హైదరాబాద్ సిటీ, వెలుగు: రాష్ట్ర రాజధాని శివారులోని కోకాపేటలో భూములు రికార్డు ధర పలుకుతున్నాయి. శుక్రవారం రంగారెడ్డి జిల్లా కోకాపేట నియోపొలిస్ లేఅవుట్స్ సర్వే నెం. 239లోని 15వ నంబర్ ప్లాట్(4.03 ఎకరాలు)కు ఏకంగా ఎకరానికి రూ. 151.25 కోట్ల ధర వచ్చింది. ఇక్కడే సర్వేనెం. 240లోని 16వ నంబర్ప్లాట్(5.03 ఎకరాలు)కు ఎకరానికి రూ. 147.75 కోట్లు పలికింది. ఇటీవల కోకాపేటలోని నియోపొలిస్ లే అవుట్లో రెండు ప్లాట్లకు వేలం వేయగా.. ఒక దానికి ఎకరం రూ. 137.25 కోట్లు పలుకగా, మరో ప్లాట్ ఎకరానికి రూ. 136.50 కోట్ల ధర వచ్చింది. హెచ్ఎండీఏ ఈ రెండు ప్లాట్లను మల్టీజోన్ ఏరియాగా అభివృద్ధి చేయడంతో ఇక్కడ స్థలం కొనుగోలుచేసిన వారు నివాస, వాణిజ్యపరంగా ఎలాగైనా ఉపయోగించుకునే అవకాశం ఉంటుంది.
అలాగే హైరైజ్‌ బిల్డింగుల నిర్మాణానికి అనుమతులు ఇవ్వనున్నారు. ఎన్ని ఫ్లోర్లు అయినా నిర్మించుకునే వెసులుబాటు ఉంటుంది. దీంతో ఈ భూములను కొనుగోలుచేసేందుకు జాతీయ, అంతర్జాతీయ సంస్థలతోపాటు ప్రముఖ నిర్మాణ సంస్థలు, బిల్డర్లు, ఇన్వెస్టర్లు ఆసక్తి చూపిస్తున్నారు. 2023లో నియోపొలిస్ లేఅవుట్‌‌లో భూములను వేలం వేయగా అప్పట్లో ఎకరానికి 100.75 కోట్లు పలికింది. అదే ఉత్సాహంతో అధికారులు ఈసారి ఆయా లేఅవుట్లలో భారీ ఎత్తున మౌలిక సదుపాయాలు కల్పించడంతోపాటు ఈ ప్రాంతాన్ని మల్టీజోన్‌‌గా ప్రకటించారు. ఇక కోకాపేట పరిసర ప్రాంతాల్లోనే భారీ సంఖ్యలో ఐటీ కంపెనీలు, ఫైనాన్షియల్ డిస్ట్రిక్ట్స్.. సమీపంలోనే ఔటర్ రింగ్రోడ్ ఉన్నాయి. ఈ ప్రాంతాల నుంచి ఎయిర్‌‌‌‌పోర్ట్ కూడా చాలా దగ్గరలోనే ఉండడం వల్ల ఈ భూములకు మరింత డిమాండ్ ఏర్పడింది.
పోటాపోటీగా ఈ–బిడ్డింగ్
కోకాపేటలో భూముల విలువ పెరుగుతుండడంతో హెచ్ఎండీఏ వేలానికి భారీగా డిమాండ్ పెరిగింది. పోటీ తీవ్రంగా ఉండడంతో నియోపొలిస్ దేశంలో అత్యంత విలువైన భూమిగా నిలిచింది. ఉదయం 11:00 గంటలకు ప్రారంభమైన బిడ్డింగ్ మధ్యాహ్నం 2 గంటల వరకూ నిర్వహించాల్సి ఉంది. కానీ భారీగా పోటీ పెరగడంతో సాయంత్రం 6:30 గంటలు దాటేంతవరకు వేలం కొనసాగింది. భారీ సంఖ్యలో డెవలపర్లు, ఇన్వెస్టర్లు, రియల్ ఎస్టేట్ సంస్థలు పోటీలో పాల్గొన్నాయి. ప్లాట్ 15లో ఎకరాకు రూ.151.25 కోట్ల చొప్పున 4.03 ఎకరాలను లక్ష్మీ నారాయణ గుమ్మడి, కార్తీక్‌‌రెడ్డి మద్గుల, శరత్ వెంకటప్రగడ, శ్యామ్ సుందర్‌‌‌‌రెడ్డి వంగా దక్కించుకున్నారు. ప్లాట్ నం.16 లో ఎకరాకు రూ.147.75 కోట్ల చొప్పున 5.03 ఎకరాలను గోద్రేజ్ ప్రాపర్టీస్ లిమిటెడ్ సొంతం చేసుకున్నది. ఈ రెండు ప్లాట్ల ద్వారా రాష్ట్ర సర్కారుకు మొత్తం రూ.1,352 కోట్లు లభించాయి. మొదటి విడతలో వచ్చిన ఆదాయం కలుపుకొని.. ఇప్పటివరకు నియోపొలిస్ ఈ–వేలంద్వారా ప్రభుత్వానికి రూ. 2,708 కోట్ల ఆదాయం సమకూరింది. ఈ రికార్డు స్థాయి ఫలితాలతో హైదరాబాద్ రియల్ ఎస్టేట్ మార్కెట్‌‌లో ఇప్పటివరకు కనిపించిన అత్యధిక పెరుగుదలగా అధికారులు తెలిపారు. డిసెంబర్ 3న నియోపొలిస్, డిసెంబర్ 5న గోల్డెన్ మైల్‌‌లో నిర్వహించనున్న ఈ–ఆక్షన్‌‌లపై డెవలప్‌‌మెంట్ కమ్యూనిటీ నుంచి మరింత బలమైన పోటీ ఉంటుందని అధికారులు అంచనా వేస్తున్నారు.
