- విద్యుత్ రంగ నిపుణుడు వేణుగోపాల్ రావు వ్యాఖ్య
హైదరాబాద్, వెలుగు: విద్యుత్ అక్రమాలపై విచారణకు వేసిన జ్యుడీషియల్ కమిషన్ నే కేసీఆర్ వ్యతిరేకించడం కరెక్ట్ కాదని విద్యుత్ రంగ నిపుణుడు వేణుగోపాల్ రావు అన్నారు. అడిగిన ప్రశ్నలకు కేసీఆర్ తప్పకుండా సమాధానం ఇవ్వాల్సిందేనని ఆయన స్పష్టంచేశారు. జ్యుడీషియల్ కమిషన్ వేసే అధికారం ప్రభుత్వానికి ఉంటుందని, కమిషన్ వేయడం తప్పు అని కేసీఆర్ భావిస్తే కోర్టులో చాలెంజ్ చేసుకోవచ్చని ఆదివారం మీడియాతో అన్నారు. కానీ, కమిషన్ ను తప్పు బట్టే అధికారం కేసీఆర్కు లేదని చెప్పారు. గత ప్రభుత్వ హయాంలో జరిగిన విద్యుత్ కొనుగోళ్లు, ప్రాజెక్టుల నిర్మాణంపై కమిషన్ పూర్తి విచారణ చేయాల్సిన అవసరముందన్నారు. కేసీఆర్ రాసిన 12 పేజీల లెటర్తో జ్యుడీషియల్ కమిషన్ సంతృప్తి చెందకపోతే.. ప్రత్యక్షంగా కమిషన్ ముందుకు విచారణ కోసం రావాలని ఆయనను పిలువొచ్చని తెలిపారు. ‘‘విద్యుత్ అధికారులను కమిషన్ విచారిస్తే... అప్పటి ప్రభుత్వం చెప్పినట్లు చేశామని చెప్పారు. దీంతో మాజీ సీఎం కేసీఆర్ ను కమిషన్ ప్రశ్నిస్తుంది” అని అన్నారు. కరోనా సాకుతో యాదాద్రి ప్లాంట్ లేట్ అయిందనడం వాస్తవం కాదని పేర్కొన్నారు. ‘‘భద్రాద్రి ప్లాంట్ నిర్మాణ ప్లాన్ సరిగా లేకపోవడం వల్ల ప్రభుత్వానికి భారీగా అనవసర ఖర్చు వచ్చింది. చత్తీస్ గఢ్ జెన్కోతో పీపీఏ చేసుకోకుండా.. అక్కడి డిస్కంలతో విద్యుత్ కొనుగోలు చేశారు” అని వేణుగోపాల్ రావు అన్నారు.
