మెదక్/సంగారెడ్డి, వెలుగు: ఓట్ చోరీకి వ్యతిరేకంగా సీఈసీ జ్ఞానేశ్ కుమార్ రాజీనామా చేయాలనే డిమాండ్ తో కాంగ్రెస్ అగ్రనేతలు చేపట్టిన ఆందోళనకు మద్దతుగా సంగారెడ్డిలో టీపీసీసీ వర్కింగ్ ప్రెసిడెంట్ జగ్గారెడ్డి, టీజీఐఐసీ మాజీ చైర్మన్ నిర్మల బుధవారం రాత్రి చేపట్టిన దీక్ష గురువారం రెండో రోజు కొనసాగింది. జగ్గారెడ్డి దీక్షకు భద్రాచలం మాజీ ఎమ్మెల్యే వీరన్న, కాంగ్రెస్ నాయకులు చంద్రశేఖర్ రెడ్డి, పాజి అనంత కిషన్, మున్సిపల్ కౌ న్సిలర్లు సంఘీభావం తెలిపారు.
ఈ సందర్భంగా జగ్గారెడ్డి మాట్లాడుతూ.. ఎన్నికల కమిషన్ను అనుకూలంగా మార్చుకొని బీజేపీ పలు రాష్ట్రాల్లో ఎన్నికల వ్యవస్థను తమకు అనుకూలంగా మార్చుకుందని విమర్శించారు. ఎన్నికల కమిషన్ సహకారంతోనే బీజేపీ మూడుసార్లు కేంద్రంలో అధికారంలోకి వచ్చిందని, ఈ అంశంపై రాహుల్ గాంధీ అనేక సందర్భాల్లో ప్రశ్నలు లేవనెత్తారని గుర్తు చేశారు. ఇది కాంగ్రెస్ రాజకీయ పోరాటం కాదని, ప్రజల ఓటు హక్కును కాపాడే రాజకీయ యుద్ధమని తెలిపారు.
