న్యూఢిల్లీ: ప్రపంచంలోనే రెండో పెద్ద స్టీలు తయారీ కంపెనీ ఆర్సిలర్ మిట్టల్ ఒడిశాలో రూ. లక్ష కోట్లతో ఇంటిగ్రేటెడ్ గ్రీన్ఫీల్డ్ స్టీల్ ప్లాంట్ పెట్టనుంది. ఈ ప్లాంట్కు ఏడాదికి 2.40 కోట్ల టన్నుల స్టీల్ ప్రొడక్షన్ కెపాసిటీ ఉంటుంది. ఆర్సిలర్ మిట్టల్ సబ్మిట్ చేసిన ప్లాన్ను ఒడిశా ముఖ్యమంత్రి నవీన్ పట్నాయక్ నాయకత్వంలోని హైలెవెల్ కమిటీ ఆమోదించింది. కొత్త స్టీలు ప్లాంట్లో 24 వేల మందికి ఉద్యోగాలు ఇస్తారు. పరోక్షంగా మరింత మందికి ఉపాధి దొరుకుతుంది. ఏడాదికి 18.75 మిలియన్ టన్నుల సిమెంట్ను కూడా ఆర్సిలర్ ప్లాంట్ ఉత్పత్తి చేస్తుందని ఒడిశా ప్రభుత్వం ప్రకటించింది. చిన్న బిజినెస్లను ప్రమోట్ చేసేందుకు ఆర్సిలర్ మిట్టల్ డౌన్ స్ట్రీమ్ ఇండస్ట్రీ పార్కునూ ఏర్పాటు చేస్తుంది. దిగుమతి చేసుకుంటున్న ప్రొడక్ట్స్ను కొన్నింటినీ ఇక్కడే తయారయ్యేలా ఆర్సిలర్ మిట్టల్ చొరవ తీసుకుంటుందని ప్రభుత్వం పేర్కొంది. ఆర్సిలర్ మిట్టల్ ఈ ప్రాజెక్టును దశలవారీగా ఏడేళ్లలో పూర్తి చేస్తుందని వివరించింది. స్టీల్ ప్లాంట్తో పాటు ఈ ప్రాంతంలో చాలా యాన్సిలరీ యూనిట్లు ఏర్పాటయ్యే అవకాశాలూ కలుగుతాయని ఒడిశా ప్రభుత్వం తెలిపింది.
