- టీమిండియా బౌలింగ్‌‌‌‌‌‌‌‌పై ఆందోళన
- కాన్వే ప్లేస్‌‌‌‌‌‌‌‌లో సీఫెర్ట్‌
- ఉ. 7.30 నుంచి సోనీ స్పోర్ట్స్‌‌‌‌‌‌‌‌లో లైవ్‌
ఆక్లాండ్‌: ఓవైపు బలహీనమైన బౌలింగ్‌.. మరోవైపు సీనియర్లు రోహిత్ శర్మ, విరాట్‌ కోహ్లీపై ప్రత్యేక దృష్టి.. ఈ రెండింటి మధ్యలో వన్డే వరల్డ్‌ కప్‌ సన్నాహాలు.. ఈ నేపథ్యంలో న్యూజిలాండ్ గడ్డపై ఇండియా జట్టు ఐదు మ్యాచ్‌‌‌‌‌‌‌‌ల వన్డే సిరీస్‌‌‌‌‌‌‌‌కు రెడీ అయ్యింది. బుధవారం ఇరుజట్ల మధ్య తొలి పోరు జరగనుంది. వాతావరణ పరిస్థితులు.. బౌలింగ్‌ పరంగా చూస్తే ఈ సిరీస్‌‌‌‌‌‌‌‌లో కివీస్‌‌‌‌‌‌‌‌కు కొంత ఆధిక్యత కనిపిస్తోంది. జస్ప్రీత్‌ బుమ్రాను టెస్ట్‌ మ్యాచ్‌‌‌‌‌‌‌‌ల కోసం పక్కనబెట్టడం, ప్రసిధ్‌ కృష్ణ, హర్షిత్ రాణా ఇంటర్నేషనల్‌ క్రికెట్‌‌‌‌‌‌‌‌లోకి రావడానికి మరింత టైమ్‌ పట్టే అవకాశం ఉండటంతో ఇప్పుడు టీమిండియా బౌలింగ్‌ భారం మొత్తం హైదరాబాదీ మహ్మద్‌ సిరాజ్‌‌‌‌‌‌‌‌పై పడింది. అర్ష్‌‌‌‌‌‌‌‌దీప్‌ సింగ్‌, గుర్నూర్ బ్రార్‌, అన్షుల్ కాంబోజ్, అకిబ్‌ నబీ అందుబాటులో ఉన్నా.. వీళ్లకు అంతర్జాతీయ అనుభవం తక్కువగా ఉంది. ఇక కివీస్‌‌‌‌‌‌‌‌తో చివరి వన్డే ముగిసిన వెంబడే వరల్డ్‌ టెస్ట్‌ చాంపియన్‌‌‌‌‌‌‌‌షిప్‌ మ్యాచ్‌‌‌‌‌‌‌‌లు ఉండటంతో టీమిండియా తన పూర్తి బలంతో బరిలోకి దిగడం లేదు. టెస్ట్‌‌‌‌‌‌‌‌లపై దృష్టి పెట్టేందుకు కెప్టెన్ శుభ్‌‌‌‌‌‌‌‌మన్‌ గిల్ కూడా చివరి రెండు వన్డేలకు అందుబాటులో ఉండటం లేదు.
జట్టు కూర్పు ఇలా..?
వన్డే ఫార్మాట్‌‌‌‌‌‌‌‌లో ఇండియా జట్టులో మొదటి ఐదు స్థానాలు దాదాపు ఖరారయ్యాయి. రోహిత్ మరియు కెప్టెన్ గిల్ ఇన్నింగ్స్‌‌‌‌‌‌‌‌ను ప్రారంభిస్తారు, ఆ తర్వాత కోహ్లీ వస్తాడు. నాలుగో స్థానంలో వైస్ కెప్టెన్ శ్రేయస్ అయ్యర్ ఉంటాడు. అనుభవజ్ఞుడైన వికెట్ కీపర్-బ్యాటర్ కేఎల్ రాహుల్ ఐదో స్థానంలో ఆడతాడు. ఆల్ రౌండర్లు అక్షర్ పటేల్ మరియు నితీష్ కుమార్ రెడ్డి.. ఆరు, ఏడో స్థానంలో బ్యాటింగ్ చేస్తారు. హర్షిత్ రాణా అందుబాటులో లేకపోవడంతో, అన్షుల్ కాంబోజ్ తన భారీ షాట్లు ఆడే సామర్థ్యంతో ఎనిమిదో స్థానంలో వచ్చే అవకాశం ఉంది. ఈడెన్ పార్క్‌‌‌‌‌‌‌‌లో స్ట్రెయిట్ బౌండరీలు చాలా చిన్నవి. కాబట్టి ఇండియా సిరాజ్, అర్ష్‌‌‌‌‌‌‌‌దీప్‌ సింగ్‌, గుర్నూర్ బ్రార్‌‌‌‌‌‌‌‌లతో బరిలోకి దిగనుంది. ప్రస్తుత జట్టులో అత్యధిక వన్డే వికెట్లు (201 వికెట్లు) తీసిన కుల్దీప్ అందుబాటులో ఉన్నప్పటికీ, హార్దిక్ లేకపోవడం వల్ల అతనికి తుది జట్టులో చోటు దక్కడం కష్టమే. కానీ 11 నుంచి 40 ఓవర్ల మధ్య సర్కిల్ వెలుపల నలుగురు ఫీల్డర్లను అనుమతిస్తారు కాబట్టి మిడిల్‌ ఓవర్లు చాలా కీలకం.
కాన్వే ఔట్‌..
టీమిండియా ఫాస్ట్‌ బౌలర్ల కొరత ఉంటే.. న్యూజిలాండ్ జట్టు మరో సమస్యను ఎదుర్కొంటోంది. కివీస్‌ వన్డే జట్టులోని ఆటగాళ్ల సగటు వయసు 34, 35 ఏళ్ల మధ్య ఉంది. ఇందులో చాలా మంది ప్లేయర్లు 2027 వన్డే వరల్డ్‌ కప్‌‌‌‌‌‌‌‌తో కెరీర్‌‌‌‌‌‌‌‌కు వీడ్కోలు పలకాలని భావిస్తున్నారు. ఈ నేపథ్యంలో తుది జట్టు కూర్పుపై ఉత్కంఠ నెలకొంది. మ్యాచ్‌‌‌‌‌‌‌‌కు ముందు రోజు ఫీల్డింగ్ ప్రాక్టీస్ చేస్తున్నప్పుడు మాట్ హెన్రీని ఢీకొనడం వల్ల డెవాన్ కాన్వేకు 'కంకషన్‌'కు గురయ్యాడు. హెన్రీ కూడా ఆడతాడో లేదో స్పష్టత లేదు. ఇప్పటికే న్యూజిలాండ్ జట్టులో మార్క్ చాప్‌‌‌‌‌‌‌‌మన్, రచిన్ రవీంద్ర అందుబాటులో లేరు. ఈ పరిస్థితుల్లో సాధారణంగా అత్యవసర ఓపెనర్‌‌‌‌‌‌‌‌గా వ్యవహరించే హెన్రీ నికోల్స్‌‌‌‌‌‌‌‌కు బదులుగా, టిమ్ సీఫెర్ట్‌‌‌‌‌‌‌‌కు తిరిగి వన్డే జట్టులోకి వచ్చే అవకాశం ఉంది.
తుది జట్లు (అంచనా)
ఇండియా: గిల్ (కెప్టెన్), రోహిత్, కోహ్లీ, శ్రేయస్ , రాహుల్, నమన్‌ ధీర్‌, నితీష్, అక్షర్, గుర్నూర్ బ్రార్‌, సిరాజ్, అర్ష్‌‌‌‌‌‌‌‌దీప్‌ సింగ్‌.
న్యూజిలాండ్: మిచెల్‌ శాంట్నర్‌ (కెప్టెన్), విల్‌ యంగ్‌, టిమ్ సీఫెర్ట్‌ / హెన్రీ నికోల్స్‌, డారి ల్‌ మిచెల్‌, గ్లెన్‌ ఫిలిప్స్‌, టామ్‌ లాథమ్‌, బ్రాస్‌‌‌‌‌‌‌‌వెల్‌, నాథన్‌ స్మిత్‌, జెమీసన్‌, మ్యాట్‌ హెన్రీ / బ్లెయిర్‌ టక్నెర్‌, జాకబ్‌ డఫీ.
