సెల్ఫీవిత్ కాంగ్రెస్ డెవలప్మెంట్
సెల్ఫీలు తీసి.. వాట్సాప్లో డీపీలుగా పెట్టుకోవాలి
కాంగ్రెస్ కేడర్కు భట్టి విక్రమార్క పిలుపు
హైదరాబాద్, వెలుగు: రైతులకు ఉచిత కరెంట్ అనేది కాంగ్రెస్ పార్టీ పేటెంట్ అని సీఎల్పీ నేత భట్టి విక్రమార్క తెలిపారు. ‘‘ఫ్రీ కరెంట్ పాలసీ బీఆర్ఎస్దే అన్నట్లుగా సీఎం కేసీఆర్, మంత్రులు కేటీఆర్, హరీశ్ పచ్చి అబద్ధాలాడుతున్నరు” అని ఆయన విమర్శించారు. కాంగ్రెస్ పాలనలో చేసిన అభివృద్ధిని ప్రజలకు తెలియజేసేందుకు ‘సెల్ఫీ విత్ కాంగ్రెస్ డెవలప్మెంట్’ కార్యక్రమాన్ని ప్రారంభిస్తున్నట్టు వెల్లడించారు. కాంగ్రెస్ చేసిన అభివృద్ధి కార్యక్రమాలు, తీసుకొచ్చిన ప్రాజెక్టుల ముందు సెల్ఫీ తీసుకోవడమే ఈ కార్యక్రమమని చెప్పారు. మంగళవారం సీఎల్పీలో పీసీసీ ప్రచార కమిటీ చైర్మన్ మధు యాష్కీతో కలిసి భట్టి విక్రమార్క మీడియాతో మాట్లాడారు. మెట్రో రైలు, ఔటర్ రింగ్రోడ్డు, ఎయిర్పోర్ట్, ఈసీఐఎల్, బీహెచ్ఈఎల్, బీడీఎల్, డ్రింకింగ్ వాటర్ వంటివన్నీ కాంగ్రెస్ హయాంలో వచ్చినవేనని, వాటి ముందు సెల్ఫీ తీసుకొని ప్రజలకు వివరించాలని కాంగ్రెస్ కార్యకర్తలకు పిలుపునిచ్చారు. ఆ సెల్ఫీ ఫొటోలను వాట్సాప్ డీపీలుగా పెట్టుకోవాలని ఆయన సూచించారు. కాంగ్రెస్ అధికారంలోకి వస్తే 24 గంటల ఉచిత కరెంట్ను రైతులకు ఇస్తామని తెలిపారు. కాంగ్రెస్ హయాంలో కట్టిన విద్యుత్ ప్రాజెక్టుల వల్లే ఇప్పుడు విద్యుత్ కోతలు లేవన్న విషయాన్ని గుర్తుపెట్టుకోవాలన్నారు. అవినీతి సొమ్ముతో బీఆర్ఎస్ నేతలు సోషల్ మీడియాలో తప్పుడు కథనాలను ప్రచారం చేస్తున్నదని ఆయన మండిపడ్డారు. సీఎం కేసీఆర్కు సోయి ఉందో లేదో కూడా తెలియదని విమర్శించారు. ‘‘రాష్ట్రాలను బట్టి అవసరాలుంటాయి. ఆయా రాష్ట్రాల అవసరాలు, ఆదాయ వనరులను బట్టే మేనిఫెస్టో ఉంటుంది. చత్తీస్గఢ్లో ఉచిత కరెంట్ ఎందుకు ఇవ్వడం లేదని ప్రశ్నించడం వారి పిచ్చి ముదిరి మాట్లాడినట్టు
అనిపిస్తున్నది’’ అని దుయ్యబట్టారు.
శ్రీరామ్సాగర్ వద్ద సంబురాలు జరుపుతం: మధుయాష్కీ
రాష్ట్రంలో ప్రజల కష్టాలను తెలుసుకునేందుకు భట్టి విక్రమార్క ఆదిలాబాద్ నుంచి ఖమ్మం వరకు పాదయాత్ర చేయడం గొప్ప విషయమని మధుయాష్కీ అన్నారు. ఆనాడు వైఎస్ రాజశేఖరరెడ్డి ఉచిత విద్యుత్ను తీసుకురావడంలో భట్టి విక్రమార్క ప్రమేయం కూడా ఉందని చెప్పారు. ‘‘తెలంగాణ రాష్ట్రం ఏర్పడినప్పుడు రూ.16 వేల కోట్ల మిగులు ఉండేది. కానీ, ఇప్పుడు ఆదాయం పెంచకపోగా.. రాష్ట్ర సర్కారు అప్పులను విపరీతంగా పెంచింది” అని ఆయన మండిపడ్డారు. శ్రీరామ్సాగర్ ప్రాజెక్టును నిర్మించి 60 ఏండ్లవుతున్నదని, కాంగ్రెస్ కట్టిన ఆ ప్రాజెక్టుతో లక్షల ఎకరాలు పచ్చబడ్డాయని తెలిపారు. 60 ఏండ్లు పూర్తయిన సందర్భంగా ప్రాజెక్టు వద్ద సంబురాలు నిర్వహిస్తామన్నారు. గ్రావిటీతోనే కిందికి నీళ్లిచ్చేలా రూపొందించిన ప్రాణహిత– చేవెళ్ల ప్రాజెక్టును పక్కనపెట్టి కేవలం కమీషన్ల కోసం కాళేశ్వరం ప్రాజెక్టును కేసీఆర్ కట్టారని ఆయన ఆరోపించారు. ప్రజలకు పేలాలను పంచుతూ.. కేసీఆర్ మాత్రం బిర్యానీలను తింటున్నారని దుయ్యబట్టారు. కాళేశ్వరం ప్రాజెక్టుతో కల్వకుంట్ల కుటుంబం కడుపు నింపుకుందని విమర్శించారు. వరంగల్ రైతు డిక్లరేషన్లో భాగంగా రాహుల్ గాంధీ ప్రకటించిన అన్నింటినీ మేనిఫెస్టోలో పెట్టి అమలు చేస్తామని హామీ ఇచ్చారు. ధరణిని తెచ్చి భూబకాసురులుగా మారారని కేసీఆర్పై మధు యాష్కీ ఫైర్ అయ్యారు.
ALSO READ :ఆర్టీసీ డిపోల్లో అకౌంట్స్ సెక్షన్ క్లోజ్
వైఎస్ తొలి సంతకం ఫొటో ముందు సెల్ఫీ
2004లో కాంగ్రెస్ అధికారంలోకి వచ్చినప్పుడు అప్పటి సీఎం వైఎస్ రాజశేఖరరెడ్డి ఉచిత కరెంట్ ఫైల్పై తొలి సంతకం పెట్టారని భట్టి విక్రమార్క గుర్తుచేశారు. నాటి ఫొటోను ప్రదర్శించారు. ఆ ఫొటో ముందు మధు యాష్కీ, బెల్లయ్య నాయక్ తదితర నేతలతో కలిసి ఆయన సెల్ఫీ తీసుకున్నారు. జాతీయ, ప్రాంతీయ పార్టీలేవీ ఆలోచన చేయనప్పుడే.. 1999 ఎన్నికల్లో సోనియా గాంధీ అనుమతితో వైఎస్, అప్పటి మేనిఫెస్టో కమిటీ చైర్మన్ చక్రపాణి ఫ్రీ కరెంట్ అంశాన్ని మేనిఫెస్టోలో చేర్చారని భట్టి తెలిపారు. అప్పటి నుంచే ఉచిత విద్యుత్కు కాంగ్రెస్ పార్టీ కట్టుబడి ఉందన్నారు. ఉచిత కరెంట్పై వైఎస్ చేసిన తొలి సంతకం ఫొటోను విస్తృతంగా ప్రచారం చేయాలని కేడర్కు పిలుపునిచ్చారు.
