అయోధ్యలోని రామ మందిరంలో జనవరి 22న పవిత్రోత్సవం జరగడంతో, రావణుడిని పూజించే నోయిడా సమీపంలో ఉన్న ఓ చారిత్రాత్మక ఆలయంలో మొదటిసారిగా రాముడి విగ్రహాన్ని ప్రతిష్టించారు. ఈ పురాతన శివ మందిరం బిస్రఖ్ గ్రామంలో ఉంది. దీన్ని స్థానిక ప్రజలు రామాయణ ఇతిహాసంలో రాముడి ప్రత్యర్థి అయిన రావణుని జన్మస్థలంగా భావిస్తారు. బిస్రఖ్ నుండి 650 కి.మీ దూరంలో ఉన్న అయోధ్యలోని రామ మందిరంలో జరిగిన రామ్ లల్లా 'ప్రాణ ప్రతిష్ఠ' రోజున ఈ కార్యక్రమం జరిగింది.
ఈరోజు తొలిసారిగా శ్రీరాముడు, సీత, లక్ష్మణుడి విగ్రహాలను ఆలయ ప్రాంగణంలో విధిగా ప్రతిష్ఠించామని ఆలయ ప్రధాన పూజారి మహంత్ రాందాస్ చెప్పారు. ఈ విగ్రహాలను రాజస్థాన్ నుంచి తెప్పించినట్లు 40 ఏళ్లుగా ఈ ఆలయంలో సేవలందిస్తున్న పూజారి తెలిపారు. జనవరి 22న రావణ జన్మస్థలంలో కూడా వేడుకలు జరిగాయి. అయోధ్యలో రాముడు అడుగుపెట్టినట్టే... విగ్రహాలను బిష్రాఖ్‌లోని ఆలయంలో ప్రతిష్టించడంతో అక్కడ కూడా రాముడు తన దివ్య ఆస్థానాన్ని అధిష్ఠించారు.
స్థానిక వాదనల ప్రకారం, నోయిడాలోని బిస్రఖ్ గ్రామంలో రావణుడు జన్మించాడని నమ్ముతారు. కొంతమంది స్థానికులు ఈ నమ్మకం ప్రామాణికతను నొక్కి చెబుతున్నారు. అంతే కాదు పలువురు సాహితీవేత్తలు, ప్రఖ్యాత రచయితలు కూడా ఈ వాదనకు మద్దతు ఇస్తున్నారు. బిస్రాఖ్ రావణుడి జన్మస్థలమని, రావణుని తండ్రి అయిన విశ్రవుడికి, అలాగే విభీషణుడు, కుంభకరునికి కూడా ఇదే జన్మస్థలమని వారు అంటున్నారు.
దసరా జరుపుకోరు
బిస్రఖ్ గ్రామంలో, రావణుడు మరణించిన రోజైన దసరాను జరుపుకోరు. దేశవ్యాప్తంగా జరిగే పండుగలకు భిన్నంగా, ఈ రోజు, సంబంధిత తొమ్మిది రోజులు గ్రామంలో సంతాప దినాలుగా పాటిస్తారు. ఈ సమయంలో, స్థానిక నివాసితులు రావణుడి ఆత్మకు శాంతి కలగాలని ప్రార్థనలలో పాల్గొంటారు. యజ్ఞాలతో సహా వివిధ ఆచారాలు నిర్వహిస్తారు. బిస్రాఖ్ అనేది రావణుడు (దిష్టిబొమ్మ) దహనం చేయని ప్రదేశమని, అతన్ని పూజిస్తారని, భూమాత కుమారుడిగా రావణుడు ఇక్కడ ప్రసిద్ధి చెందినందున ఇక్కడి ప్రజలు అతన్ని గౌరవిస్తారని ఓ పూజారి చెప్పాడు. మరో ఆసక్తికరమైన విషయమేమిటంటే.. ఈ పురాతన ఆలయంలో రావణుడికి విగ్రహమే లేదు. అయితే అతని కొన్ని ముఖ్యమైన జీవిత సంఘటనలు ఆలయ సముదాయం గోడలపై చెక్కబడి ఉన్నాయి. ఈ శిల్పాలలో రావణుడి కుటుంబ సభ్యులు కూడా కనిపిస్తారు. అందుకే అక్కడి ప్రజలు ఈ ఆలయంలో రావణున్ని కొలుస్తారు.
