- సౌదీ ఆధ్వర్యంలో రేపట్నించి చర్చలు
- మన దేశ ప్రతినిధి కూడా హాజరు
న్యూఢిల్లీ/కీవ్: ఉక్రెయిన్లో శాంతి కోసం ఈ నెల 5, 6వ తేదీల్లో సౌదీ అరేబియా నిర్వహిస్తున్న చర్చల సమావేశంలో ఇండియా కూడా పాల్గొటుందని విదేశాంగ శాఖ అధికార ప్రతినిధి అరిందమ్ బాగ్చి గురువారం ఒక ప్రకటనలో తెలిపారు. ఈ మీటింగ్కు పశ్చిమ దేశాలు, కొన్ని అభివృద్ధి చెందిన దేశాలను సౌదీ ఆహ్వానించింది. ఇందులో ఉక్రెయిన్ అధ్యక్షుడు ప్రతిపాదిస్తున్న శాంతి ప్రణాళికలోని ‘రష్యా దళాలు వాపస్ వెళ్లాలి, సోవియట్నుంచి విడిపోయినప్పుడు నిర్ణయించిన సరిహద్దులను తిరిగి పునరుద్ధరించాలి’ అనే అంశాలపై చర్చించనున్నారు.
యుద్ధం మృతులు 10 వేలపైనే: ఉక్రెయిన్
రష్యా దాడుల్లో ఇప్పటివరకు తమ దేశంలో 10 వేల మందికిపైగా ప్రాణాలు కోల్పోయారని ఉక్రెయిన్ తెలిపింది. ఆక్రమణకు గురైన తమ భూభాగాలను తిరిగి దక్కించుకునే సరికి ఈ సంఖ్య మరింత పెరిగే అవకాశం ఉందని ఉక్రెయిన్ యుద్ధ నేరాల విభాగం అధికారి యురియ్ బెల్సోవ్ తెలిపారు. “ఇప్పటివరకు 10,749 మంది మరణించారు. వీరిలో 499 మంది పిల్లలున్నారు. మొత్తం15,599 మంది గాయపడ్డారు” అని బెల్సోవ్చెప్పారు. రష్యా సైన్యం 98 వేల యుద్ధ నేరాలకు పాల్పడిందని, అన్నింటినీ నమోదు చేశామని తెలిపారు. కాగా, ఖేర్సన్ సిటీలోని 18వ శతాబ్దానికి చెందిన ప్రసిద్ధ సెయింట్ కేథరీన్ కేథడ్రల్ చర్చిపై రష్యా షెల్ బాంబులతో రెండు సార్లు దాడి చేయడంతో చర్చి చాలా వరకు ధ్వంసమైందని ఉక్రెయిన్ వెల్లడించింది.
