- కామారెడ్డి జిల్లాలో ఒక్క ఎకరాకు కూడా నీళ్లు రాలే
- పనులు చేయకున్నా కాంట్రాక్టర్‌‌కు పైసలు ముట్టినయ్‌
- ఈ విషయం చెప్పినందుకు బీఆర్ఎస్సోళ్లు నన్ను టార్గెట్ చేస్తరు
- పనులు కొనసాగిస్తారా? ప్రత్యామ్నాయంగా నీళ్లిస్తరా ప్రభుత్వం చెప్పాలి
- బీసీ రిజర్వేషన్ల విషయంలో మొదటి ద్రోహి బీజేపీనే..
- నన్ను కుటుంబం నుంచి పంపి కొందరు శునకానందం పొందుతున్నరు
- కామారెడ్డి జిల్లా జాగృతి జనం బాటలో కవిత కామెంట్స్
హైదరాబాద్ / కామారెడ్డి, వెలుగు: కాంట్రాక్టర్ల కోసమే కాళేశ్వరం పనులు చేపట్టినట్లుగా ఉన్నదని, 21, 22 ప్యాకేజీలతో కామారెడ్డి, నిజామాబాద్ జిల్లాల్లో ఒక్క ఎకరానికి కూడా నీళ్లు రాలేదని తెలంగాణ జాగృతి అధ్యక్షురాలు, ఎమ్మెల్సీ కవిత ఆరోపించారు. ఈ విషయం చెబితే బీఆర్ఎస్ వాళ్లు తన మీద నోరు పారేసుకుంటారని అన్నారు. కాళేశ్వరం పనులను కొనసాగిస్తారా? లేదంటే ప్రత్యామ్నాయంగా కామారెడ్డికి నీళ్లు తెస్తారా? అనేది ప్రభుత్వం చెప్పాలని డిమాండ్ చేశారు. బీసీ రిజర్వేషన్ల బిల్లు ఆమోదించాలనే డిమాండ్తో శుక్రవారం జాగృతి నేతలు, కార్యకర్తలతో కలిసి కామారెడ్డి రైల్వే స్టేషన్ సమీపంలో రైల్వే ట్రాక్‌పై కవిత బైఠాయించారు. దీంతో సిర్నపల్లి –ఇందల్వాయి మధ్య దేవగిరి ఎక్స్ ప్రెస్ రైలు నిలిచిపోయింది. రంగంలోకి దిగిన పోలీసులు కవితతోపాటు ఆమె అనుచరులను అరెస్ట్ చేసి.. హైదరాబాద్‌‌‌‌‌‌‌‌కు తరలించారు. ఈ క్రమంలో పోలీసులకు, జాగృతి కార్యకర్తలకు మధ్య జరిగిన పెనుగులాటలో కవిత చేతికి స్వల్ప గాయమైంది. అంతకుముందు ఆమె మీడియా సమావేశంలో మాట్లాడారు. “ప్యాకేజ్ 21, 22 పనులను కాంట్రాక్టర్ల కోసమే చేపట్టినట్లు ఉంది. కాంట్రాక్టర్లకు డబ్బులు అందాయి తప్ప ప్రజలకు మేలు జరగలేదు. ప్యాకేజ్ 22 ద్వారా కామారెడ్డి నీళ్లిచ్చేందుకు ప్లాన్ చేశారు. రూ.1,446 కోట్లు అవసరమైతే రూ. 450 కోట్లు మాత్రమే ఇచ్చారు. మొత్తం 1500 ఎకరాల ల్యాండ్ అవసరమైతే రెండో వంతు భూసేకరణ కూడా చేయలేదు. కాళేశ్వరంతో నిజామాబాద్, కామారెడ్డికి నీళ్లు రాలే. ఒక్క సీజన్ లో మాత్రమే హల్ది వాగు ద్వారా నీళ్లిచ్చారు. ఈ విషయం చెబితే బీఆర్ఎస్ వాళ్లు నా మీద నోరు వేసుకొని పడిపోతారు” అని వ్యాఖ్యానించారు.
బీసీ రిజర్వేషన్లపై కొట్లాడ్తం..
కామారెడ్డి నుంచే కాంగ్రెస్ బీసీ డిక్లరేషన్ ప్రకటించిందని, ఇక్కడి లీడర్లు చెబితే నమ్మరని..కర్నాటక సీఎం సిద్ధరామయ్యను తీసుకొచ్చి బీసీ డిక్లరేషన్ ప్రకటించారని కవిత గుర్తు చేశారు. కానీ అదే కాంగ్రెస్.. అసెంబ్లీ ఎన్నికల్లో ఉమ్మడి నిజామాబాద్ బీసీలకు ఒక్క సీటు కూడా ఇవ్వలేదని అన్నారు. అయినప్పటికీ ప్రజలు వాళ్ల మాటలు నమ్మి గెలిపించారన్నారు. కామారెడ్డి డిక్లరేషన్ యథావిధిగా అమలు చేయాలనే డిమాండ్తో రాష్ట్రవ్యాప్తంగా రౌండ్ టేబుల్ సమావేశాలు ఏర్పాటు చేశామని తెలిపారు. “మా పోరాటం ఫలితంగా బీసీ రిజర్వేషన్లపై రెండు బిల్లులు తెచ్చారు. కానీ అవి రాష్ట్రపతి వద్ద ఆగిపోయాయి. ఆ తర్వాత మేం రైల్ రోకో చేస్తామని వార్నింగ్ ఇస్తే మళ్లీ ఆర్డినెన్స్ తెచ్చారు. కానీ అది కూడా గవర్నర్ దగ్గరే ఆగిపోయింది. ఈ విషయంలో బీజేపీ, కాంగ్రెస్ పై మేం కొట్లాడుతూనే ఉంటాం. బీసీ రిజర్వేషన్ల సాధనలో జాగృతి ముందుంటుంది. ఎంబీసీలకు మినిస్ట్రీ ఇస్తామని కాంగ్రెస్ ప్రకటించింది. దాని జోలికి కూడా పోలేదు. రేవంత్‌‌‌‌‌‌‌‌రెడ్డిని బీసీ ద్రోహిగా మేం ఇప్పటికే ప్రకటించాం. ఆయన ఇప్పటి వరకు ఈ అంశంపై ప్రధాని మోదీకి కనీసం ఒక్క లేఖ కూడా రాయలేదు. అఖిలపక్షాన్ని ఢిల్లీకి తీసుకెళ్లలేదు. ఢిల్లీలో 2 సార్లు ధర్నా చేస్తే రాహుల్ గాంధీ రాలేదు. వాళ్ల ధర్నాల నెట్ రిజల్ట్ జీరో ఉంది” అని అన్నారు.
ఇంత అర్జెంట్‌‌‌‌‌‌‌‌గా పంచాయతీ ఎన్నికలు ఎందుకు?
రాష్ట్రంలో ఇంత అర్జెంట్ గా పంచాయతీ ఎన్నికలు నిర్వహించాల్సిన అవసరం ఏముందని కవిత ప్రశ్నించారు. తమిళనాడులో జయలలిత 9 ఏండ్లు ఎన్నికలను ఆపి రిజర్వేషన్లు సాధించారని చెప్పారు. కేంద్రం నుంచి నిధులు రావనుకుంటే దాని గురించి వారితో మాట్లాడకుండా ఎన్నికలకు వెళ్లడం కరెక్ట్ కాదన్నారు. బీసీలకు న్యాయం చేయాలని కాంగ్రెస్‌‌‌‌‌‌‌‌కు లేదని, అందుకే ఇంత తొందరగా ఎన్నికలు పెడుతున్నారని, పార్టీలపరంగా సీట్లు అంటే కాంగ్రెస్ ఇచ్చిన చోటే బీఆర్ఎస్, బీజేపీలు బీసీలకు సీట్లు ఇస్తాయా అని ఆమె ప్రశ్నించారు. బీసీ రిజర్వేషన్ల విషయంలో మొదటి ద్రోహి బీజేపీ అయితే.. రెండో ద్రోహి కాంగ్రెస్ అని, ఈ రెండు పార్టీలను జాగృతి తరఫున ప్రశ్నిస్తూనే ఉంటామన్నారు. తమది ఉద్యమం, రాజకీయం అనే కమిట్‌‌‌‌‌‌‌‌మెంట్ ఉన్న కుటుంబం అని, తనను కుటుంబం నుంచి కుట్రచేసి పంపించారని, అందుకు బాధగా ఉందని చెప్పారు. తనను పార్టీకి దూరం చేయించినవారు శునకానందం పొందుతున్నారని మండిపడ్డారు. అయినా..తాను మరో కుటుంబం అనుకునే తెలంగాణ కోసం పనిచేస్తూనే ఉంటానని కవిత స్పష్టం చేశారు. జైల్లో ఉన్నప్పుడు పిల్లల కన్నా కూడా తన అమ్మ ఆరోగ్యం గురించే ఎక్కువ బాధపడ్డానని చెప్పారు.
కవితపై రైల్వే పోలీసుల కేసు
బీసీలకు 42 % రిజర్వేషన్లు అమలు చేయాలని డిమాండ్ చేస్తూ కామారెడ్డి జిల్లా కేంద్రంలో రైలు పట్టాలపై బైఠాయించిన కవితను పోలీసు లు అరెస్ట్ చేశారు. అక్రమంగా రైలు అడ్డుకోవడం, పోలీసులపై దాడి లాంటి ఆరోపణలతో నిజామాబాద్ రైల్వే పోలీస్ స్టేషన్‌‌‌‌‌‌‌‌లో పలు సెక్షన్ల కింద కేసులు నమోదు చేశారు.
