హైదరాబాద్: రౌడీ షీటర్ రియాజ్ ఎన్ కౌంటర్ వ్యవహారంలో కీలక పరిణామం చోటు చేసుకుంది. మీడియా కథనాల ఆధారంగా రియాజ్ ఎన్‌కౌంటర్ ఘటనను తెలంగాణ మానవ హక్కుల సంఘం సుమోటోగా స్వీకరించింది. ఈ మేరకు తెలంగాణ డీజీపీకి స్టేట్ హ్యుమన్ రైట్స్ కమిషన్ నోటీసులు జారీ చేసింది. 2025, నవంబర్ 24వ తేదీ లోగా ఈ సంఘటనకు దారితీసిన పరిస్థితులు, కేసుకు సంబంధించిన ఎఫ్ఐఆర్, పోస్ట్‌మార్టం నివేదికను అందజేయాలని డీజేపీని ఆదేశించింది.
2025, అక్టోబర్ 17న నిజామాబాద్ సీసీఎస్ కానిస్టేబుల్ ప్రమోద్ను రౌడీ షీటర్ రియాజ్ పొడిచి చంపిన విషయం తెలిసిందే. పలు కేసుల్లో నిందితుడిగా ఉన్న రియాజ్ను పట్టుకుని పోలీస్ స్టేషన్కు తీసుకెళ్తుండగా ప్రమోద్ కుమార్పై రియాజ్ కత్తితో దాడి చేశాడు. ఈ దాడిలో తీవ్రంగా గాయపడ్డ కానిస్టేబుల్ ప్రమోద్ ఆసుపత్రిలో చికిత్స పొందుతూ మృతి చెందాడు. ఈ ఘటనను తెలంగాణ పోలీస్ శాఖ సీరియస్గా తీసుకుంది. ఈ క్రమంలోనే ఆదివారం (అక్టోబర్ 19) నిందితుడు రియాజ్ను పోలీసులు అరెస్ట్ చేశారు.
►ALSO READ | జూబ్లీహిల్స్ ఉప ఎన్నికకు ముగిసిన నామినేషన్ల గడువు
నిజామాబాద్ నగర శివారులోని ఓ పాత లారీ క్యాబిన్‌‌లో దాక్కున్నట్లు తెలియడంతో అక్కడికి వెళ్లి అదుపులోకి తీసుకున్నారు. అప్పటికే ఓ వ్యక్తితో గొడవ పడి గాయాలపాలైన రియాజ్ను చికిత్స నిమిత్తం నిజామాబాద్ ప్రభుత్వ ఆసుపత్రిలో చేర్పించారు పోలీసులు. ఆసుపత్రిలో ఓ కానిస్టేబుల్ దగ్గర నుంచి గన్ లాక్కొని పారిపోయే ప్రయత్నం చేయడంతో పోలీసులు రియాజ్ను ఎన్ కౌంటర్ చేశారు.
