీ చెప్పారు. ఈ విద్యాసంవత్సరం ఒక్క పైసా రిలీజ్ కాలేదన్నారు. నిరుద్యోగ గ్రాడ్యుయేట్లు పెట్టుకున్న కాలేజీల బకాయిలను వెంటనే రిలీజ్ చేయాలని కోరారు. తెలంగాణ వచ్చిన ఎనిమిదేండ్లలో మేనేజ్మెంట్లు కట్టే ఇంటర్ అఫిలియేషన్, ఇన్స్పెక్షన్ ఇతర ఫీజులు పలుమార్లు పెంచారనీ, కానీ స్కాలర్ షిప్లు మాత్రం పెంచడం లేదన్నారు. ప్రస్తుతమున్న రూ.1940 ఫీజును ఐదువేలకు పెంచాలనీ, డిగ్రీ ఫీజులు 20వేల నుంచి 30వేల వరకూ పెంచాలని డిమాండ్ చేశారు.
