ఈ సీజన్లో జలుబు, గొంతు నొప్పితో పాటు జీర్ణ సమస్యలు కూడా కామన్. మరి వీటికి చెక్ పెట్టాలంటే... వెచ్చగా ఏదైనా గొంతులోకి పోవాలి. అప్పుడుగానీ, వాటి నుంచి రిలాక్సేషన్ దొరకదు. అలాంటి రెసిపీల్లో టాప్గా నిలిచేది సూప్. మరింకెందుకు ఆలస్యం.. ఇష్టపడే చికెన్, స్వీట్ కార్న్, క్యారెట్లతో ఘాటుగా, వేడిగా సూప్ చేసుకుని తాగితే చలికాలాన్ని ఎంజాయ్ చేయొచ్చు.
క్యారెట్ - కొత్తిమీర
కావాల్సినవి :
క్యారెట్లు – అర కిలో
బిర్యానీ ఆకులు – రెండు
వెన్న – రెండు టేబుల్ స్పూన్లు
ఉల్లిగడ్డ – ఒకటి, మిరియాలు – కొన్ని, వెల్లుల్లి తరుగు – ఒక టేబుల్ స్పూన్
కొత్తిమీర – ఒక టేబుల్ స్పూన్
ఉప్పు, నీళ్లు – సరిపడా
మిరియాల పొడి – అర టీస్పూన్
తయారీ :ఒక పాన్లో వెన్న వేడి చేసి, బిర్యానీ ఆకులు, మిరియాలు, ఉల్లిగడ్డ, వెల్లుల్లి తరుగు వేగించాలి. క్యారెట్ ముక్కలు, కొత్తిమీర వేశాక కాసేపు వేగించాలి. తర్వాత నీళ్లు పోసి, మూతపెట్టాలి. ఉడికాక మెత్తగా రుబ్బాలి. మిరియాల పొడి, కొత్తిమీర చల్లాలి.
కావాల్సినవి : స్వీట్కార్న్ – ముప్పావు కప్పు, నీళ్లు – సరిపడా, నూనె, సోయాసాస్ – ఒకటిన్నర టేబుల్ స్పూన్ చొప్పున, అల్లం, వెల్లుల్లి తరుగు– ఒక్కో టీస్పూన్, ఉల్లిగడ్డ, క్యారెట్, క్యాబేజీ, బీన్స్ తరుగు – ఒక్కోటి రెండు టేబుల్ స్పూన్ల చొప్పున, మిరియాల పొడి, చక్కెర – చిటికెడు చొప్పున, వెనిగర్, కార్న్ ఫ్లోర్ – ఒక్కోటి రెండు టీస్పూన్లు, ఉప్పు – సరిపడా, ఉల్లికాడలు, నిమ్మరసం– కొంచెం
తయారీ : పాన్లో నీళ్లుపోసి, స్వీట్కార్న్ ఉడికించి, వడకట్టాలి. తర్వాత వాటిని మిక్సీ జార్లో వేసి, చల్లటి నీళ్లు పోసి గ్రైండ్ చేయాలి. ఆ మిశ్రమాన్ని కూడా వడకట్టాలి. పాన్లో నూనె వేడి చేసి, అల్లం, వెల్లుల్లి తురుము, ఉల్లిగడ్డ తరుగు వేగించాలి. అందులో క్యారెట్, క్యాబేజీ, బీన్స్ తరుగు వేగించాలి. తర్వాత స్వీట్కార్న్ మిశ్రమం కలపాలి. కాసేపు ఉడికాక, నీళ్లు పోయాలి. సోయాసాస్, మిరియాల పొడి, వెనిగర్, ఉప్పు కలపాలి. కార్న్ఫ్లోర్ని నీళ్లలో కలిపి అందులో పోయాలి. ఉల్లికాడల తరుగు, నిమ్మరసం కలపాలి.
చికెన్
కావాల్సినవి :
చికెన్ – అర కిలో, నూనె – ఒక టేబుల్ స్పూన్
వెల్లుల్లి తరుగు – అర టీస్పూన్, నీళ్లు, ఉప్పు – సరిపడా, పచ్చిమిర్చి – ఒకటి, చక్కెర – అర టీస్పూన్, చికెన్ సూప్ పొడి – ఒక టీస్పూన్ (షాపుల్లో దొరుకుతుంది),
మిరియాల పొడి – ఒక్కో టీస్పూన్ చొప్పున, వెనిగర్, రెడ్ చిల్లీ సాస్, సోయా సాస్ – ఒక్కోటి రెండు టీస్పూన్ల చొప్పున, టొమాటో కెచెప్ – పావుకప్పు, క్యారెట్ – ఒకటి, క్యాబేజీ తరుగు – ఒక కప్పు, కార్న్ఫ్లోర్, నిమ్మరసం – ఒక్కో టేబుల్ స్పూన్ చొప్పున
కోడిగుడ్డు – ఒకటి, ఉల్లికాడలు – కొన్ని
తయారీ :
ఒక పాన్లో నూనె వేడి చేసి, వెల్లుల్లి తరుగు వేసి వేగించాలి. అందులో చికెన్ వేసి రంగు మారే వరకు వేగించాలి. తర్వాత నీళ్లు పోసి, పచ్చిమిర్చి తురుము, ఉప్పు, చక్కెర, చికెన్ బ్రాత్ పొడి, మిరియాల పొడి, వెనిగర్, సోయా సాస్, టొమాటో కెచెప్, రెడ్ చిల్లీ సాస్ వేసి కలిసి, మూతపెట్టి పావుగంటసేపు ఉడికించాలి. ఆ తర్వాత సన్నగా తరిగిన క్యారెట్ ముక్కలు, క్యాబేజీ తురుము వేసి కలపాలి. మూత పెట్టి మరో ఐదు నిమిషాలు ఉడికించాలి. కొన్ని నీళ్లలో కార్న్ఫ్లోర్ కలిపి, ఆ నీళ్లను పోయాలి. కోడిగుడ్డు సొన గిలక్కొట్టి వేయాలి. తర్వాత నిమ్మరసం, ఉల్లికాడలు వేసి కలపాలి.
