లీడర్ల కన్నా ఆఫీసర్లే అవినీతిపరులు..ఎమ్మెల్యే అనిరుధ్ రెడ్డి సంచలన వ్యాఖ్యలు

లీడర్ల కన్నా ఆఫీసర్లే అవినీతిపరులు..ఎమ్మెల్యే అనిరుధ్ రెడ్డి సంచలన వ్యాఖ్యలు
  • ఎమ్మెల్యేగా చెప్పినా విరాసత్ చేయలే
  • రూ.15 వేలు లంచం ఇవ్వగానే పని చేసిన్రు
  • రోడ్ల కాంట్రాక్టర్ల నుంచి 20 శాతం కమీషన్లు
  • ఆఫీసర్ల లంచాలతోనే సర్కారుకు చెడ్డపేరు
  • డబుల్ బెడ్రూం ఇండ్లకు బీఆర్ఎస్ లీడర్లు 
  • రూ.3 లక్షల దాకా వసూలు చేశారని కామెంట్

మేడ్చర్ల, వెలుగు: రాజకీయ నాయకుల కంటే ఆఫీసర్లే ఎక్కువ అవినీతికి పాల్పడుతున్నారని జడ్చర్ల ఎమ్మెల్యే జనంపల్లి అనిరుధ్​రెడ్డి ఆరోపించారు. మంగళవారం జడ్చర్ల పట్టణంలో జరిగిన ఓ కార్యక్రమంలో మాట్లాడిన ఆయన రెవెన్యూ అధికారుల పనితీరుపై అసంతృప్తి వ్యక్తం చేశారు. ఓ కుటుంబానికి న్యాయబద్ధంగా జరగాల్సిన విరాసత్​ కోసం రూ.15 వేలు లంచం తీసుకున్నారని అన్నారు. ఎమ్మెల్యే హోదాలో తాను చెప్పినా అధికారులు పట్టించుకోలేదని, లంచం తీసుకున్న తర్వాతే పని చేశారని పేర్కొన్నారు. 

మాచారం గ్రామ శివారులోని అసైన్డ్​ భూమిని నిబంధనలకు విరుద్ధంగా రిజిస్ట్రేషన్​ చేశారని, తాను స్వయంగా గుర్తించి స్పందించినా అధికారులు పట్టించుకోలేదని అన్నారు. అక్రమంగా రిజిస్ట్రేషన్​ చేయించుకున్న వ్యక్తులు కోర్టు మెట్లెక్కడంతో సమస్య జటిలమైందని తెలిపారు. ప్రభుత్వానికి ముందుగానే డబ్బులు కట్టినప్పటికీ మట్టి తవ్వుకునే కాంట్రాక్టర్లను అధికారులు బెదిరిస్తున్నారని మండిపడ్డారు. రోడ్లు వేసే కాంట్రాక్టర్లను 20 శాతం కమిషన్​ కోసం బెదిరిస్తున్నారని ఆరోపించారు. 

ఈ పరిస్థితి మొత్తం ప్రభుత్వానికి చెడ్డపేరు తెస్తుందని అన్నారు. మూడేండ్ల కాంగ్రెస్​ ప్రభుత్వ హయాంలో జడ్చర్ల నియోజకవర్గంలో ఒక్క భూ కబ్జా కూడా జరుగలేదని పేర్కొన్నారు. ఇందిరమ్మ ఇండ్ల మంజూరులో తమ పార్టీ కార్యకర్తలు డబ్బులు తీసుకోలేదని చెప్పారు. బీఆర్​ఎస్​ ప్రభుత్వ హయాంలో మంజూరైన డబుల్​ రూమ్​ ఇండ్లలో ఆ పార్టీ కార్యకర్తలు లబ్ధిదారుల నుంచి ఒక్కో ఇంటికి రూ.2 నుంచి రూ.3 లక్షలు వసూలు చేసిన దాఖలాలు ఉన్నాయని ఆరోపించారు. దీనిపై మాజీ మంత్రి లక్ష్మారెడ్డి సమాధానం చెప్పాలని డిమాండ్​ చేశారు.