- గవర్నర్కు లేఖ పంపిన నందకుమార్ రెడ్డి
- పీజీ మెడికల్ విద్యార్థినికి 13 మార్కులు కలపడంపై దుమారం
- విజిలెన్స్ ఎంక్వైరీ, రిపోర్టు.. సర్కార్ సీరియస్.. ఆ వెంటనే రాజీనామా
హైదరాబాద్, వెలుగు: కాళోజీ హెల్త్ యూనివర్సిటీ వీసీ డాక్టర్ నందకుమార్ రెడ్డి తన పదవికి రాజీనామా చేశారు. ఈ మేరకు శుక్రవారం రాష్ట్ర గవర్నర్కు లేఖ పంపారు. కొద్దిరోజులుగా వర్సిటీలో పీజీ మెడికల్ ఎగ్జామ్స్ వ్యాల్యుయేషన్ ప్రక్రియపై తీవ్ర ఆరోపణలు వస్తున్నాయి. నిబంధనలకు విరుద్ధంగా మార్కులు కలిపారని, అక్రమాలు జరిగాయని ప్రచారం జరుగుతున్నది. దీనిపై ప్రభుత్వం విజిలెన్స్ విచారణకు ఆదేశించడం, స్వయంగా సీఎం రేవంత్ రెడ్డి, మంత్రి దామోదర రాజనర్సింహ సీరియస్ కావడంతో వీసీ ఈ నిర్ణయం తీసుకున్నట్లు తెలుస్తున్నది. వర్సిటీలో ఐదుగురు విద్యార్థులకు నిబంధనలకు విరుద్ధంగా మార్కులు వేసి పాస్ చేయించారన్న ఆరోపణలు వచ్చాయి. ఈ వ్యవహారంలో లక్షల రూపాయలు చేతులు మారాయని ప్రచారం జరిగింది. దీంతో రాష్ట్ర ప్రభుత్వం విజిలెన్స్ ఎంక్వైరీకి ఆదేశించింది. విజిలెన్స్ విచారణ పూర్తయి, ప్రభుత్వానికి రిపోర్టు చేరింది. ఈ విషయంపై మాజీ మంత్రి హారీశ్ రావు స్పందించారు. కాళోజీ అక్రమాలపై చర్యలు తీసుకోవాలని రాష్ట్రపతి, గవర్నర్ కు లెటర్ రాశారు. అక్రమాలు జరిగినట్లు తేలితే ఎవరిని ఉపేక్షించబోమని మంత్రి దామోదర రాజనర్సింహ హెచ్చరించారు.
వర్సిటీ వ్యవహారంపై సీఎం ఆగ్రహం
కాళోజీ వర్సిటీపై జరుగుతున్న ప్రచారంపై శుక్రవారం సీఎం రేవంత్ రెడ్డి ఆగ్రహం వ్యక్తం చేశారు. పరీక్ష పేపర్ల వ్యాల్యుయేషన్ లో అవకతవకలు, ఇష్టారీతిగా ఇన్ చార్జ్ల నియామకం తదితర ఘటనలపై వస్తున్న ఆరోపణలపై సీఎం ఆరా తీశారు. ఈ అంశంపై వైద్యారోగ్య శాఖ ఉన్నతాధికారుల నుంచి సీఎం వివరణ కోరారు. ఉన్నతమైన వర్సిటీలో అస్తవ్యస్త పరిస్థితులకు కారణమైన వారిపై కఠిన చర్యలు తీసుకోవాలని సీఎం ఆదేశించారు. అయితే సీఎం స్పందించిన గంటలోపే.. వీసీ రాజీనామా చేస్తున్నట్లు వార్తలు రావడం చర్చనీయాంశంగా మారింది.
ఆయన రాజీనామా బాధాకరం: బాధితురాలు
ఈ వివాదంపై బాధితురాలు డాక్టర్ హిమజ స్పందించారు. తాను పీజీ ఫైనల్ ఇయర్ పరీక్షల్లో అన్ని పేపర్లు బాగా రాశానని, అయితే ఎవరో కావాలనే తనను ఫెయిల్ చేయాలనే కుట్రతో కరెక్ట్ ఆన్సర్లను పెన్ తో కొట్టేశారని ఆమె ఆవేదన వ్యక్తం చేశారు. దీనిపై ఫిర్యాదు చేయగా.. వీసీ నందకుమార్ రెడ్డి సానుకూలంగా స్పందించి విచారణ కమిటీ వేసి తనకు న్యాయం చేశారని, తనకు న్యాయం చేసిన వీసీ.. ఇప్పుడు వివాదంలో ఇరుక్కొని రాజీనామా చేయడం బాధాకరమన్నారు.
ఐదుగురు కాదు.. ఒక్క అమ్మాయికే
ఐదుగురు విద్యార్థులకు మార్కులు వేసినట్టు జరుగుతున్న ప్రచారం తప్పని వర్సిటీ అధికారులు చెబుతున్నారు. కామినేని నార్కట్‌‌‌‌పల్లి కాలేజీకి చెందిన ఓ దివ్యాంగ విద్యార్థిని పేపర్ లో కరెక్ట్ ఆన్సర్లు రాసినా, ఎవరో పెన్తో ఇంటు మార్క్ పెట్టి కొట్టేశారని అంటున్నారు. వ్యాల్యుయేషన్ చేసే ప్రొఫెసర్ కు అనుమానం వచ్చి, వర్సిటీ అధికారులను సంప్రదించారని, దీంతో ఎంక్వైరీ చేయగా, సదరు అమ్మాయికి చెందిన మూడో పేపర్ లో కూడా కొన్ని ఆన్సర్లపై ఇంటూ మార్కు ఉన్నట్లు గుర్తించారు. అయితే, మూడో పేపర్ ను వ్యాల్యుయేషన్ చేసిన ప్రొఫెసర్లు మాత్రం ఇంటూ మార్క్ ఉన్నప్పటికీ.. వ్యాల్యుయేషన్ చేస్తూ మార్కులు వేశారు. ఫస్ట్ పేపర్ ప్రొఫెసర్ మాత్రం వర్సిటీకి కంప్లైంట్ చేశారు. దీంతో మరో ఇద్దరు ప్రొఫెసర్లతో వ్యాల్యుయేషన్ చేయించి యావరేజ్ మార్కులు 13 కలిపినట్లు చెబుతున్నారు.
అనుమానాలెన్నో...
పేపర్ వ్యాల్యుయేషన్, మార్కులు కలపడంపై అనేక అనుమానాలు వ్యక్తం అవుతున్నాయి. సదరు విద్యార్థిని పేపర్ వాల్యుయేషన్ కోసం సొంత కాలేజీ ప్రొఫెసర్‌‌‌‌కే ఎలా వెళ్లింది? గతంలో తనను లైంగికంగా వేధించి సస్పెండ్ అయిన ఓ ప్రొఫెసరే.. కక్షతో తన పేపర్ లో ఆన్సర్లు కొట్టేయించి ఉంటారని సదరు విద్యార్థిని అనుమానిస్తున్నట్టు అధికారులు చెబుతున్నారు. ఇందులో నిజమెంత? ఆ పేపర్లో పెన్తో ఇంటు మార్క్ విద్యార్థిని కొట్టిందా? స్కానింగ్ సెంటర్‌ లో జరిగిందా? ఇన్విజిలేటర్ వేశారా? వేధించిన ప్రొఫెసర్ హస్తం ఏమైనా ఉందా? అన్నది తేల్చాల్సి ఉంది. వీటిపై స్పష్టత వస్తే... అసలు కాళోజీ వర్సిటీలో ఏమి జరిగిందో స్పష్టం అవుతుందనే అభిప్రాయాలు వ్యక్తం అవుతున్నాయి.
విచారణకు సిద్ధం: వీసీ
రాజీనామాకు ముందు వీసీ నందకుమార్ రెడ్డి మీడియా సమావేశంలో ఆవేదన వ్యక్తం చేశారు. అక్రమాలు జరిగాయనే ఆరోపణలను వీసీ ఖండించారు. కేవలం ఒక్క విద్యార్థిని (దివ్యాంగురాలు) విషయంలోనే తాము మానవతా దృక్పథంతో వ్యవహరించామని, ఆమె పరీక్షలో సరైన సమాధానాలు రాసినప్పటికీ స్థానిక కాలేజీలో ఎవరో రాజకీయాలు లేదంటే వేధింపుల కారణంగా పెన్ తో వాటిపై ఇంటు మార్క్పెట్టి కొట్టేశారని, అందుకే కమిటీ వేసి నిపుణుల సమక్షంలో ఆ జవాబులను మాత్రమే వ్యాల్యుయేషన్ చేయించి న్యాయం చేశామని స్పష్టం చేశారు. మాజీ మంత్రి హరీశ్ రావు నిరాధార ఆరోపణలు చేస్తున్నారని, తాను ఎలాంటి ఫర్నిచర్ ఎత్తుకెళ్లలేదని, వీసీ పదవి ఆశించిన కొందరు వ్యక్తులే తనపై ఈ కుట్రలు చేస్తున్నారని ఆయన ఆవేదన వ్యక్తం చేశారు.
