- రాత్రి టెంపరేచర్లు కొంత పెరిగే అవకాశం
- నెల రోజులుగా గ్యాప్ లేకుండా చలిగాలులు
- జనవరి రెండో వారంలో అకాల వర్షాలకు చాన్స్
హైదరాబాద్, వెలుగు: ఈ నెలాఖరుతో కోల్డ్వేవ్కు ఎండ్కార్డు పడనున్నది. ఇప్పటిదాకా గజగజా వణికించిన చలి ఇక తగ్గుముఖం పట్టనున్నదని వెదర్ఆఫీసర్లు వెల్లడించారు. ఈ నెల మొదలు.. ఇప్పటిదాకా చలి తీవ్రత ఓ రేంజ్లో ఉన్నది. గ్యాప్ లేకుండా ప్రతిరోజూ చలిగాలులు వీచాయి.
ప్రతిరోజూ నైట్ టెంపరేచర్లు సింగిల్ డిజిట్లోనే నమోదయ్యాయి. ఎప్పుడు లేనంతగా ఈసారి చలి తీవ్రత ఎక్కువగా ఉండడంతో జనాలు తీవ్ర ఇబ్బందులు పడ్డారు. కాగా, జనవరి 1 నుంచి రాత్రి టెంపరేచర్లు కొంత పెరిగే అవకాశం ఉందని వాతావరణ శాఖ అధికారులు తెలిపారు. మరోవైపు కోల్డ్ వేవ్ ముగిసినా.. చలి మాత్రం కొనసాగుతుందని చెబుతున్నారు.
జనవరి తొలివారం చివర లేదంటే రెండో వారంలో ఉపరితల ఆవర్తనం ఏర్పడే అవకాశం ఉందని, దాని ప్రభావంతో అకాల వర్షాలు కురిసే అవకాశం ఉంటుందని ఐఎండీ వీక్లీ బులెటిన్లో వెల్లడించింది.
ఇటు, కోల్డ్ వేవ్ అలర్ట్స్నూ క్రమంగా తగ్గిస్తున్నది. ఈ 4 రోజులపాటు కొన్ని జిల్లాల్లోనే చలి ప్రభావం ఉంటుందని పేర్కొన్నది. మరోవైపు జిల్లాల్లోనూ చలి తీవ్రత కాస్తంత తగ్గుముఖం పట్టింది. సింగిల్ డిజిట్ టెంపరేచర్ నమోదైన జిల్లాలు ఆరుకు తగ్గాయి. కుమ్రంభీం ఆసిఫాబాద్ జిల్లా సిర్పూర్లో అత్యల్పంగా 7.4 డిగ్రీల నైట్ టెంపరేచర్ నమోదైంది.
సంగారెడ్డి జిల్లా కోహిర్లో 7.6 డిగ్రీలు, ఆదిలాబాద్జిల్లా అర్లి (టీ)లో 8.8, రంగారెడ్డి జిల్లా రెడ్డిపల్లిలో 9.2, సిద్దిపేట జిల్లా పోతారెడ్డిపేటలో 9.4, కామారెడ్డి జిల్లా రామలక్ష్మణపల్లిలో 9.5 డిగ్రీల చొప్పున నైట్టెంపరేచర్లు నమోదయ్యాయి. నిర్మల్ జిల్లా పెంబిలో 10 డిగ్రీలుగా రికార్డయింది. 11 జిల్లాల్లో 10.1 నుంచి 10.9 మధ్య నైట్ టెంపరేచర్లు నమోదుకాగా.. 10 జిల్లాల్లో 11 నుంచి 11.6 మధ్య, 2 జిల్లాల్లో 12 డిగ్రీలు, మరో 3 జిల్లాల్లో 13 డిగ్రీల రేంజ్లో రాత్రి ఉష్ణోగ్రతలు నమోదయ్యాయి.
సిటీలోనూ తగ్గుముఖం
హైదరాబాద్ సిటీలోనూ రాత్రి ఉష్ణోగ్రతలు క్రమంగా తగ్గుముఖం పడుతున్నాయి. శివారు ప్రాంతాలు, చెట్లు (అటవీ సంపద) ఎక్కువ ఉన్న ప్రాంతాల్లో మాత్రం చలి ప్రభావం కనిపిస్తున్నది. యూనివర్సిటీ ఆఫ్ హైదరాబాద్ పరిధిలో అత్యల్పంగా 9.9 డిగ్రీల ఉష్ణోగ్రత రికార్డయింది.
మౌలాలిలో 10.7, అల్వాల్ పరిధిలోని టెలికం కాలనీలో 10.8, రాజేంద్రనగర్లో 11.1, మచ్చబొల్లారంలో 11.1, గచ్చిబౌలిలో 11.2 డిగ్రీల మేర ఉష్ణోగ్రతలు నమోదయ్యాయి. రాబోయే రోజుల్లో చలి ప్రభావం మరింత తగ్గుతుందని అధికారులు చెబుతున్నారు.
