ఢిల్లీ-ఎన్‌సిఆర్‌తో సహా చాల ప్రాంతాలలో బలమైన గాలులు, వర్షాలు కురిసాయి. జమ్మూ & కాశ్మీర్, హిమాచల్ ప్రదేశ్, ఉత్తరాఖండ్‌లో ప్రస్తుత హిమపాతం ఉత్తర భారతదేశంలో రాబోయే శీతాకాలం తీవ్రతను సూచిస్తుంది. వాయువ్య దిశ నుంచి వీచే చలి గాలులు ఢిల్లీలో ఉష్ణోగ్రతలను 20°C కంటే తక్కువగా ఉంచడంతో, ఇది మరింత కఠినమైన శీతాకాలానికి నాంది కావచ్చని వాతావరణ శాస్త్రవేత్తలు హెచ్చరించారు. శీతల పరిస్థితులకు కారణమయ్యే లా నినా తిరిగి రావడంతో ఈ సీజన్ మరింత తీవ్రమవుతుందని నిపుణులు సూచిస్తున్నారు.
భారత వాతావరణ శాఖ (IMD) ప్రకారం, 2025 చివరి నాటికి లా నినా అభివృద్ధి చెందే అవకాశం 71% ఉందని, దీని వల్ల సాధారణ కంటే తక్కువ ఉష్ణోగ్రతలు, భారీ హిమపాతం/మంచు, భారతదేశం అంతటా ఎక్కువగా చలిగాలులు సంభవించవచ్చు అంచనా వేసింది. ఈ సహజ వాతావరణ మార్పు గత ఆరు సంవత్సరాలలో ఏర్పడడం ఐదోసారి.
అయితే ఈ 'లా నినా' బలంగా, ఎక్కువ కాలం కొనసాగదని నిపుణులు అంటున్నారు. యుఎస్ నేషనల్ ఓషియానిక్ అండ్ అట్మాస్ఫియరిక్ అడ్మినిస్ట్రేషన్ (NOAA) గురువారం సెప్టెంబర్ 2025లో లా నినా పరిస్థితులు మొదలయ్యాయి... అలాగే లా నినా డిసెంబర్ 2025 నుండి ఫిబ్రవరి 2026 వరకు ఉండే అవకాశం ఉందని తెలిపింది.
లా నినా అంటే ఏమిటి: 'లా నినా' అనేది ఒక రకమైన వాతావరణ మార్పు. దీనిని 'ఎల్ నినో సదరన్ ఆసిలేషన్' (ENSO) అని పిలుస్తారు. దీనిలో సెంట్రల్ & ఈస్టర్న్ పసిఫిక్ మహాసముద్రంలోని నీటి ఉష్ణోగ్రతలు మారుతాయి, దానితో పాటు వాతావరణంలో కూడా మార్పులు వస్తాయి. ఈ ENSO ప్రపంచ వాతావరణాన్ని ప్రభావితం చేస్తుంది. ఈ ENSO మూడు రకాలుగా ఉంటుంది, వెచ్చగా (El Niño), చల్లగా (La Niña), మామూలుగా (neutral). ఇవి రెండు నుండి ఏడేళ్లలో మళ్లీ మళ్లీ వస్తుంటాయి.
మామూలు సమయంలో, పసిఫిక్ మహాసముద్రం తూర్పు వైపు (దక్షిణ అమెరికా దగ్గర) పడమర వైపు (ఫిలిప్పీన్స్ & ఇండోనేషియా దగ్గర) కంటే చల్లగా ఉంటుంది. సాధారణంగా గాలులు భూమధ్యరేఖ వెంబడి పశ్చిమ దిశగా వీస్తాయి, వెచ్చని నీటిని ఆసియా వైపు నెట్టివేసి, దక్షిణ అమెరికా సమీపంలో చల్లగా ఉండే నీటిని పైకి లేపుతాయి.
లా నినా సమయంలో ఈ గాలులు బలంగా పెరుగుతాయి, తూర్పు పసిఫిక్‌లో మరింత వెచ్చని నీటిని పశ్చిమానికి నెట్టివేసి చల్లటి నీటిని పైకి లాగుతాయి. దింతో సముద్ర ఉపరితల ఉష్ణోగ్రతలు సగటు కంటే కనీసం 0.5°C తగ్గుతాయి
'ఎల్ నినో' సమయంలో గాలులు బలహీనపడతాయి, దాంతో వెచ్చని నీరు దక్షిణ అమెరికా తీరం నుండి ఎక్కువగా మారదు. దింతో తూర్పు పసిఫిక్ సాధారణంగా కంటే వేడిగా మారుతుంది. 'లా నినా' సమయంలో దీనికి పూర్తిగా వ్యతిరేకంగా జరుగుతుంది. గాలులు మరింత బలంగా వీస్తాయి, పశ్చిమ పసిఫిక్‌కు ఎక్కువ నీటిని నెట్టివేస్తాయి. భారతదేశంలో 'ఎల్ నినో' వస్తే వర్షాలు తగ్గుతాయి, ఉష్ణోగ్రతలు పెరుగుతాయి.
భారతదేశంపై లా నినా ప్రభావం : ఈ 'లా నినా' కారణంగా భారతదేశంలోని చాల ప్రాంతాలలో ముఖ్యంగా ఉత్తర ప్రాంతంలో చలికాలం మరింత చల్లగా ఉండవచ్చని నిపుణులు చెబుతున్నారు. దీనివల్ల కొండ ప్రాంతాలలో చలిగాలులు, మంచు కురిసే అవకాశం పెరుగుతుంది.
అయితే, 'లా నినా' వచ్చింది అంటే కచ్చితంగా చలికాలం చాలా చల్లగా ఉంటుందని చెప్పలేం. ఎందుకంటే 'గ్లోబల్ వార్మింగ్' (భూమి వేడెక్కడం) కారణంగా ఈ సహజంగా చల్లబరిచే ప్రభావం తగ్గే అవకాశం ఉంది. ఉదాహరణకు 'లా నినా' మళ్లీ వచ్చినా ప్రపంచ సగటు ఉష్ణోగ్రతలు మామూలు కంటే ఎక్కువగానే ఉంటాయని ప్రపంచ వాతావరణ సంస్థ (WMO) గత నెలలో చెప్పింది.
WMO ప్రకారం సాధారణంగా 'లా నినా' అనేది 'ఎల్ నినో'కు వ్యతిరేక వాతావరణ ప్రభావాలను తీసుకొస్తుంది, ముఖ్యంగా ఉష్ణమండల ప్రాంతాలలో. అయితే 'లా నినా' & 'ఎల్ నినో' వంటి సహజంగా జరిగే సంఘటనలు అన్నీ మానవులు కలిగించే వాతావరణ మార్పుల (గ్లోబల్ వార్మింగ్) మధ్య జరుగుతున్నాయి. ఈ వాతావరణ మార్పులు ప్రపంచ ఉష్ణోగ్రతలను పెంచుతున్నాయి, తీవ్రమైన వాతావరణాన్ని మరింత తీవ్రతరం చేస్తున్నాయి ఇంకా వర్షపాతం, ఉష్ణోగ్రతల పద్ధతులను ప్రభావితం చేస్తున్నాయి.
