- అమెరికా అధ్యక్ష రేసులోభారత సంతతి మహిళ
- వృద్ధాప్య సమస్యలతో బాధపడుతున్న బైడెన్
- పార్కిన్సన్స్ వ్యాధికి చికిత్స తీసుకుంటున్నట్టు వార్తలు
- ఆయన స్థానంలో ప్రెసిడెంట్ రేసులోకి కమలా హారిస్తోపాటు మరికొందరు
న్యూయార్క్: అమెరికాలో ప్రస్తుతం ఎలక్షన్ ఫీవర్ నడుస్తోంది. 2024 నవంబర్‌ 5న జరగబోయే అధ్యక్ష ఎన్నికల కోసం డెమొక్రాట్, రిపబ్లికన్ పార్టీలు హోరాహోరీగా తలపడుతున్నాయి. డెమొక్రాట్ అభ్యర్థిగా ప్రస్తుత అధ్యక్షుడు జోబైడెన్, రిపబ్లికన్ పార్టీ తరఫున మాజీ అధ్యక్షుడు డొనాల్డ్ ట్రంప్ బరిలో నిలిచారు. అయితే, ఇటీవల జరిగిన చర్చల్లో ట్రంప్ దూసుకుపోగా.. జోబైడెన్ తడబడ్డారు.
ఆయన వృద్ధాప్య సమస్యలతో బాధపడుతున్నట్టు డెమోక్రటిక్ పార్టీలో చర్చ నడుస్తోంది. బైడెన్ మానసిక పరిస్థితి బాగాలేదని, ఆయన ప్రెసిడెంట్రేసు నుంచి తప్పుకోవాలని రిపబ్లికన్లు చురకలంటిస్తున్నారు. బైడెన్కు స్థానంలో మరో వ్యక్తికి అవకాశం ఇస్తే మంచిదని సొంత పార్టీ నేతలు కూడా అభిప్రాయపడుతున్నారు. ఈ నేపథ్యంలో చివరివరకు ఆయన స్థానాన్ని ఆ దేశ వైస్ ప్రెసిడెంట్, భారతీయ మూలాలున్న కమలా హారిస్ భర్తీ చేస్తుందనే వార్తలు వినిపిస్తున్నాయి.
ఆమెతోపాటు మరో ఐదుగురి పేర్లుకూడా తెరపైకి వచ్చాయి. బైడెన్ స్థానాన్ని హారిస్తోపాటు మిషిగాన్ గవర్నర్ విట్మెర్, కాలిఫోర్నియా గవర్నర్ గావిన్ న్యూసోమ్, ఇల్లినాయీ గవర్నర్ జేబీ ప్రిట్జ్కర్, పెన్సిల్వేనియా గవర్నర్ జోష్ షాపిరో, మిన్నెసోటా కాంగ్రెస్ సభ్యుడు డీన్ ఫిలిప్స్ భర్తీ చేయగలరని డెమోక్రాట్లు అభిప్రాయపడుతున్నారు. ఇందులో ట్రంప్ను ఎదుర్కొనే సత్తా కమలా హారిస్కు ఎక్కువగా ఉందని అంటున్నారు. కాగా, భారతీయ సంతతి మహిళ కావడంతోపాటు నల్లజాతీయురాలైన కమల హారిస్‌‌ను డెమోక్రటిక్ అభ్యర్థిగా ప్రకటిస్తే.. ప్రెసిడెంట్ ఎలక్షన్స్‌‌లో బాగా కలిసొస్తుందని కొందరు రాజకీయ నిపుణులు విశ్లేషిస్తున్నారు.
సర్వేలూ హారిస్వైపే మొగ్గు
మాజీ అధ్యక్షుడు ట్రంప్పై ప్రస్తుత అధ్యక్షుడు బైడెన్కంటే కమలా హారిస్ అయితేనే విజయం సాధించే అవకాశాలు ఎక్కువగా ఉన్నాయని పలు సర్వేలు కూడా చెబుతున్నాయి. ఈ నెల 2న విడుదలైన సీఎన్ఎన్ పోల్ ప్రకారం.. ట్రంప్ కంటే కేవలం 2% మాత్రమే హారిస్వెనుకంజలో ఉండగా.. బైడెన్ 6% వెనుకబడి ఉన్నారు.
ఈ పోల్లో ట్రంప్కు 47శాతం ఓట్లు రాగా.. హారిస్కు 45%, బైడెన్కు 41 శాతం పోలయ్యాయి. అలాగే, రాయిటర్స్ ఇప్సోస్ సర్వేలో హారిస్ 42% ఓట్లతో ట్రంప్తో సరిసమానంగా నిలిచారు. బైడెన్ తప్పుకొని ఇతర డెమోక్రాట్లు రేసులో నిలిస్తే ఓటరు అభిప్రాయాలు మారుతాయని ఒక పోల్‌‌స్టర్ చెప్పారు.
బైడెన్కు పార్కిన్సన్స్?
అమెరికా అధ్యక్షుడు జో బైడెన్ ఆరోగ్య పరిస్థితిపై అనుమానాలు వెల్లువెత్తుతున్న వేళ వైట్హౌస్కు ఓ పార్కిన్సన్స్ ఎక్సపర్ట్ రావడం కలకల రేపింది. ఈ ఏడాది బైడెన్ ఆ డాక్టర్‌‌ను కలిసినట్టు వైట్హౌస్లాగ్ బుక్ ద్వారా బయటపడింది. దీంతో అధ్యక్షుడు నాడీ వ్యవస్థకు సంబంధించిన సమస్యకు చికిత్స తీసుకుంటున్నారనే ఊహాగానాలు చక్కర్లు కొడుతున్నాయి.
అందుకే ఆయన తడబాటుకు గురవుతున్నారని చర్చ నడుస్తోంది. కాగా, ఈ ఊహాగానాలను వైట్హౌస్ వర్గాలు ఖండించాయి. బైడెన్కు ఎలాంటి ఆరోగ్య సమస్యలు లేవని, ఆయన ఎలాంటి చికిత్స పొందడం లేదని తెలిపాయి. జనరల్ చెకప్లో భాగంగానే డాక్టర్లు వైట్హౌస్కు వచ్చినట్టు పేర్కొన్నాయి.
