- ఇంటర్ ఫస్టియర్ ‘ఫస్ట్ డే’ క్లాస్మిస్
- స్టూడెంట్లకు సమాచారం ఇవ్వకుండానే ఆన్ లైన్ క్లాసులు షురూ
- తీరిగ్గా సాయంత్రం ప్రెస్ నోట్ రిలీజ్ చేసిన ఇంటర్ బోర్డు
హైదరాబాద్, వెలుగు: తెలంగాణ ఇంటర్మీడియెట్ అధికారుల తీరు మారడం లేదు. వారి నిర్లక్ష్యం కారణంగా సర్కారు కాలేజీల్లో అడ్మిషన్లు తీసుకొని రెండున్నర నెలల నుంచి వేచిచూస్తున్న ఫస్టియర్ స్టూడెంట్లు ఫస్ట్ డే.. క్లాసులు మిస్సయ్యారు. కనీసం ప్రిన్సిపల్స్కూడా సమాచారం ఇవ్వకుండానే, సోమవారం ఆన్లైన్ క్లాసులను ప్రారంభించారు. దీనిపై స్టూడెంట్లు, లెక్చరర్లు మండిపడుతున్నారు. ఈ విద్యాసంవత్సరానికి సంబంధించి మే నెలాఖరులో ఇంటర్ ఫస్టడియర్ అడ్మిషన్లు ప్రారంభమయ్యాయి. సెకండియర్ స్టూడెంట్లకు జులై ఫస్ట్ నుంచి ఆన్లైన్ క్లాసులు స్టార్ట్ చేశారు. నెల రోజులుగా ఫస్టియర్స్టూడెంట్లకు ఆన్లైన్ క్లాసులు స్టార్ట్ చేయాలని స్టూడెంట్లు, పేరెంట్లు, లెక్చరర్ల నుంచి డిమాండ్ మొదలైంది. దీనిపై ఇంటర్ బోర్డు ఎలాంటి చర్యలు తీసుకోలేదు. ఈ క్రమంలోనే సోమవారం నుంచి ఫస్టియర్ క్లాసులు ప్రారంభమయ్యాయనీ సాయంత్రం ఇంటర్ బోర్డు సెక్రెటరీ ఉమర్ జలీల్ ఒక ప్రెస్ నోట్ రిలీజ్ చేశారు. దీంట్లో సాయంత్రం 3గంటల నుంచి ఆన్లైన్ క్లాసులు ప్రారంభమని పేర్కొనగా, ప్రెస్ నోట్ మాత్రం నాలుగున్నర తర్వాత పంపించడం గమనార్హం. దీంతో మెజార్టీ ఫస్టియర్ స్టూడెంట్లు ఫస్డ్ డే ఫస్ట్ క్లాస్ మిస్సయ్యారు.
మధ్యాహ్నం 3 నుంచి 6 వరకు క్లాసులు
ఫస్టియర్ స్టూడెంట్లకు ఈనెల 31 వరకూ ఆన్లైన్ పాఠాల షెడ్యూల్ రిలీజ్ చేశారు. ప్రతిరోజూ మధ్యాహ్నం 3గంటల నుంచి సాయంత్రం 6గంటల వరకూ ఆరు క్లాసులు ఉంటాయని ప్రకటించారు. సోమ, మంగళ, బుధ,గురువారాల్లో మెయిన్ సబ్జెక్టులు, శుక్రవారం లాంగ్వేజెస్, శనివారం ఉర్దూ మీడియం స్టూడెంట్లకు క్లాసులుంటాయని ప్రెస్ నోట్లో పేర్కొన్నారు.
ఫస్టియర్లో చేరేందుకు 30వరకూ గడువు
ఇంటర్ ఫస్టియర్లో చేరేందుకు ఈనెల 30 వరకూ గడువు పొడిగిస్తూ ఇంటర్ బోర్డు సెక్రెటరీ ఉమర్ జలీల్ ఉత్తర్వులు జారీచేశారు. సర్కారు,ప్రైవేటు కాలేజీలతో పాటు గురుకులాలకూ ఇది వర్తిస్తుందని చెప్పారు. ఇప్పటి వరకూ 405 సర్కారు కాలేజీల్లో లక్ష అడ్మిషన్లు దాటిన విషయం తెలిసిందే.
