కైరో: ఐఎస్‌‌ఎస్‌‌ఎఫ్‌ రైఫిల్‌, పిస్టల్‌ ప్రపంచకప్‌‌లో భారత షూటర్ ఉదయ్‌‌వీర్‌ సింగ్‌ స్వర్ణ పతకం సాధించాడు. పురుషుల 10 మీటర్ల ఎయిర్‌ పిస్టల్‌ విభాగంలో అద్భుత ప్రదర్శనతో అగ్రస్థానంలో నిలిచాడు. ఫైనల్లో 240.6 పాయింట్లు సాధించి పసిడి పతకాన్ని సొంతం చేసుకున్నాడు. ప్రపంచకప్‌ వేదికపై ఉదయ్‌‌వీర్‌ ప్రదర్శన భారత షూటింగ్‌ టీమ్కు కీలక విజయంగా నిలిచింది. ఈ విజయంతో అంతర్జాతీయ స్థాయిలో తన ప్రతిభను మరోసారి చాటుకున్నాడు.
10 మీటర్ల ఎయిర్‌ పిస్టల్‌ విభాగంలో షూటర్లు లక్ష్యాన్ని అత్యంత కచ్చితత్వంతో ఛేదించాల్సి ఉంటుంది. ఫైనల్లో ప్రతి షాట్‌ పతక విజేతను నిర్ణయించడంలో కీలకమవుతుంది. అలాంటి పోటీలో ఉదయ్‌‌వీర్‌ నిలకడగా రాణించి స్వర్ణాన్ని అందుకున్నాడు. భారత షూటింగ్‌ జట్టు అంతర్జాతీయ పోటీల్లో పతకాల వేట కొనసాగిస్తున్న నేపథ్యంలో ఈ విజయం ప్రాధాన్యం సంతరించుకుంది.
