- దోషులను కఠినంగా శిక్షించాలని సీపీఎం నాయకుల డిమాండ్
ముషీరాబాద్, వెలుగు: టీఎస్ పీఎస్సీ ప్రశ్న పత్రాల లీకేజీపై సమగ్ర విచారణ జరపాలని సీపీఎం హైదరాబాద్ నగర కార్యదర్శి శ్రీనివాస్ డిమాండ్ చేశారు. ఈ మేరకు గురువారం గోల్కొండ క్రాస్ రోడ్ లోని ఆ పార్టీ నగర కార్యాలయం నుంచి ఆర్టీసీ క్రాస్ రోడ్ వరకు నిరసన ప్రదర్శన చేపట్టారు. టీఎస్ పీఎస్సీకి వ్యతిరేకంగా నినాదాలు చేస్తూ ప్ల కార్డ్స్ ప్రదర్శించారు. ఈ సందర్భంగా శ్రీనివాస్ మాట్లాడుతూ.. ప్రశ్నపత్రాల లీకేజీ కారణంగా లక్షలాది మంది నిరుద్యోగ యువత తీవ్ర నిరాశకు గురయ్యారని అన్నారు. ఇందులో కమిషన్లోని ఇంటి దొంగలే ప్రధాన కారణంగా కనిపిస్తున్నప్పటికీ.. ఈ ఘటనకు సంబంధం ఉన్న వ్యక్తులు, సంస్థలన్నింటినీ విచారించాలని డిమాండ్ చేశారు. కమిషన్ చైర్మన్, కమిటీ సభ్యులు నైతిక బాధ్యత వహించి పదవుల నుంచి తప్పుకోవాలని, లేనిపక్షంలో ప్రభుత్వమే వారిని తొలగించాలని ఆయన డిమాండ్ చేశారు. ఇలాంటి ఘటనలు పునరావృతం కాకుండా పబ్లిక్ సర్వీస్ కమిషన్ ను ప్రక్షాళన చేయాలని డిమాండ్ చేశారు. ఈ కార్యక్రమంలో పార్టీ నగర కార్యదర్శి వర్గ సభ్యులు ఎం. దశరథ్, కె. నాగలక్ష్మి, కమిటీ సభ్యులు పాల్గొన్నారు.
