- అనుకూలంగా 99 ఓట్లు.. వ్యతిరేకంగా 84 ఓట్లు
- రాజ్యసభలో మూడోసారికి మోడీ సర్కారుకు విక్టరీ
- నేడో రేపో రాష్ట్రపతి సంతకంతో చట్ట రూపంలోకి..
- ఇన్స్టంట్ ట్రిపుల్ తలాక్కు మూడేండ్లు జైలు శిక్ష
న్యూఢిల్లీ:ఇక నుంచి ఇన్స్టంట్ట్రిపుల్ తలాక్ నిషేధం. దాన్ని ఉల్లంఘించే భర్తలకు మూడేండ్ల జైలు శిక్ష తప్పదు. ‘ముస్లిం ఉమెన్(ప్రొటెక్షన్ ఆఫ్ రైట్స్ ఆన్ మ్యారేజ్) బిల్లు–2019’కు రాజ్యసభ ఆమోదం తెలిపింది. ఇప్పటికే రెండు సార్లు రాజ్యసభలోకి వచ్చి వీగిపోయిన ఈ బిల్లు.. గట్టెక్కుతుందా లేదా అన్న ఉత్కంఠ నడుమ ఎట్టకేలకు పాస్ అయింది. గత వారం లోక్సభ కూడా ఓకే చెప్పింది. ఉభయ సభల ఆమోదం లభించడంతో.. నేడో రేపో రాష్ట్రపతి రామ్నాథ్ కోవింద్ కూడా సంతకం చేయనున్నారు. ఆ ప్రక్రియ ముగియగానే చట్టరూపంలోకి రానుంది. మోడీ సర్కార్ ప్రతిష్టాత్మకంగా తీసుకున్న ఈ బిల్లును రాజ్యసభలో ఆమోదింపజేయడంలోనూ వ్యూహాత్మకంగా వ్యవహరించింది. మంగళవారం రాజ్యసభలో బిల్లును కేంద్ర న్యాయశాఖ మంత్రి రవిశంకర్ ప్రసాద్ ప్రవేశపెట్టారు.
సుమారు నాలుగున్నర గంటలపాటు బిల్లుపై సభలో చర్చ జరిగింది. ట్రిపుల్తలాక్ నిషేధానికి తాము వ్యతిరేకం కాదని, అయితే బిల్లులో లోపాలు ఉన్నాయని కాంగ్రెస్ రాజ్యసభ సభ పక్ష నేత గులాం నబీ ఆజాద్తో పాటు పలువురు ప్రతిపక్ష సభ్యులు తప్పుబట్టారు. సివిల్ నేరాన్ని క్రిమినల్ నేరంగా పరిగణిస్తూ బిల్లు రూపొందించారని, ట్రిపుల్ తలాక్ చెప్పే భర్తకు మూడేండ్ల జైలు శిక్ష విధించే క్లాజ్ను తొలగించాలని, బిల్లును సెలెక్ట్ కమిటీకి పంపించాలని పట్టుబట్టారు. ఈ అంశంపై ఓటింగ్కు డిమాండ్ చేశారు. సెలెక్ట్ కమిటీకి పంపాలన్న అంశంపై ఓటింగ్ నిర్వహించగా.. 100 మంది వ్యతిరేకంగా, 84 మంది అనుకూలంగా ఓటు వేయడంతో ఆ ప్రతిపాదన వీగిపోయింది. పలు సవరణలపైనా ఓటింగ్ నిర్వహించినప్పటికీ సభలో మద్దతు లభించలేదు. రాత్రి 7 గంటల ప్రాంతంలో ‘ముస్లిం ఉమెన్(ప్రొటెక్షన్ ఆఫ్ రైట్స్ ఆన్ మ్యారేజ్) బిల్లు–2019’ పై స్లిప్పుల పద్ధతిలో ఓటింగ్కు రాజ్యసభ చైర్మన్ వెంకయ్యనాయుడు అనుమతిచ్చారు. సభలో సభ్యుల దృష్ట్యా ఎన్డీయే కన్నా ప్రతిపక్షాలు, తటస్థ పార్టీల బలమే ఎక్కువ. ఈ పరిణామాల నేపథ్యంలో బిల్లు పాసవడం కష్టమని అందరూ భావించినప్పటికీ.. కొన్ని పార్టీలు సభ నుంచి వాకౌట్ చేయడం, మరికొన్ని పార్టీలు సభకు రాకుండా దూరం పాటించడం కలిసి వచ్చింది. బిల్లును తీవ్రంగా వ్యతిరేకిస్తున్న కాంగ్రెస్, టీఎంసీ, ఎన్సీపీ, ఎస్పీ పార్టీలకు చెందిన సభ్యుల్లో కొందరు సభకు డుమ్మా కొట్టడం ప్లస్ అయింది. బిల్లును వ్యతిరేకిస్తున్న ఎన్డీయే కూటమిలోని జేడీయూ, అన్నాడీఎంకే ఓటింగ్కు దూరంగా ఉన్నాయి. తటస్థ పార్టీ బీజేడీ బిల్లుకు మద్దతు ప్రకటించింది.
రాజ్యసభలో మొత్తం సభ్యుల సంఖ్య 241 కాగా.. ఓటింగ్ సమయంలో 183 మంది మాత్రమే హాజరయ్యారు. బిల్లుకు అనుకూలంగా 99 ఓట్లు పడగా.. వ్యతిరేకంగా 84 ఓట్లు పడ్డాయి. దీంతో బిల్లు ఆమోదం పొందినట్లు చైర్మన్ వెంకయ్యనాయుడు ప్రకటించారు. ఈ నెల 25న లోక్సభలో 303: 82 ఓట్ల తేడాతో బిల్లుకు ఆమోదం లభించిన విషయం తెలిసిందే. మోడీ ఫస్ట్ టర్మ్ పాలనలో ఈ బిల్లుకు లోక్సభలో రెండు సార్లు ఆమోదం లభించినప్పటికీ.. రాజ్యసభలో ఆమోదం లభించకపోవడంతో దీనిపై 2018 సెప్టెంబర్లో కేంద్రం ఆర్డినెన్స్ను తీసుకువచ్చింది. ఆర్డినెన్స్కు గడువు ముగియనుండటంతో ఉభయ సభల ఆమోదం తప్పనిసరైంది. ఇప్పుడు రెండు సభల్లోనూ ఆమోదం లభించడంతో మోడీ సర్కార్ విజయం సాధించినట్లయింది. ఇక బిల్లును రాష్ట్రపతి వద్దకు పంపనున్నారు. ఆయన ఆమోదం తెలిపితే ఆర్డినెన్స్ స్థానంలో చట్టం వస్తుంది.
క్రిమినల్ నేరమే
ముస్లిం వర్గాల్లో అకారణంగా మూడు సార్లు తలాక్ చెప్పి భార్యలకు భర్తలు విడాకులు ఇస్తున్నట్లు చాలా కాలం నుంచి మహిళా సంఘాలు ఆరోపిస్తున్నాయి. దీనిపై ఎన్నో కేసులు సుప్రీం కోర్టు దృష్టికి వచ్చాయి. 2017లో స్పందించిన సుప్రీంకోర్టు.. ఇన్స్టంట్ ట్రిపుల్ తలాక్ రాజ్యాంగ విరుద్ధమని తీర్పునిచ్చింది. చట్టం తేవాలని కేంద్రానికి సూచించింది. నోటి మాటగా.. టెక్స్ట్ మెజేస్ రూపంలో, ఈ మెయిల్ రూపంలో భర్తలు మూడు సార్లు తలాక్ అని చెప్పి భార్యలకు విడాకులు ఇస్తున్నారని, దీని వల్ల ముస్లిం మహిళలకు రక్షణ లేకుండాపోతోందని మహిళా సంఘాలు అంటున్నాయి. ఈ క్రమంలో కేంద్రం ‘ముస్లిం ఉమెన్(ప్రొటెక్షన్ ఆఫ్ రైట్స్ ఆన్ మ్యారేజ్) బిల్లు’ను రూపొందించింది. బిల్లు ప్రకారం.. ట్రిపుల్ తలాక్ను క్రిమినల్ నేరంగా పరిగణిస్తారు. దీన్ని ఉల్లంఘిస్తే భర్తలకు మూడేండ్ల జైలు శిక్ష విధించనున్నారు. భార్య ఫిర్యాదు మేరకు దీన్ని అమలు చేస్తారు.
దేశమంతా సంతోషిస్తోంది
ఎట్టకేలకు మధ్య యుగాల నాటి ప్రాక్టీస్ చెత్తబుట్ట పాలైంది. ముస్లిం మహిళల పట్ల జరిగిన చారిత్రక తప్పిదాన్ని ఈ రోజు పార్లమెంట్సరిదిద్దింది. ఇది లింగ సమానత్వానికి, తద్వారా సమాజంలో సమానత్వం సాధించేందుకు మార్గం చూపుతుంది. ఈ విజయంతో దేశమంతా సంతోషిస్తోంది, బిల్లుకు మద్దతుగా ఓటేసిన ఎంపీలకు ధన్యవాదాలు.. దేశ చరిత్రలో ఈ నిర్ణయం ఎన్నటికీ గుర్తుండిపోతుంది.
– ప్రధాని నరేంద్ర మోడీ ట్వీట్
ముస్లిం కుటుంబాల నాశనమే బిల్లు ఉద్దేశం..
‘ట్రిపుల్ తలాక్ బిల్లు రాజకీయ ప్రేరేపితం. మైనారిటీలలో గొడవలు పెంచడం, ముస్లిం కుటుంబాలను నాశనం చేయడమే దీని అసలు ఉద్దేశం. భార్యభర్తలు కోర్టుల చుట్టూ తిరుగుతూ, ఉన్న ఒకటీ అరా ఆస్తులను అమ్ముకుంటారు. ప్రభుత్వానికి చిత్తశుద్ధి ఉంటే.. ఈ బిల్లును రాజ్యసభ సెలక్ట్కమిటీకి పంపించాలి’
– గులాం నబీ ఆజాద్, రాజ్యసభలో కాంగ్రెస్ పక్ష నేత