న్యూఢిల్లీ: మనదేశంలో కాలుష్యం కొంత తగ్గినా.. సిటీల్లో మాత్రం రోజురోజుకూ పెరిగిపోవడం ఆందోళన కలిగిస్తోంది. 2022లో పొల్యూషన్ విషయంలో ఇండియా ప్రపంచంలోనే 8వ స్థానంలో నిలిచింది. గతేడాదితో పోలిస్తే మూడు స్థానాలు మెరుగైంది. ప్రస్తుతం పీఎం 2.5 లెవల్ ప్రతి క్యూబిక్ బీటర్కు 53.3 మైక్రోగ్రాములకు తగ్గింది. అయినా కూడా ఇప్పటికీ వరల్డ్ హెల్త్ ఆర్గనైజేషన్(డబ్ల్యూహెచ్వో) సూచించిన సేఫ్టీ లెవల్ కంటే మనదేశంలో కాలుష్యం పది రెట్లు ఎక్కువగా ఉంది. ఇదే సమయంలో ప్రపంచంలోని టాప్ 100 పొల్యూటెడ్ సిటీల్లో 65 మన దేశంలోనే ఉండటం ఆందోళన కలిగిస్తోంది. అంతకుముందు ఏడాది టాప్ 100లో 61 సిటీలు మాత్రమే ఉన్నాయి. 2022లో టాప్ 50లో 39, టాప్ 20లో 14, టాప్ 10లో 6 సిటీలు ఉన్నాయి. కొత్త క్లాసిఫికేషన్ ప్రకారం టాప్ 10లో ఢిల్లీ, న్యూఢిల్లీ రెండూ ఉన్నాయి.
131 దేశాల్లో డేటా సేకరణ
స్విస్కు చెందిన ఐక్యూఎయిర్ సంస్థ మంగళవారం 2022కు సంబంధించిన ‘వరల్డ్ ఎయిర్ క్వాలిటీ రిపోర్ట్’ను విడుదల చేసింది. పొల్యూషన్కు కీలకంగా భావించే పీఎం 2.5 లెవల్ ఆధారంగా ఈ రిపోర్ట్ను రెడీ చేశారు. మొత్తం 131 దేశాల్లోని 30 వేలకుపైగా గవర్నమెంట్, నాన్గవర్నమెంట్ మానిటర్ల నుంచి డేటాను సేకరించారు. 2017లో 2,200 సిటీలు మాత్రమే ఉండగా ఇప్పుడు 7,300 సిటీలను పరిగణనలోకి తీసుకున్నారు. పీఎం 2.5 శాతం కారణంగా ఏటా ఇండియాకు లక్షల కోట్ల రూపాయల నష్టం జరుగుతోందని ఈ రిపోర్ట్ వెల్లడించింది. ఇందులో ట్రాన్స్ పోర్ట్ డిపార్ట్మెంట్ వల్ల జరుగుతున్న నష్టమే 20 నుంచి 35 శాతం వరకు ఉంటుందని అంచనా వేసింది. ఇండస్ట్రియల్ యూనిట్లు, బొగ్గు ఆధారిత పవర్ ప్లాంట్లు, బయోమాస్ బర్నింగ్ కారణంగా ఎక్కువ నష్టం జరుగుతోందని పేర్కొంది.
ఆగ్రాలో తగ్గింది
ఆగ్రాలో మాత్రం పొల్యూషన్ లెవెల్స్ భారీగా తగ్గాయి. మొత్తంగా చూస్తే 31 సిటీల్లో రెండంకెల స్థాయిలో పొల్యూషన్ లెవల్ తగ్గింది. ఇందులో ఉత్తరప్రదేశ్లోని 10, హర్యానాలోని 7 సిటీలు ఉన్నాయి. ఆగ్రాలో పొల్యూషన్ 55 శాతం తగ్గింది. 2017–21 మధ్య పీఎం 2.5.. 85 మైక్రోగ్రాములుగా ఉంటే 2022లో అది 38 మైక్రోగ్రాములకు తగ్గింది. మరోవైపు 38 సిటీలు, టౌన్లలో గత సంవత్సరాలతో పోలిస్తే పొల్యూషన్ పెరిగిందని ఈ రిపోర్ట్ వెల్లడించింది. మెట్రో సిటీల విషయానికి వస్తే ఢిల్లీ తర్వాత అత్యంత కాలుష్య నగరంగా కోల్కతా నిలిచింది. అయితే ఈ రెండు నగరాలకు మధ్య తేడా చాలా ఎక్కువగా ఉంది. చెన్నై కొంత వరకు క్లీన్ సిటీగా కనిపిస్తోంది. అయినా అక్కడ సేఫ్టీ లెవల్ కంటే పొల్యూషన్ ఐదు రెట్లు ఎక్కువగా ఉంది. 2017 సగటు కంటే కాలుష్యం స్థాయి పెరిగిన మెట్రో సిటీలు హైదరాబాద్, బెంగళూరు మాత్రమే. ఈ లిస్ట్లో హైదరాబాద్ 199వ ప్లేస్లో ఉంది.
ఢిల్లీ.. కాలుష్య రాజధాని కాదు
ఇకపై ప్రపంచంలో కాలుష్య రాజధాని ఢిల్లీ కాదు. ఆ స్థానాన్ని ఇప్పుడు చాడ్ రాజధాని ఎన్జామెనా ఆక్రమించింది. ఢిల్లీ రెండో స్థానంలో ఉంది. పాపులేషన్ పరంగా చూస్తే ఎన్జామెనా జనాభా పది లక్షలు కాగా.. ఢిల్లీ జనాభా నలభై లక్షలకుపైగానే ఉంటుంది. ఢిల్లీకి చుట్టుపక్కల ఉన్న గుర్గామ్, నోయిడా, ఘాజియాబాద్, ఫరీదాబాద్లో పాపులేషన్ లెవల్స్ అంతకంతకూ తగ్గుతూ వస్తున్నాయి. వీటిలో కాలుష్యం కొంత తగ్గినా ఇండియా సగటుతో పోలిస్తే ఇప్పటికీ ప్రమాదకర స్థాయిలోనే ఉంది.
ప్రపంచంలోనే అత్యంత కాలుష్య నగరం లాహోర్
పాకిస్తాన్లోని లాహోర్ ప్రపంచంలోనే అత్యంత కాలుష్య నగరంగా ఫస్ట్ ప్లేస్లో నిలిచింది. రెండో ప్లేస్లో చైనాలోని హోటన్ ఉంది. మూడో ప్లేస్లో రాజస్థాన్లోని భివాడి.. నాలుగో ప్లేస్లో ఢిల్లీ ఉన్నాయి. 9వ స్థానంలో న్యూఢిల్లీ ఉన్నాయి. ఢిల్లీలో ఇప్పటికీ పీఎం 2.5 లెవల్ 92.6 మైక్రోగ్రాములుగా ఉంది. ఇది డబ్ల్యూహెచ్వో సేఫ్ లిమిట్ కంటే 20 రెట్లు ఎక్కువ. అత్యంత కాలుష్య దేశాల జాబితాలో చాడ్ ఫస్ట్ ప్లేస్లో ఉంది. రెండో ప్లేస్లో ఇరాక్, మూడో ప్లేస్లో పాకిస్తాన్ ఉన్నాయి.
