హైదరాబాద్, వెలుగు: కేసీఆర్ కు ప్రజాస్వామ్యంపై నమ్మకం లేదని మంత్రి తుమ్మల నాగేశ్వరరావు మంగళవారం ఒక ప్రకటనలో విమర్శించారు. నల్గొండకు పోయే ఓపికుందిగానీ.. ఇంటి పక్కనే ఉన్న అసెంబ్లీకి మాత్రం కేసీఆర్రావడం లేదని మండిపడ్డారు. ప్రజలు ఎన్నుకున్న సభలో ప్రజాప్రతినిధుల ప్రశ్నలకు జవాబు చెప్పే ధైర్యం లేకనే అసెంబ్లీకి రావట్లేదన్నారు. కేసీఆర్ ఇప్పటికీ ఓటమిని జీర్ణించుకోలేకపోతున్నారని చెప్పారు.
తనకు ఓటేసినంత కాలం ప్రజలు తెలివైనోళ్లు.. వేయకుంటే మూర్ఖులు అన్నట్టుగా కేసీఆర్ మాట్లాడుతున్నారన్నారు. పాలిచ్చే బర్రెను వదిలేసి దున్నపోతును ఎన్నుకున్నారంటూ మాట్లాడి కేసీఆర్ తన నియంతృత్వ పోకడలను మరోసారి చాటుకున్నారని విమర్శించారు. ప్రజాస్వామ్యంలో ప్రజలే దేవుళ్లన్న ప్రాథమిక సూత్రాన్ని మరిచి మాట్లాడుతున్నారని అన్నారు. కృష్ణా, గోదావరి నదులపై రాష్ట్ర వాటాను వదులుకున్నది కేసీఆరేనని మండిపడ్డారు.
