చెన్నై: దేశంలోని పది సిటీలలో స్టార్టప్ల కోసం స్పెషల్ సెల్స్ ఏర్పాటు చేసినట్లు ఇండియన్ బ్యాంక్ బుధవారం వెల్లడించింది. స్టార్టప్లకు ఉండే ప్రత్యేక అవసరాలను ఇవి నెరవేరుస్తాయని పేర్కొంది. అహ్మదాబాద్, బెంగళూరు, కోయంబతూర్, చెన్నై, గుర్గావ్, న్యూఢిల్లీ, గువహతి, హైదరాబాద్, కాన్పూర్, ముంబై సిటీలలో ఈ ప్రత్యేక స్టార్టప్ సెల్స్ ఏర్పాటయినట్లు తెలిపింది. స్టార్టప్ల ప్రత్యేక అవసరాలను దృష్టిలో పెట్టుకుని రూపొందించిన బ్యాంకింగ్ ప్రొడక్టులను ఇక్కడ అందుబాటులో ఉంచుతున్నట్లు ఇండియన్ బ్యాంక్ వివరించింది.
పేమెంట్ గేట్వేస్, కార్పొరేట్ క్రెడిట్ కార్డ్ ఫెసిలిటీల వంటి వాటిని అదనంగా అందిస్తున్నట్లు పేర్కొంది. దేశంలో స్టార్టప్ ఎకో సిస్టమ్ బలపడటానికి ఈ విధమైన చొరవ తీసుకున్నట్లు ఇండియన్ బ్యాంక్ మేనేజింగ్ డైరెక్టర్ ఎస్ఎల్ జైన్ చెప్పారు. చెన్నైలో స్టార్టప్ స్పెషల్ సెల్ను ఆయన లాంఛ్ చేశారు. ఆ తర్వాత మిగిలిన 9 సిటీలలోని స్పెషల్ సెల్స్ను వర్చువల్గా ప్రారంభించారు. డెడికేటెడ్ రిలేషన్షిప్ మేనేజర్లు స్టార్టప్ల కోసం ఈ సెంటర్లలో ఉంటారని ఇండియన్ బ్యాంకు వెల్లడించింది. ఇండ్ స్ప్రింగ్బోర్డ్ పేరుతో ఒక కస్టమైజ్డ్ లోన్ ప్రొడక్ట్ను స్టార్టప్ల కోసం తెచ్చినట్లు కూడా బ్యాంకు తెలిపింది.