- ఎఫ్టీఏ దేశాల నుంచి దిగుమతి చేసుకొని, సుంకాలు ఎగ్గొడుతున్న చాలా మంది ట్రేడర్లు
- ప్రభుత్వానికి రెవెన్యూ లాస్.. కట్టడి చేసేందుకు రిస్ట్రిక్షన్లు
న్యూఢిల్లీ: బంగారం, వెండి వంటి విలువైన లోహాలను దొడ్డిదారిలో దిగుమతి చేసుకుంటున్నవారికి ప్రభుత్వం షాకిచ్చింది. చాలా మంది ట్రేడర్లు సుంకాలను ఎగ్గొట్టేందుకు ఇండియా ఫ్రీ ట్రేడ్ అగ్రిమెంట్స్ (ఎఫ్టీఏ) కుదుర్చుకున్న దేశాలకు వీటిని షిఫ్ట్ చేసి, అక్కడి నుంచి దిగుమతి చేసుకుంటున్నారు. దీంతో ప్రభుత్వం ఆదాయం కోల్పోతోంది. ఇప్పటి వరకు “ఫ్రీ” కేటగిరీలో ఉన్న ప్రీషియస్ మెటల్స్ను “రిస్ట్రిక్టెడ్” కేటగిరీకి డైరెక్టరేట్ జనరల్ ఆఫ్ ఫారిన్ ట్రేడ్ (డీజీఎఫ్టీ) మార్చింది. ఇక నుంచి వీటిని దిగుమతి చేసుకోవాలంటే ముందస్తు అనుమతి లేదా స్పెషల్ లైసెన్స్ తప్పనిసరిగా తీసుకోవాల్సి ఉంటుంది.
గతంలో ఎటువంటి ప్రత్యేక అనుమతి అవసరం లేకుండా దిగుమతి చేసుకునే వెసులుబాటు ఉంది. డీజీఎఫ్టీ జారీ చేసిన నోటిఫికేషన్ ప్రకారం, ముత్యాలు, రత్నాలు, ప్రీషియస్ మెటల్స్, వాటితో తయారైన వస్తువులు వంటి విభిన్న ఉత్పత్తుల దిగుమతులపై రిస్ట్రిక్షన్లు అమలవుతాయి. పాత కాంట్రాక్టులు, అడ్వాన్స్ పేమెంట్స్, ఇప్పటికే షిప్ అయిన సరుకులు..అన్నింటికి ఈ రిస్ట్రిక్షన్లను వర్తిస్తాయి. ఇవి తక్షణమే అమలులోకి వస్తాయి.
జ్యువెలరీ రంగం: చిన్న, మధ్య తరహా జ్యువెలర్లు దిగుమతి బంగారం, వెండిపై ఆధారపడతారు. ఈ నియంత్రణల వల్ల ముడి సరుకుల సప్లయ్ తగ్గి, ఉత్పత్తి ఖర్చులు పెరగొచ్చు.
మార్కెట్ ధరలు: బంగారం వినియోగం భారతదేశంలో అత్యధికం. కాబట్టి, ఈ రిస్ట్రిక్షన్లు బులియన్ మార్కెట్, రిటైల్ జ్యువెలరీ ధరలపై ప్రభావం చూపుతాయి.
