వాట్సాప్‌లో కొత్త ఫీచర్.. చాట్స్, ఫొటోలు, వీడియోలకు గూగుల్ డ్రైవ్ అవసరం లేకుండ 2GB క్లౌడ్ స్టోరేజ్ ఫ్రీ !

 వాట్సాప్‌లో కొత్త ఫీచర్.. చాట్స్, ఫొటోలు, వీడియోలకు గూగుల్ డ్రైవ్ అవసరం లేకుండ 2GB క్లౌడ్ స్టోరేజ్ ఫ్రీ !

ప్రముఖ ఇన్స్టంట్ మెసేజింగ్ యాప్ వాట్సాప్  మరో కొత్త ఫీచర్‌ను తీసుకొస్తుంది. ఇప్పటివరకు వాట్సాప్ చాట్స్, ఫొటోలు, వీడియోలు, ఇతర ఫైళ్లను బ్యాకప్ చేసుకోవాలంటే గూగుల్ డ్రైవ్‌పై ఆధారపడాల్సి వచ్చేది. అయితే ఇకపై ఆ అవసరం లేకుండా వాట్సాప్ సొంత క్లౌడ్ స్టోరేజ్  తీసుకురావాలని భావిస్తోంది. ఇందులో భాగంగా  ఆండ్రాయిడ్ బీటా యూజర్లకు 2GB ఫ్రీ  క్లౌడ్ స్టోరేజ్‌ ఇస్తోంది. అంతేకాదు, బ్యాకప్ చేసిన డేటా ఇతరుల చేతికి చిక్కకుండా ఎండ్-టు-ఎండ్ ఎన్‌క్రిప్షన్ సెక్యూరిటీ  కూడా కల్పిస్తోంది. ఈ కొత్త ఫీచర్ అందుబాటులోకి వస్తే వాట్సాప్ యూజర్లకు చాట్స్ భద్రపరచుకోవడం మరింత ఈజీ కానుంది.

గూగుల్ డ్రైవ్‌తో పనిలేకుండా బ్యాకప్  
ప్రస్తుతం ఆండ్రాయిడ్ ఫోన్లలో వాట్సాప్ ఉపయోగిస్తున్నవారు  చాట్ హిస్టరీని భద్రపరచుకోవాలంటే గూగుల్ డ్రైవ్‌ను ఉపయోగిస్తున్నారు. ఫోన్ మార్చినప్పుడు, కొత్త ఫోన్ లో వాట్సాప్ ఇన్‌స్టాల్ చేసినప్పుడు లేదా అనుకోకుండా చాట్స్ డిలేట్ అయినప్పుడు ఈ బ్యాకప్ ఎంతో ఉపయోగపడుతుంది. అయితే గూగుల్ డ్రైవ్‌లో స్టోరేజ్ తక్కువగా ఉన్నవారికి కొన్నిసార్లు ఇబ్బందులు ఎదురవుతుంటాయి. ముఖ్యంగా వాట్సాప్‌లో ఎక్కువ ఫొటోలు, వీడియోలు, డాక్యుమెంట్లు ఉన్నవారి బ్యాకప్‌కు ఎక్కువ స్టోరేజ్ అవసరమవుతుంది.

ఈ సమస్యను దృష్టిలో పెట్టుకుని వాట్సాప్  సొంత క్లౌడ్ బ్యాకప్ సదుపాయాన్ని పరీక్షిస్తోంది. దీని ద్వారా యూజర్లకు చాట్‌లను నేరుగా వాట్సాప్ సర్వర్లలో భద్రపరచుకోవచ్చు. అంటే ఇకపై బ్యాకప్ కోసం తప్పనిసరిగా గూగుల్ డ్రైవ్‌నే ఉపయోగించాల్సిన అవసరం ఉండదు. అయితే గూగుల్ డ్రైవ్ సదుపాయాన్ని వాట్సాప్ తొలగించడం లేదు. కావాలంటే గతంలో లాగానే గూగుల్ డ్రైవ్‌లో బ్యాకప్ చేసుకోవచ్చు. లేదంటే కొత్త వాట్సాప్ క్లౌడ్ స్టోరేజ్‌ను సెలెక్ట్ చేసుకోవచ్చు.

2GB స్టోరేజ్ పూర్తిగా ఉచితం
ఈ కొత్త ఫీచర్‌లో హైలెట్ ఏంటంటే  2GB  క్లౌడ్ స్టోరేజ్ ఫ్రీ. వాట్సాప్  సర్వర్లలో యూజర్లకు ఈ స్టోరేజ్  ఉచితంగా కేటాయిస్తోంది. ఇందులో చాట్‌లతోపాటు వాటికి సంబంధించిన ఫొటోలు, వీడియోలు, ఇతర మీడియా ఫైళ్లను కూడా బ్యాకప్ చేసుకోవచ్చు. సాధారణంగా వాట్సాప్‌ను ఎక్కువగా ఉపయోగించేవారి ఫోన్లలో పెద్ద మొత్తంలో చాట్స్, ఫొటోలు, వీడియోలు పేరుకుపోతుంటాయి. ఇలాంటి సమయంలో వాటిని భద్రపరచుకోవడానికి ఎక్కువ స్టోరేజ్ అవసరమవుతుంది. గూగుల్ డ్రైవ్‌లో స్టోరేజ్ సరిపోని వారు లేదా  వాట్సాప్ బ్యాకప్‌ల కోసం గూగుల్ అకౌంట్లోని స్టోరేజ్‌ను ఉపయోగించకూడదనుకునే వారికి ఈ కొత్త ఫీచర్ ఉపయోగపడుతుంది.

ఎక్కువ స్టోరేజ్ కావాలంటే పెయిడ్ ప్లాన్లు
వాట్సాప్ ఉచితంగా ఇచ్చే 2GB స్టోరేజ్ సరిపోని వారికి ఎక్స్ట్రా స్టోరేజ్ ప్లాన్లను కూడా తీసుకురావాలని భావిస్తోంది. సమాచారం  ప్రకారం..
ఉచిత ప్లాన్: 2GB క్లౌడ్ స్టోరేజ్.
వాట్సాప్ ప్లస్ ప్లాన్: 100GB వరకు స్టోరేజ్.
మెటా వన్ ప్లాన్: సబ్‌స్క్రిప్షన్ ప్లాన్‌ను బట్టి 4TB వరకు స్టోరేజ్.

ఎక్కువ మొత్తంలో చాట్ హిస్టరీ, ఫొటోలు, వీడియోలు, డాక్యుమెంట్లు భద్రపరచుకోవాలనుకునే వారికి ఈ పెయిడ్ ప్లాన్లు ఉపయోగపడతాయి. అయితే ఈ ఎక్స్ట్రా స్టోరేజ్ ప్లాన్ల లభ్యత, ధరలు, నిబంధనలు ప్రాంతాన్ని బట్టి మారే అవకాశం ఉంది.

►ALSO READ | జియో సిమ్ వాడుతున్నారా? రీఛార్జ్ అయిపోయిందా ? ఇక ఇన్‌కమింగ్ కాల్స్ కట్ అవ్వొచ్చు !

బ్యాకప్‌కు ఎండ్-టు-ఎండ్ ఎన్‌క్రిప్షన్ సెక్యూరిటీ 
క్లౌడ్‌లో డేటాను భద్రపరచుకునేటప్పుడు చాలామందికి  వ్యక్తిగత సమాచారం ఇతరులకు కనిపిస్తుందేమోననే సందేహం ఉంటుంది. ముఖ్యంగా వాట్సాప్‌లో వ్యక్తిగత చాట్స్, ఫొటోలు, వీడియోలు, ముఖ్యమైన డాక్యుమెంట్లు ఉంటాయి. ఈ విషయాన్ని దృష్టిలో పెట్టుకుని వాట్సాప్ కొత్త క్లౌడ్ బ్యాకప్‌లో ఎండ్-టు-ఎండ్ ఎన్‌క్రిప్షన్ సదుపాయాన్ని అందిస్తోంది. అంటే బ్యాకప్ చేసిన డేటాను భద్రంగా ఉంచేందుకు ప్రత్యేక రక్షణ ఉంటుంది. ఈ బ్యాకప్‌ను మరింత సురక్షితంగా ఉంచుకోవడానికి రెండు మార్గాలు ఉన్నాయి.

1. పాస్‌కీ (Passkey): పాస్‌కీ సాయంతో బ్యాకప్‌కు సెక్యూరిటీ కల్పించుకోవచ్చు. ఇది సులభంగా, సురక్షితంగా గుర్తింపు ధ్రువీకరించుకునేందుకు ఉపయోగపడుతుంది.

2. 64 అంకెల ఎన్‌క్రిప్షన్ కీ: మరో మార్గంగా 64 అంకెల ప్రత్యేక ఎన్‌క్రిప్షన్ కీని ఉపయోగించవచ్చు. ఈ కీ ద్వారా బ్యాకప్ డేటాను భద్రపరచుకోవచ్చు. అయితే ఈ కీని జాగ్రత్తగా భద్రపరచుకోవాలి. దాన్ని కోల్పోతే బ్యాకప్‌ను తిరిగి పొందడంలో ఇబ్బందులు ఎదురయ్యే అవకాశం ఉంటుంది.

ప్రస్తుతం బీటా యూజర్లకే..
వాట్సాప్ ఈ కొత్త క్లౌడ్ బ్యాకప్ ఫీచర్‌ను ప్రస్తుతం ఆండ్రాయిడ్ బీటా వెర్షన్ 2.26.46.4లో పరీక్షిస్తోంది. ఎంపిక చేసిన బీటా వినియోగదారులకు మాత్రమే ఈ ఆప్షన్ కనిపిస్తోంది. అంతేకాకుండా ఈ ఫీచర్‌ను ఒకేసారి అందరికీ కాకుండా దశలవారీగా విడుదల చేస్తున్నారు. కాబట్టి బీటా వెర్షన్ ఉపయోగిస్తున్న ప్రతి ఒక్కరికీ వెంటనే ఈ సదుపాయం కనిపించకపోవచ్చు.

సాధారణ వినియోగదారులందరికీ ఈ ఫీచర్ ఎప్పటి నుంచి అందుబాటులోకి వస్తుందనే విషయంపై వాట్సాప్ ఇంకా అధికారిక ప్రకటన చేయలేదు. 

వాట్సాప్ యూజర్లకు ఎంతవరకు ఉపయోగం?
ఈ కొత్త ఫీచర్ అందరికీ అందుబాటులోకి వస్తే ముఖ్యంగా ఎక్కువగా వాట్సాప్ ఉపయోగించే వారికి ప్రయోజనం ఉంటుంది. ఫోన్ మార్చినప్పుడు పాత చాట్స్ తిరిగి పొందడం, ముఖ్యమైన చాట్స్ భద్రపరచుకోవడం మరింత ఈజీ అవుతుంది. అలాగే గూగుల్ డ్రైవ్ స్టోరేజ్ సమస్యతో ఇబ్బంది పడేవారికి మరో ప్రత్యామ్నాయం అందుబాటులోకి వస్తుంది. ఉచితంగా లభించే 2GB స్టోరేజ్ కూడా చాలామంది సాధారణ యూజర్లకు ఉపయోగపడే అవకాశం ఉంది.

మొత్తానికి వాట్సాప్ తీసుకొస్తున్న ఈ కొత్త క్లౌడ్ బ్యాకప్ సదుపాయం యూజర్లకు మంచి మార్పుగా చెప్పుకోవచ్చు. ఇప్పటివరకు గూగుల్ డ్రైవ్‌పై ఆధారపడిన ఆండ్రాయిడ్ యూజర్లకు ఇకపై వాట్సాప్ సొంత క్లౌడ్ స్టోరేజ్ మరో మార్గంగా అందుబాటులోకి రానుంది. అయితే ఈ ఫీచర్ సాధారణ యూజర్లకీ ఎప్పుడు వస్తుందో వేచి చూడాలి.