ముంబై: టైర్ 2, టైర్ 3 సిటీలలో పెరుగుతున్న కన్జంప్షన్ ఆ సిటీలలో కొత్త జాబ్స్ రావడానికి సాయపడుతోంది. ముఖ్యంగా రాబోయే పండగ సీజన్లో కొనుగోళ్లు పెరుగుతాయనే అంచనాలుండటంతో భారీ సంఖ్యలో టెంపరరీ జాబ్స్ వస్తాయని స్టాఫింగ్ కంపెనీలు చెబుతున్నాయి. జైపూర్, అహ్మదాబాద్, కోయంబతూర్, లక్నో, వదోదర, సూరత్, భుబనేశ్వర్, భోపాల్, లూథియానా, చండీగఢ్, వైజాగ్ వంటివి ఈ జాబితాలో ఉన్నట్లు మాన్పవర్, రాన్స్టాడ్, క్వెస్, టీమ్లీజ్, యాడెకో, పెర్సొల్కెల్లీ వంటి స్టాఫింగ్ కంపెనీలు పేర్కొంటున్నాయి. కిందటేడాది పండగ సీజన్తో పోలిస్తే టైర్2, టైర్3 సిటీలలో ఈసారి టెంపరరీ వర్కర్లకు డిమాండ్ రెట్టింపైనట్లు మాన్ పవర్ కంపెనీ సీనియర్ డైరెక్టర్ అలోక్ కుమార్ చెప్పారు.
ఈ–కామర్స్, బీఎఫ్ఎస్ఐ, రిటెయిల్, కన్జూమర్ ప్రొడక్ట్స్, మాన్యుఫాక్చరింగ్, ఐటీ, ఫార్మా అండ్ హెల్త్కేర్, పేమెంట్ గేట్వే, లాజిస్టిక్స్, వేర్హౌసింగ్, ఫుడ్, టెలికం ఇండస్ట్రీలు కొత్త జాబ్స్ ఇస్తున్నాయని అన్నారు. ఆగస్టు చివరి నుంచి డిసెంబర్ మధ్య కాలంలో చిన్న సిటీలలో ఏకంగా 6 నుంచి 7 లక్షల కొత్త ఉద్యోగాలు వచ్చే ఛాన్స్ ఉందని పేర్కొన్నారు.
టైర్2, టైర్3 సిటీలలో టెంపరరీ స్టాఫ్కు డిమాండ్ ఈ ఏడాది 20–25 శాతం పెరుగుతందని అంచనా వేస్తున్నట్లు ర్యాండ్స్టాడ్ టెక్నాలజీస్ చీఫ్ కమర్షియల్ ఆఫీసర్ యెషాబ్ గిరి వెల్లడించారు. వేర్హౌస్, లాస్ట్– మైల్ డెలివరీ, కాల్ సెంటర్ల ఉద్యోగులకు డిమాండ్ ఎక్కువగా ఉందని పేర్కొన్నారు. రూరల్ ఏరియాలలో కన్జంప్షన్ పెరుగుదల వల్లే ఈ ట్రెండ్ వచ్చిందని వివరించారు. ఫ్యాషన్, ప్యాకేజ్డ్ గూడ్స్, కాస్మెటిక్స్, లైఫ్స్టైల్ యాక్సెసరీస్ వంటి వాటికి రూరల్ ఏరియాలలో గట్టి డిమాండ్ ఉండటంతో రిటెయిలర్లు ఆ మార్కెట్లపై ఫోకస్ పెడుతున్నారని యెషాబ్ గిరి చెప్పారు. తమ ఉద్యోగులలో 63 శాతం మంది చిన్న పట్టణాలలోనే ఉన్నట్లు క్వెస్ కార్ప్ చెబుతోంది.
