హైదరాబాద్: స్వతంత్ర వజ్రోత్సవాల్లో భాగంగా గ్రేటర్ వ్యాప్తంగా సంబురాలు కొనసాగుతున్నాయి. శనివారం జీహెచ్ఎంసీ ఆధ్వర్యంలో బల్దియా హెడ్డాఫీసు నుంచి ట్యాంక్ బండ్ వరకు ఫ్రీడమ్ రన్ నిర్వహించగా.. అధికారులు, ఎంటమాలజీ, శానిటేషన్ సిబ్బంది, డీఆర్ఎఫ్ టీమ్స్, ఎన్సీసీ స్కూల్స్, కాలేజీల స్టూడెంట్లు.. సుమారు 15 వేల మంది పాల్గొన్నారు. ఈ ర్యాలీని మంత్రులు మహమూద్ అలీ, తలసాని శ్రీనివాస్, వజ్రోత్సవ కమిటీ రాష్ట్ర చైర్మన్ కేశవరావు, మేయర్, డిప్యూటీ మేయర్లు విజయలక్ష్మి, శ్రీలతా రెడ్డి, కమిషనర్ లోకేశ్ కుమార్ ప్రారంభించారు.
పరేడ్ గ్రౌండ్లో ఆర్మీ జవాన్లు చేసిన విన్యాసాలు ఆకట్టుకున్నాయి.దుర్గం చెరువుపై ఉన్న కేబుల్ బ్రిడ్జి వద్ద సైబరాబాద్ సీపీ స్టీఫెన్ రవీంద్ర బైక్ రైడ్ను ప్రారంభించారు. పద్మారావునగర్లో చేపట్టిన తిరంగా పాదయాత్రలో విమెన్ సేఫ్టీ వింగ్ డీఐజీ సుమతి పాల్గొన్నారు.- జీడిమెట్ల ఇండస్ట్రియల్ ఏరియాలో అసోసియేషన్ ఆధ్వర్యంలో రైతుబజార్ వరకు జాతీయ జెండాలతో ర్యాలీ నిర్వహించగా.. డిప్యూటీ చీఫ్ ఇన్ స్పెక్టర్ ఆఫ్ ఫ్యాక్టరీస్ శ్రీనివాస్ రెడ్డి పాల్గొన్నారు. నార్త్జోన్ పోలీసుల ఆధ్వర్యంలో ఉప్పల్, సికింద్రాబాద్, కంటోన్మెంట్ ప్రాంతాల్లో ఫ్రీడమ్ ర్యాలీ నిర్వహించగా.. బీజేపీ కార్పొరేటర్లు దీపిక, సుచిత్ర పాల్గొన్నారు. మల్కాజిగిరి,శంషాబాద్, వికారాబాద్, పరిగిలోనూ ర్యాలీలు జరిగాయి.
