గాజా/జెరూసలెం: ఇజ్రాయెల్, హమాస్ మిలిటెంట్ గ్రూప్ మధ్య కాల్పుల విరమణ ఒప్పందం అమలు ఒకరోజు వాయిదా పడింది. నాలుగు రోజులు కాల్పుల విరమణ పాటించేందుకు ఇరుపక్షాలు బుధవారం అంగీకరించాయి. డీల్లో భాగంగా హమాస్ 50 మంది బందీలను విడిచిపెట్టేందుకు ఒప్పుకోగా.. ప్రతిగా 150 మంది పాలస్తీనియన్ ఖైదీల రిలీజ్కు ఇజ్రాయెల్ ఓకే చెప్పింది. అదనంగా విడుదల చేసే ప్రతి 10 మంది బందీలకు ఒకరోజు చొప్పున కాల్పుల విరమణను పొడిగించేందుకు కూడా అంగీకరించింది.
అయితే, అగ్రిమెంట్పై ఇంకా సంతకాలు చేయకపోవడం వల్ల ఒప్పందం అమలు శుక్రవారానికి వాయిదా పడినట్లు ఇజ్రాయెల్ నేషనల్ సెక్యూరిటీ అడ్వైజర్ తాచీ హనెగ్బీ వెల్లడించారు. ఈ క్రమంలో గడిచిన 24 గంటల్లో గాజాలో హమాస్కు చెందిన 300 టార్గెట్లను ఇజ్రాయెల్ పేల్చేసింది. జబాలియాలో ఇజ్రాయెల్ సైనికులపై దాడికి బయలుదేరిన మిలిటెంట్ల గ్రూప్ను డ్రోన్ల ద్వారా గుర్తించి హతమార్చింది. బీట్ హనూన్ లోని ఒక మసీదులో, ఇంటిలో, వ్యవసాయ క్షేత్రంలో హమాస్ టన్నెళ్లను గుర్తించి ధ్వంసం చేశామని ఇజ్రాయెల్ వెల్లడించింది.
