కార్పొరేట్ టాక్స్ కన్నా ఇన్కంటాక్స్ ఆమ్దానే ఎక్కువ

ఇన్కంటాక్స్ ఆమ్దానే ఎక్కువ
కార్పొరేట్ టాక్స్ వసూళ్లను దాటేశాయ్‌
12 ఏళ్ల తర్వాత ఇదే మొదటిసారి
లిస్టెడ్ కంపెనీల లాభాలు పెరిగినయ్..
కార్పొరేషన్ టాక్స్ వసూళ్లు మాత్రం తగ్గినయ్
2020-21లో వసూళ్లు 17.9 శాతం డౌన్‌
ఐటీ వసూళ్లు మాత్రం 2.3 శాతం అప్‌

న్యూఢిల్లీ: 2020–21 ఫైనాన్షియల్ ఇయర్లో ఇన్కంటాక్స్ వసూళ్లు కార్పొరేషన్ టాక్స్ వసూళ్లను మించాయి. ఇలా ఇన్కంటాక్స్ వసూళ్లు ఎక్కువవడం 12 ఏళ్ల తర్వాత ఇదే మొదటిసారి. సెంట్రల్ గవర్నమెంట్ 2020–21 ఫైనాన్షియల్ ఇయర్కు అకౌంట్లను ప్రకటించింది. చాలా ఏళ్లుగా ఇన్కంటాక్స్ వసూళ్ల కంటే కార్పొరేషన్ టాక్స్ వసూళ్లు ఎక్కువగా రికార్డవుతున్నాయి. 2020–21లో ఇన్కంటాక్స్ వసూళ్లు రూ. 4.69 లక్షల కోట్లు. ఇదే కాలానికి కార్పొరేషన్ టాక్స్ వసూళ్లు రూ. 4.57 లక్షల కోట్లే. అంటే ఇన్కంటాక్స్ వసూళ్లు కార్పొరేషన్ టాక్స్ వసూళ్ల కంటే రూ. 12 వేల కోట్లు ఎక్కువన్నమాట. దేశంలోని ఇండివిడ్యువల్స్, హిందూ అన్డివైడెడ్ ఫ్యామిలీస్ (హెచ్యూఎఫ్)లు ఇన్కంటాక్స్ చెల్లిస్తారు. తమకు వచ్చే లాభాలపై కంపెనీలు చెల్లించేది కార్పొరేషన్ టాక్స్.

ఐటీ వసూళ్లు ఎందుకు తగ్గాయంటే..
ఇన్కంటాక్స్ వసూళ్లు కార్పొరేషన్ టాక్స్ వసూళ్ల కంటే ఎందుకు ఎక్కువయ్యాయనేది ఇప్పుడు ప్రశ్న. కిందటేడాది కరోనా వైరస్ ఎఫెక్ట్తో వ్యాపారాలన్నీ కుదేలవడమే కంపెనీల లాభాలు తగ్గడానికి కారణమనేది ఒక జవాబు. ఫలితంగా ఆ కంపెనీలు తక్కువ టాక్స్ చెల్లించాయి. అయితే, కొంచెం లోతుగా చూస్తే... ఇదొక్కటే కారణం కాదని తెలుస్తుంది. దేశంలోని లిస్టెడ్ కంపెనీల లాభాలు 2020–21లో జీడీపీలో 2.6 శాతానికి పెరిగాయి. 2014–15 తర్వాత ఇంత ఎక్కువ ఉండటం ఇదే మొదటిసారి. 2014–15లో లిస్టెడ్ కంపెనీల లాభాలు జీడీపీలో 3.1 శాతంగా నమోదయ్యాయి. నిజానికి ఇంకా కొన్ని కంపెనీలు తమ ఫైనాన్షియల్ రిజల్ట్స్ ప్రకటించాల్సి ఉంది. ఇక 2019–20కి చూస్తే లిస్టెడ్ కార్పొరేట్ల లాభాలు జీడీపీలో 1.1 శాతంగా ఉన్నాయి. 2020–21లో లిస్టెడ్ కంపెనీల ప్యాట్ (ప్రాఫిట్ ఆఫ్టర్ టాక్స్) లేదా నికర మార్జిన్ 9.1 శాతం. 2007–08 ఫైనాన్షియల్లోని 10.2 శాతం తర్వాత ఇదే ఎక్కువ. కాకపోతే, కార్పొరేషన్ టాక్స్ను అన్లిస్టెడ్ కంపెనీలు కూడా చెల్లిస్తాయి. కాబట్టే, 2020–21లో ఇన్కంటాక్స్ వసూళ్లు కార్పొరేషన్ టాక్స్ వసూళ్లను మించడం ఆశ్చర్యం కలిగిస్తోంది. 2019–20తో పోలిస్తే కార్పొరేషన్ టాక్స్ వసూళ్లు 17.9 శాతం తగ్గాయి. ఆ ఏడాదిలో ఈ వసూళ్లు రూ. 5.57 లక్షల కోట్లు. 2019–20తో పోలిస్తే ఇన్కంటాక్స్ వసూళ్లు 2.3 శాతమే తగ్గాయి. 2019–20లో ఇన్కంటాక్స్ వసూళ్లు రూ. 4.8 లక్షల కోట్లు. కార్పొరేషన్ టాక్స్ రేటును అంతకు ముందున్న 30 శాతం నుంచి 22 శాతానికి సెప్టెంబర్ 2019లో ప్రభుత్వం తగ్గించింది. కొత్త మాన్యుఫాక్చరింగ్ కంపెనీలకైతే 25 శాతం నుంచి 15 శాతానికి టాక్స్ రేటును తగ్గించారు. ఇన్వెస్ట్మెంట్ ఊపందుకునేలా చేయడం ద్వారా గ్రోత్ కోసమే ఈ తగ్గింపు నిర్ణయం తీసుకున్నారు. మేకిన్ ఇండియా స్కీము కింద మాన్యుఫాక్చరింగ్ రంగంలో కొత్త పెట్టుబడులను రాబట్టాలనేది ప్రభుత్వ టార్గెట్. పన్ను రేట్లు తగ్గిస్తే పెట్టుబడిదారులు ముందుకొస్తారనేది ప్రభుత్వ ఆశాభావం. అయితే, ఇది కార్యరూపంలోకి వచ్చినట్లు లేదు. 2020–21లో జీడీపీలో ఇన్వెస్ట్మెంట్ రేషియో 20 ఏళ్లలో ఎప్పుడూ లేనంతగా 27.1 శాతానికి పడిపోయింది. 2019–20లో ఈ రేషియో 28.8 శాతం. 2007–08లో 35.8 శాతంగా రికార్డయిన ఈ రేషియో అప్పటి నుంచీ ఏటేటా తగ్గుతూనే వస్తోంది. ఈ నేపథ్యంలోనే లిస్టెడ్ కంపెనీలు మునుపెన్నడూ లేనంతగా లాభాలు గడించినా, కార్పొరేషన్ టాక్స్ వసూళ్లు మాత్రం తగ్గిపోయాయి.

పెద్ద కంపెనీలకు లాభాలు
సప్లయర్లు, కాంట్రాక్టర్లతో డిస్కషన్స్ ద్వారా తమ కాస్ట్లను లిస్టెడ్ కంపెనీలు తగ్గించుకోలిగాయి. ఉద్యోగులతోనూ డిస్కస్ చేశాయి. చిన్నకంపెనీలు కష్ట కాలం ఎదుర్కొంటున్నాయి. పైనుంచి పడిన ఎఫెక్ట్ అంతా వాటిమీదకే జారింది. ఈ ప్రాసెస్లో సప్లయర్లు, కాంట్రాక్టర్ల లాభాలు తగ్గిపోయాయి. ఫలితంగా కార్పొరేషన్ టాక్స్ వసూళ్లు తగ్గాయి. చిన్న కంపెనీ వ్యాపారాలు దెబ్బతింటే, పెద్ద కంపెనీలు మాత్రం తమ లాభాలు పెంచుకోగలిగాయి.