ప్రపంచ ఆర్థిక వ్యవస్థకు ఊపిరి.. ఇండియా, చైనా, రష్యా కలిసి ముందుకు..

• ఆర్థిక వ్యవస్థ పునర్ నిర్మాణంలో కీలక పాత్ర
• మెరుగుపడుతున్న దౌత్య సంబంధాలు
• ఈ ఏడాది చివర్లో ఇండియాకు పుతిన్
• ఎస్​సీవో సదస్సుకు హాజరయ్యేందుకు చైనాకు మోదీ
• లోకల్ కరెన్సీలో లావాదేవీలతో తగ్గనున్న డాలర్ విలువ

న్యూఢిల్లీ: అమెరికా అధ్యక్షుడు ట్రంప్, రష్యా ప్రెసిడెంట్ పుతిన్ భేటీ అయినా, జెలెస్కీతో ట్రంప్ సమావేశమై చర్చలు జరిపినా.. రష్యా, ఉక్రెయిన్ మధ్య యుద్ధం కొనసాగుతూనే ఉన్నది. ఒకవైపు చర్చలు కొనసాగుతుండగానే.. మరోవైపు ఉక్రెయిన్​పై రష్యా మిసైళ్ల వర్షం కురిపిస్తున్నది. దీనికితోడు ట్రంప్ విధించిన టారిఫ్​లు ప్రపంచ దేశాలను ఆర్థిక అనిశ్చితివైపు తీసుకెళ్తున్నాయి. దీంతో ఇండియా, రష్యా, చైనా కలిసి వ్యూహాత్మకంగా అడుగులు వేస్తున్నాయి. కుదేలైన ప్రపంచ ఆర్థిక వ్యవస్థను పునర్ నిర్మించేందుకు ప్రయత్నిస్తున్నాయి.

దౌత్యపరమైన సంబంధాలు మెరుగుపర్చుకుంటూ.. ముందుకెళ్తున్నాయి. ఈ నేపథ్యంలో రష్యా ప్రెసిడెంట్ పుతిన్ ఈ ఏడాది చివరి నాటికి ఇండియాలో పర్యటించనున్నారు. ప్రధానమంత్రి నరేంద్ర మోదీ సుమారు ఏడేండ్ల తర్వాత చైనాలో అడుగుపెట్టనున్నారు. ఆగస్టు చివర్లో నిర్వహించనున్న షాంఘై కో ఆపరేషన్ ఆర్గనైజేషన్ (ఎస్​సీవో) సదస్సుకు హాజరుకానున్నారు. పుతిన్, మోదీ పర్యటనలు ప్రపంచ ఆర్థిక వ్యవస్థను మరింత బలోపేతం చేస్తాయని పలువురు అభిప్రాయపడ్తున్నారు. డ్రాగన్, బియర్, టైగర్ కలిసి వ్యూహాత్మకంగా ముందుకెళ్లడం ప్రపంచ ఆర్థిక వ్యవస్థకు పాజిటివ్ అని అంటున్నారు.

టారిఫ్​లు ప్రభావం చూపవంటున్న ఎక్స్​పర్ట్స్​
ఆయా దేశాలపై ట్రంప్ వేసిన టారిఫ్​లు.. ప్రస్తుత ప్రపంచ వాణిజ్య సరుకుల వ్యాపారంపై పెద్దగా ప్రభావం చూపవని ఎక్స్​పర్ట్స్ అంటున్నారు. ఇప్పుడు తాము యూనిపోలార్ ఎకానమీలో లేమని, అందుకే టారిఫ్​ల ప్రభావం అంతగా ఉండదని చెప్తున్నారు. దాదాపు చాలా దేశాలు తమ పొలిటికల్ ఈగోస్​ను పక్కనపెట్టి.. వ్యాపార సంబంధాలపై దృష్టి పెట్టాయని తెలిపారు. ఇండియా, రష్యా, చైనా కలిసి ముందుకెళ్లడమే దీనికి ఉదాహరణ అని పేర్కొన్నారు. ప్రపంచ ఆర్థిక వ్యవస్థలో అమెరికా డాలర్​పైనే ఎక్కువ ఆధారపడటం కూడా ఈ మూడు దేశాల మధ్య పెరుగుతున్న స్నేహ సంబంధాలకు ఓ కారణమని నిపుణులు అంటున్నారు.

‘‘ఒక్కో దేశం యూనిక్ స్ర్టెంత్​ను కలిగి ఉన్నాయి. చైనా మ్యానుఫాక్చరింగ్ డామినెన్స్, రష్యా ఎనర్జీ సెక్టార్​లో సుప్రీం, ఇండియా సర్వీస్ ఎకానమీ, బలమైన మార్కెట్ వ్యవస్థలు కలిగి ఉన్నాయి. ఈ మూడు దేశాల మధ్య జరిగే వ్యాపారం.. దేశీయ కరెన్సీలో లావాదేవీలు.. ఆర్థిక వ్యవస్థలను మరింత మెరుగుపరుస్తాయి. దీంతో యూఎస్ డాలర్​పై ఆధారపడటం తగ్గుతది’’అని సీఐఐఏ అండ్ వ్యాల్యూమ్ క్యాపిటల్ ఫౌండర్​ మనీశ్ భండారీ తెలిపారు.

మూడింట ఒక వంతు ఎకానమీ.. ఈ మూడు దేశాలదే
ఇండియా, రష్యా, చైనా 53.9 ట్రిలియన్ డాలర్ల ఆర్థిక వ్యవస్థను కలిగి ఉన్నాయి. ప్రపంచం మొత్తం ఎకానమీలో మూడింట ఒకవంతు ఈ మూడు దేశాలే ప్రాతినిథ్యం వహిస్తున్నాయి. ఇక ఎగుమతుల్లో కూడా పెద్ద వాటానే కలిగి ఉన్నాయి. సుమారు 5.09 ట్రిలియన్ డాలర్లు సరుకులను ఎక్స్​పోర్టు చేస్తున్నాయి. ప్రపంచ దేశాల ఎగుమతుల్లో ఇది ఐదో వంతు. ప్రపంచ వ్యాణిజ్యానికి వెన్నుముకగా నిలుస్తున్నాయి. ఇన్నోవేషన్, టెక్నాలజీ, ఇండస్ట్రీ సెక్టార్​లను కనెక్ట్​ చేస్తున్నాయి. ప్రస్తుతం చాలా దేశాలు డాలర్​పై ఆధారపడుతున్నాయి. 

అమెరికా, యూరోపియన్ దేశాలు రష్యాపై ఆంక్షలు విధిస్తున్నాయి. దీంతో ఇండియా, చైనా లోకల్ కరెన్సీలో క్రూడాయిల్ కొనుగోలు చేస్తున్నాయి. మూడు దేశాలు తమ సైనిక శక్తిని కూడా బలోపేతం చేసుకుంటున్నాయి. 549 బిలియన్ డాలర్లు కేటాయించాయి. వరల్డ్ డిఫెన్స్ బడ్జెట్​లో 20.2 శాతంగా ఉంది. ఇండియా ఇప్పటికే రష్యాతో మంచి సంబంధాలు కలిగి ఉన్నది. దీనికితోడు చైనా కూడా స్నేహం కోసం ఇండియా వైపు అడుగులు వేస్తున్నది. ఇదే.. ప్రపంచ ఆర్థిక వ్యవస్థకు బలమైన పునాది అని పలువురు ఎక్స్​పర్ట్స్ భావిస్తున్నారు.