హైదరాబాద్, వెలుగు: మనదేశ ఇన్ఫ్రాస్ట్రక్చర్ సెక్టార్ దూసుకెళ్తోందని కేర్ఎడ్జ్ రేటింగ్ తాజా రిపోర్ట్ వెల్లడించింది. భౌగోళిక,- రాజకీయ సవాళ్లు ఉన్నప్పటికీ, రోడ్లు, విమానాశ్రయాలు, నౌకాశ్రయాలు, విద్యుత్ వంటి రంగాలతో పాటు డేటా సెంటర్లు, గ్రీన్ హైడ్రోజన్ వంటి కొత్త రంగాల్లో కూడా మౌలిక సదుపాయాల అభివృద్ధి వేగంగా సాగుతోందని పేర్కొంది. దీని రిపోర్ట్ ప్రకారం..ప్రభుత్వ గతి శక్తి, నేషనల్ ఇన్ఫ్రాస్ట్రక్చర్ వంటి పథకాల కారణంగా ఈ రంగం జీడీపీని భారీగా పెంచుతుంది. 2030 నాటికి దేశ జనాభాలో 42 శాతం మంది పట్టణాల్లో నివసిస్తారు.
హైవేల నిర్మాణం 2026 ఆర్థిక సంవత్సరంలో 7-–10 శాతం తగ్గుతుందని అంచనా. టోల్ రోడ్లపై వాహనాల రాకపోకలు మాత్రం 7 శాతం పెరుగుతాయి. 2028 ఆర్థిక సంవత్సరం నాటికి హైబ్రిడ్ యాన్యుటీ మోడల్ ప్రాజెక్టుల ద్వారా దాదాపు రూ. 2 లక్షల కోట్ల విలువైన రాబడి వచ్చే అవకాశం ఉంది. విమాన ప్రయాణీకుల సంఖ్య 2025 ఆర్థిక సంవత్సరం నుంచి 2027 ఆర్థిక సంవత్సరం మధ్య 7 శాతం వార్షిక వృద్ధి రేటు (సీఏజీఆర్)తో పెరుగుతుందని అంచనా.
నౌకాశ్రయాల్లో కార్గో రద్దీ 2026 ఆర్థిక సంవత్సరంలో కేవలం 2 శాతం మాత్రమే పెరుగుతుంది. కంటెయినర్ కార్గో మాత్రం 8 శాతం బలమైన వృద్ధిని నమోదు చేయవచ్చు. విద్యుత్ రంగంలో పునరుత్పాదక శక్తి వృద్ధికి దారితీస్తోంది. సౌరశక్తి, గాలి నుంచి వచ్చే విద్యుత్ 2025 ఆర్థిక సంవత్సరంలో 25 శాతం నుంచి 2030 నాటికి 35 శాతానికి పైగా పెరుగుతుంది. గ్రీన్ హైడ్రోజన్, డేటా సెంటర్లు లాంటి కొత్త రంగాల్లో రూ. 60 వేల కోట్ల పెట్టుబడులు ఆకర్షించే అవకాశం ఉందని కేర్ పేర్కొంది.
