ఎండాకాలంలో చల్లగా ఉండే... మనసుకి హాయినిచ్చే ప్లేస్లకి వెళ్లాలనిపిస్తుంది. అందుకని ప్రకృతి ఒడిలో నీటి చప్పుడుతో ఆకట్టుకునే వాటర్ఫాల్స్ని చూసేందుకు వెళ్తారు చాలామంది. చుట్టూరా కొండలు, పచ్చనిచెట్లు... వాటి మధ్యలో నీళ్లని చూస్తూ సేదతీరుతారు. నేచర్ లవర్స్, నేచర్ ఫొటోగ్రాఫర్స్ ఇలాంటి ప్లేస్లని చాలా ఇష్టపడతారు. అలాంటిదే హైదరాబాద్కి దగ్గర్లో ఉన్న నాగార్జున సాగర్ ఎత్తిపోతల ఫాల్స్ తప్పనిసరిగా చూడాల్సిన ప్లేస్ ఇది. వీకెండ్లో ఇక్కడికి వెళ్తే మస్త్ ఎంజాయ్ చేయొచ్చు.
ఈ వాటర్ఫాల్ మన రాష్ట్ర సరిహద్దులో ఉన్న గుంటూరు జిల్లా (ఆంధ్రప్రదేశ్) లో ఉంది. కృష్ణానదీ ఉపనది అయిన చంద్రవంక నది మీద ఈ జలపాతం ఉంది. చంద్రవంక వాగు, నక్కల వాగు, తుమ్మల వాగు... ఈ మూడు వాగులు ఒకచోట కలిసి ఈ ఎత్తిపోతల జలపాతం ఏర్పడుతుంది. ఇక్కడ 70 అడుగుల ఎత్తు నుంచి నీళ్లు కిందకి దుంకుతాయి. ఈ నీళ్లతో ఏర్పడిన సరస్సులో మొసళ్లను పెంచుతున్నారు. ఈ జలపాతం నీళ్లు 3 కిలోమీటర్లు ప్రవహించిన తర్వాత కృష్ణా నదిలో కలుస్తాయి. ఈ వాటర్ఫాల్ని చాలా దగ్గరగా చూడాలనుకునే వాళ్లకోసం పక్కనే ఉన్న కొండ మీద వ్యూ పాయింట్ ఏర్పాటు చేసింది ఆంధ్రప్రదేశ్ టూరిజం డిపార్ట్మెంట్. అక్కడ నిల్చుని రాళ్ల దొంతరల మీద నుంచి కిందకి దుంకుతున్న నీళ్లని చూడడం బాగుంటుంది.
ట్రెక్కింగ్ కూడా..
ఏడాదంతా ఈ వాటర్ఫాల్ నీళ్లతో కళకళ లాడాలని నాగార్జున సాగర్ కుడి కాల్వ (జవహర్ కాల్వ) నుంచి నీళ్లను ఎత్తిపోతల ద్వారా పంపిస్తారు. ఫ్యామిలీ, ఫ్రెండ్స్తో కలిసి వీకెండ్లో ఇక్కడికి వెళ్తే బాగా ఎంజాయ్ చేయొచ్చు. ఈ వాటర్ఫాల్ కింద కొంచెం దూరంలో దత్తాత్రేయ స్వామి, రంగనాథస్వామి దేవాలయాలు ఉంటాయి. అంతేకాదు కొన్ని గుహలు కూడా కనిపిస్తాయి. పచ్చని చెట్లు, కొండ లతో ఉన్న ఈ ప్లేస్లో ట్రెక్కింగ్ కూడా చేయొచ్చు.
ఇలా వెళ్లాలి
ఎత్తిపోతల జలపాతం నాగార్జునసాగర్ డ్యాం నుంచి 11 కిలోమీటర్ల దూరంలో ఉంది. నల్గొండ నుంచి దాదాపు 77 కిలోమీటర్ల జర్నీ. హైదరాబాద్ నుంచి అయితే 187 కిలోమీటర్ల జర్నీ.
ఎంట్రీ టికెట్: పిల్లలకు 15 రూపాయలు. పెద్దవాళ్లకు 20 రూపాయలు. టైమింగ్స్: ఉదయం 6:30 నుంచి రాత్రి 9 గంటల వరకు. కెమెరాలు తీసుకెళ్లొచ్చు.
